"مينيسترلىكتىڭ ءوزى كومپيۋتەرلىك تەحنيكانى ساتىپ الۋعا قاتىسپايدى. ونى جەرگىلىكتى اكىمدىك ءوزى ساتىپ الادى, ول ءۇشىن بارلىق جاعدايدى جاسادىق. مينيسترلىك تامىز ايىندا كومپيۋتەر ساتىپ الۋ بايقاۋى اشىق تۇردە ءوتۋى كەرەكتىگى جانە ارنايى كوميسسيا قۇرۋ تۋرالى حات جىبەرگەن بولاتىن. ەڭ باستى ماسەلە – تەحنيكانىڭ ساپاسى جانە جەتكىزىلۋ مەرزىمى. جۇرگىزىلگەن مونيتورينگ بويىنشا, كەيبىر ايماققا ساپاسىز تەحنيكا جەتكىزىلگەنى تۋرالى نەمەسە بەلگىلەنگەن مەرزىمدە جەتكىزىلمەگەنى تۋرالى اقپارات بار. سوندىقتان بۇل ماسەلەگە قاتىستى ايماقتاردىڭ جاۋابىن تىڭداماقپىن", دەيدى رۇستەم بيعاري.
الماتى وبلىسىنا جەتكىزىلگەن تەحنيكانىڭ 50-ءى جارامسىز بولىپ شىققان جانە ولار ىسكە جارامدى تەحنيكامەن اۋىستىرىلعان. 5-7 كۇن ىشىندە اتالعان تەحنيكالار مەكتەپتەرگە جەتكىزىلەدى. ال اقتوبە وبلىسىنا جەتكىزىلگەن تەحنيكالاردىڭ ىشىندە 15 كومپيۋتەردە اقاۋ بولعان جانە ول بىردەن اۋىستىرىلعان. ونىڭ ايتۋىنشا, ءار كومپيۋتەر بەرىلگەن بالانىڭ اتىنا تىركەلۋى قاجەت.
ۆيتسە-ءمينيستردىڭ مالىمەتىنشە, اكىمدىك الدىمەن كومپيۋتەرلەردى تەكسەرىپ الىپ, ودان كەيىن عانا وقۋشىلارعا بەرۋى كەرەك. ولاردىڭ قىزمەت كورسەتۋگە جارامدى مەرزىمى 1 جىل بولۋى قاجەت. ۇكىمەتتىڭ قولداۋىمەن 4 وتاندىق كومپانيا كومپيۋتەرلىك تەحنيكا جەتكىزۋمەن اينالىسادى. ۇكىمەتتىڭ قولداۋىمەن ولار ۇلكەن كولەمدە تاپسىرىس ورىندايدى.
"وتاندىق كومپانيا بولعانىنا قاراماستان, ولارعا قويىلاتىن تالاپ تا جوعارى بولۋى كەرەك, ولاردان ساپا تالاپ ەتۋ كەرەك. جارامسىز تەكحنيكالاردى العان سوڭ ورنىنا باسقا تەحنيكانى جىلدام بەرۋى كەرەك. وقۋ جىلىنىڭ ءبىرىنشى توقسانى اياقتالعانمەن, ءالى دە تەحنيكالاردى جەتكىزۋمەن اينالىسۋدامىز. وسىعان قاتىستى كوپ سۇراق تۋىندايدى", دەيدى ول.
