جاقىندا «اتامەكەن» ۇلتتىق كاسىپكەرلەر پالاتاسىنىڭ VII سەزىندە نۇر-سۇلتان قالاسى بيىل «جۇمىسپەن قامتۋدىڭ جول كارتاسى» باعدارلاماسىن جۇزەگە اسىرۋدا جوعارى ناتيجەلەر كورسەتكەنى اتالىپ ءوتتى. ال ەندى كەلەسى جىلعا ارنالعان باعدارلامانىڭ جوباسى 1 جەلتوقسانعا دەيىن ازىرلەنۋى ءتيىس. ەلوردانىڭ حالىقتى جۇمىسپەن قامتۋ ورتالىعى بۇل جوبانىڭ ۇلتتىق بانكپەن جانە ۇكىمەتپەن بىرلەسىپ جۇزەگە اسىرىلاتىنىن حابارلادى.
حالىقتى جۇمىسپەن قامتۋعا باعىتتالعان يگى باعدارلاما ناتيجەسىن كورسەتىپ, قانشاما ازامات جۇمىستى بولىپ, ادال ەڭبەك, ماڭداي تەرىمەن ناپاقاسىن تاۋىپ وتىر. سولاردىڭ ءبىرى ەلوردالىق داۋرەن شابدانبەكوۆ enbek.kz سايتى ارقىلى جۇمىس تاۋىپتى. «پاندەميا باستالعالى جۇمىسسىز قالدىم. كەيىن enbek.kz سايتىنا تىركەلىپ, جۇمىس ىزدەدىم. مۇنداي جۇمىستى حابارلاندىرۋدان كوبىنە تابا المايسىڭ. ال جۇمىسپەن قامتۋ ورتالىعىنىڭ سايتىندا كوپ جۇمىس ورنى مەن تاڭداۋ بار», دەيدى ول.
«جۇمىسپەن قامتۋدىڭ جول كارتاسىنا» قاتىسۋعا كاسىپكەرلەر دە ءوتىنىم بەرە الادى. دۇرىس ۇيلەستىرۋ ارقىلى بارلىق دەڭگەيدەگى مامانداردى تابۋعا بولادى. سونىمەن قاتار جۇمىسپەن قامتىلعانداردىڭ اراسىنان تۇراقتى جۇمىس ورنىن تاپقاندار دا بار.
ء«بىزدىڭ كاسىپورىن ديود جارىعى بار شامداردى شىعارۋمەن اينالىسادى. «جۇمىسپەن قامتۋدىڭ جول كارتاسى» اياسىندا اۋقىمدى جوبا بولدى. سوعان 100-دەن اسا ادام قاتىستى. سونىڭ ىشىنەن 12-13 ادام تۇراقتى جۇمىسقا قابىلداندى. وسىنداي جوبالار ارقىلى قولداۋ كورسەك, ءبىز جۇمىستى جانداندىرىپ, جۇمىسشىلاردىڭ سانىن كوبەيتۋگە دايىنبىز», دەيدى كاسىپكەر قانىبەك ايتاقوۆ.
باعدارلاما اياسىنداعى ءىس-شارالار جىل سوڭىنا دەيىن جالعاسادى. ناقتىراق ايتقاندا, قۇرىلىس نىساندارىنداعى ىشكى جوندەۋ جۇمىستارىن اياقتاۋ جوسپارلانىپ جاتىر. تولىعىراق مالىمەت العىسى كەلەتىندەر حالىقتى جۇمىسپەن قامتۋ ورتالىعىنىڭ مونيتورينگ جانە ەڭبەك رەسۋرستارىن بولجاۋ بولىمىنە مىنا مەكەنجاي بويىنشا حابارلاسۋعا بولادى: بەيبىتشىلىك كوشەسى, №25-ءۇي, «وركەن» ىسكەرلىك ورتالىعى (تەل.: 57-88-89, 57-89-37, 24-83-02).
