يتاليا تاس جولدارىندا وتكەن «دجيرو د’يتاليا» دوداسىندا «استانا» ۆەلوكومانداسىنىڭ بىردە-ءبىر سپورتشىسى كەزەڭ جەڭىمپازى اتانباسا دا, جارىس قورىتىندىسى بويىنشا ەڭ ۇزدىك 10 ۆەلوسپورتشىنىڭ قاتارىنان كورىنگەن-ءدى. ال «يسپانيا ۆۋەلتاسىنىڭ» 18-كەزەڭىندە قازاقستاندىق كوماندانىڭ ءبىر سپورتشىسى كەزەڭ جەڭىمپازى اتانىپ, توعىزى ءار كەزەڭ سايىن ۇزدىك وندىقتىڭ قاتارىنان كورىنسە دە, جالپى جارىس قورىتىندىسى بويىنشا ەشبىر سپورتشىمىز ۇزدىكتەر قاتارىنا ەنە المادى.
دەسە دە 75 جىلدىق تاريحى بار ايگىلى دودادا تالاي مىقتى ۆەلوشاباندوزدارمەن ءبىر قاتاردا ونەر كورسەتىپ, ءبىر كەزەڭدە مىقتىلاردىڭ اراسىنان سۋىرىلىپ شىعىپ, كەزەڭ جەڭىمپازى اتانۋدىڭ ءوزى ۇلكەن جەتىستىك دەپ ەسەپتەيمىز. ونىڭ ۇستىنە «استانا» ۆەلوكومانداسى يسپانياعا ەڭ نەگىزگى قۇرامىن ەمەس, الەمدىك دەڭگەيدەگى جارىستاردا اسا تاجىريبەسى جوق ارالاس قۇرامىن جىبەردى. ويتكەنى الەمدەگى بارلىق جارىس پاندەمياعا بايلانىستى جوسپارلانعان ۋاقىتىنان كەش ۇيىمداستىرىلىپ جاتقانى بەلگىلى. سول سەبەپتى بيىل ءبىرىنشى مارتە ۆەلوشاباندوزدار اراسىنداعى ەڭ مارتەبەلى ەكى جارىس – «يسپانيا ۆۋەلتاسى» مەن «دجيرو د’يتاليا» دوداسى تاريحتا العاش رەت ءبىر ۋاقىتتا دەرلىك وتكىزىلدى. ءسويتىپ الەكساندر ۆينوكۋروۆ باستاعان قازاقستاندىق كوماندا ەكى جارىسقا دا ارالاس قۇراممەن قاتىسۋعا ءماجبۇر بولدى. اتاپ ايتار بولساق, «ۆۋەلتادا» الەكساندر ۆلاسوۆ, يون يساگيررە, گوركا يساگيررە, لۋيس لەون سانچەس, ومار فرايلە, الەكس ارانبۋرۋ, دميتري گرۋزدەۆ جانە مەرحاۆي كۋدۋس سەكىلدى سپورتشىلار باق سىنادى. ال يتالياداعى جارىستا ياكوب فۋلسانگ, ميگەل انحەل لوپەس, يۋري ناتاروۆ, ۆاديم پرونسكي, مانۋەلە بوارو, فابيو فەللينە جانە وسكار رودريگەس ونەر كورسەتكەنىن تاعى ءبىر رەت ايتا كەتەيىك.
سونىمەن بيىلعى «يسپانيا ۆۋەلتاسىندا» «استانا» ۆەلوكومانداسىنان ەڭ ۇزدىك ناتيجەنى الەكساندر ۆلاسوۆ تىركەدى. 24 جاستاعى رەسەيلىك ۆەلوشاباندوز 16-كەزەڭنىڭ قورىتىندىسى بويىنشا جالپى ەسەپتە توعىزىنشى ورىندا كەلە جاتقان-دى. الايدا 17-كەزەڭدە مارەگە 14-ءشى بولىپ كەلىپ, جالپى ەسەپتەگى جاعدايىن ناشارلاتىپ الدى. ءسويتىپ بيىلعى دودانى 11-ورىنمەن تۇيىندەدى.
جوعارىدا ايتىپ وتكەنىمىزدەي, يسپانيا گراند-تۋرىندا قازاقستاندىق كوماندانىڭ ۆەلوسپورتشىسى توعىز مارتە ءار كەزەڭدە ۇزدىك وندىقتىڭ قاتارىنان كورىندى. جەكە-جەكە اتاپ وتەر بولساق, ءۇشىنشى جارىس كۇنىن تاماشا وتكىزگەن الەكساندر ۆلاسوۆ لا لاگۋنا نەگرا دە ۆينۋەسا شىڭىنا دەيىن ءبىر شاقىرىم قالعاندا شابۋىلعا شىعىپ, ناتيجەسىندە 5-ورىنعا يە بولدى. سونداي-اق رەسەيلىك ۆەلوشاباندوز جارىس سوڭىنا دەيىن تاعى ءتورت مارتە ۇزدىكتەر قاتارىنان كورىندى. ماسەلەن, 8-كەزەڭدە مارەگە ءتورتىنشى بولىپ جەتسە, 11-كەزەڭدە التىنشى بولدى. ال 12-كەزەڭدە مارەگە سىنىق سۇيەم قالعاندا ءسۇرىندى. كورولدىك تاۋلى كەزەڭنىڭ سوڭعى شاقىرىمىندا كوش باسىنا شىققان ۆلاسوۆ جارىس سوڭىنا دايىن ۇستەمدىگىن ساقتاي المادى. ناتيجەسىندە EF Pro Cycling وكىلى بريتانيالىق حيۋ كارتي العا جىبەرىپ, ءوزى ەكىنشى ورىن الدى. 16-كەزەڭدە الەكساندر ۆلاسوۆ مارە سىزىعىن پەلوتونمەن ءبىر ۋاقىتتا كەسكەنىمەن, جارىس سوڭىندا 10-ورىننان كورىندى.
سونىمەن قاتار جارىستى بەسىنشى كەزەڭدە مارەگە قالىڭ توپپەن بىرگە جەتكەن يسپانيالىق الەكس ارانبۋرۋ ءسپرينتتى جاقسى وتكىزىپ, سول توپ اراسىنان 3-ورىنعا, جالپى كەزەڭدە 6-ورىنعا قول جەتكىزدى. سونداي-اق 10-كەزەڭدى ءتورتىنشى ورىنمەن تۇيىندەدى.
التىنشى كەزەڭ «استانا» كومانداسى ءۇشىن وتە ءساتتى كۇن بولدى. ويتكەنى يون يساگيررە اتاقتى ارامون فورميگال شىڭىندا جەڭىسكە جەتسە, گوركا يساگيررە مارە سىزىعىن توعىزىنشى بولىپ كەستى. يون بۇل جارىس كۇنىندە مارەگە 3 شاقىرىم قالعاندا شابۋىلعا شىقتى. ايتارلىقتاي باسىمدىققا يە بولعان يساگيررە شابۋىلىن سوڭىنا دەيىن جەتكىزىپ, «يسپانيا ۆۋەلتاسىندا» العاش رەت جەڭىسكە جەتتى. سونداي-اق يساگيررە ۆەلوسپورت تاريحىندا ءۇش گراند-تۋردا جەڭىسكە جەتكەن 100-ءشى ۆەلوسپورتشى بولدى. بۇعان دەيىن ول 2012 جىلى Euskaltel-Euskadi كومانداسىمەن «دجيرو د’يتاليانىڭ», 2016 جىلى Movistar Team ۇجىمىمەن بىرگە «تۋر دە فرانستىڭ» ءبىرىنشى كەزەڭىندە توپ جارعان. سونىمەن قاتار يون يساگيررە جارىستىڭ ەڭ سوڭعى 17-ءشى تاۋلى كەزەڭىندە باسەكەنى ۇزدىك ۇشتىكتىڭ قاتارىندا تۇيىندەدى.
سونىمەن قاتار جارىستىڭ جەتىنشى كەزەڭىندە دە ەكى بىردەي سپورتشىمىز ۇزدىك وندىقتىڭ قاتارىنان كورىندى. پۋەرتو دە وردۋنيا اسۋىن ەكىنشى مارتە ءجۇرىپ ءوتۋ بارىسىندا ومار فرايلە مايكل ۆۋدس, الەحاندرو ۆالۆەردە, نانس پەتەرس جانە گيوم مارتانداردىڭ شابۋىلىنا ىلەسىپ, ناتيجەسىندە بەس شاباندوزدان تۇراتىن كوشباسشى توپ اراسىنا قوسىلدى. مارەگە شامامەن 3 شاقىرىم قالعاندا «استانا» وكىلى شابۋىلعا شىعىپ كورگەن-ءدى. الايدا مارەگە 1,3 شاقىرىم قالعاندا ۆۋدس شابۋىلداپ, كەزەڭدە جەڭىسكە جەتسە, ومار فرايلە 2-ورىنعا يەك ارتتى. الەكس ارانبۋرۋ كوشباسشىلاردان كەيىنگى توپپەن كومبەگە بىرگە كەلىپ, بۇل كەزەڭدە 7-ورىنعا يە بولدى.
«استانا» ۆەلوشاباندوزدارى وسىلايشا جىلدىڭ ەڭ نەگىزگى ءۇش دوداسىن اياقتادى. قىركۇيەكتە وتكەن «تۋر دە فرانستا» ميگەل انحەل لوپەس جالپى ەسەپتە التىنشى ورىندى يەلەنسە, جۋىردا عانا اياقتالعان «دجيرو د’يتاليا» دوداسىن ياكوب فۋلسانگ تا التىنشى ورىنمەن قورىتىندىلاعان-دى.
ايتا كەتەيىك, «يسپانيا ۆۋەلتاسىندا» 2006 جىلى الەكساندر ۆينوكۋروۆ باستاپ بەرگەن جەڭىستى البەرتو كونتادور (2008) مەن فابيو ارۋ (2015) ءساتتى جالعاعان بولاتىن. سونىمەن قاتار بىلتىرعى دودادا ميگەل انحەل لوپەس پەن ياكوب فۋلسانگ كەزەڭ جەڭىمپازى اتانسا, «استانا» كوماندالىق ەسەپتە ۇزدىكتەر قاتارىنان كورىنگەنىن ايتا كەتەيىك. جارىستىڭ سوڭعى كۇنىندەگى ناتيجەنى گازەتىمىزدىڭ ەرتەڭگى نومىرىنەن وقي الاسىزدار.
