توكيو قالاسىندا ورنالاسقان جاپونيالىق ءباسپاسوز ورتالىعىندا اتوم جوباسىن تانىستىرۋ شاراسى اياسىندا قازاقستاندىق سۋرەتشى جانە جوبانىڭ قۇرمەتتى ەلشىسى كارىپبەك كۇيىكوۆتىڭ سۋرەتتەر كورمەسى ءوتتى.
توكيو قالاسىندا ورنالاسقان جاپونيالىق ءباسپاسوز ورتالىعىندا اتوم جوباسىن تانىستىرۋ شاراسى اياسىندا قازاقستاندىق سۋرەتشى جانە جوبانىڭ قۇرمەتتى ەلشىسى كارىپبەك كۇيىكوۆتىڭ سۋرەتتەر كورمەسى ءوتتى.
كورمەنىڭ اشىلۋ راسىمىنە جاپونيا پارلامەنتىنىڭ دەپۋتاتتارى مەن باستى مەملەكەتتىك ورگانداردىڭ, ءىرى كومپانيالار مەن باق-تاردىڭ وكىلدەرى, سونداي-اق, انتيادرولىق قوزعالىس سالاسىنداعى ايگىلى ۇيىمداردىڭ باسشىلارى قاتىستى. سونىمەن قاتار, جاپونيا پرەمەر-ءمينيسترىنىڭ جۇبايى اكيە ابە ءراسىمنىڭ قۇرمەتتى قوناعى بولدى.
شارانى اشقان قازاقستاننىڭ جاپونياداعى ەلشىسى اقىلبەك كامالدينوۆ پرەزيدەنت نۇرسۇلتان نازارباەۆتىڭ سەمەي يادرولىق سىناق پوليگونىن جابۋعا قاتىستى تاريحي شەشىمىنىڭ ماڭىزدىلىعىن اتاپ ايتىپ, مارتەبەلى مەيماندارعا قازاقستاننىڭ جاھاندىق قاۋىپسىزدىكتى كۇشەيتۋگە قوسىپ كەلە جاتقان ۇلەسى جايىندا, سونىمەن قاتار, ەلباسىنىڭ جاڭا حالىقارالىق باستاماسى بولىپ تابىلاتىن اتوم جوباسى جايىندا ايتىپ بەردى.
جاپونيا پارلامەنتى كەڭەسشىلەر پالاتاسىنىڭ دەپۋتاتى كادزۋيۋكي حامادا ءوز ءسوزىندە قازاقستان پرەزيدەنتىنىڭ يادرولىق قارۋسىز الەم قالىپتاستىرۋعا جانە ورتالىق ازيانى يادرولىق قارۋدان ازات ايماق دەپ جاريالاۋعا باعىتتالعان كۇش-جىگەرىن اتاپ ءوتتى.
«سۋرەتشى – سوعىس باستايتىن ادام ەمەس: ونەر قاۋىپسىز الەم قۇرۋعا كومەكتەسە الادى», دەدى شارادا ءسوز سويلەگەن جاپوندىق «سۋرەتسىز سۋرەت كىتابى» جوباسىنىڭ جەتەكشىسى, سۋرەتشى جانە ديزاينەر حيرومي ينايوشي.
قۇرمەتتى قوناقتارمەن بولعان اڭگىمە اراسىندا ك.كۇيىكوۆ جاپونيا پرەمەر-ءمينيسترىنىڭ جۇبايىن قازاقستاننىڭ يادرولىق قارۋسىزدانۋ ىسىنە قوسىپ وتىرعان ۇلەسىمەن تانىسۋ جانە ەكى ەل اراسىنداعى ءوزارا ىقپالداستىقتى نىعايتۋ ماقساتىمەن قازاقستانعا شاقىردى.
«كارىپبەك كۇيىكوۆتىڭ سۋرەتتەرى ادامداردى يادرولىق قارۋسىز الەمگە باعىتتالعان كۇرەسكە جىگەرلەندىرەدى. وسى ونەر ءوز ماقساتىنا جەتىپ, الەم يادرولىق قارۋدان ازات بولسا, تاماشا بولار ەدى», دەگەن ا.ابە شارا سوڭىندا ونەردىڭ كۇشى الەمدى وزگەرتەتىنىنە سەنىمىن ءبىلدىردى.
اتوم جوباسىنىڭ كوپ ادامداردى يادرولىق قارۋدى تولىقتاي جويۋ جولىنداعى بەرىك قوزعالىسقا ۇندەي الاتىن ۇلكەن الەۋەتى بار ەكەنى جايىنداعى شارا قوناقتارىنىڭ پىكىرلەرى ءبىر-بىرىنە ۇندەس شىقتى.
ءوز كەزەگىندە قر ءسىم-ءىنىڭ ەرەكشە تاپسىرمالار جونىندەگى ەلشىسى رومان ۆاسيلەنكو اتوم جوباسىنىڭ وسى كۇنى الەمنىڭ 100 ەلىندە قولداۋ تاۋىپ وتىرعانىن جانە جوبانىڭ ونلاين-پەتيتسياسىنا قول قويۋشىلاردىڭ سانى كۇننەن-كۇنگە ءوسىپ وتىرعانىن اتادى.
شارا الدىندا جاپونيا قورىنىڭ عيماراتىندا ك.كۇيىكوۆتىڭ بولەك كورمەسى ءوتتى. توكيوداعى اتوم جوباسىن تانىستىرۋ شاراسى مەن قازاقستاندىق سۋرەتشىنىڭ كورمەسىنە جالپى 2000 ادام قاتىستى.
سونىمەن قاتار, ك.كۇيىكوۆ جاپونيانىڭ ايگىلى كەيو ۋنيۆەرسيتەتى جانىنداعى وقۋ ورىندارى مەن يكۋبۋنكان ينستيتۋتىنىڭ پروفەسسورلىق-وقىتۋشىلار قۇرامى مەن ستۋدەنتتەرى الدىندا ءسوز سويلەدى. جاپوندىق وقۋشىلار مەن ستۋدەنتتەر سەمەي يادرولىق سىناق پوليگونىنىڭ زارداپتارى مەن قازاقستاننىڭ يادرولىق قارۋسىزدانۋ جانە يادرولىق قارۋدى تاراتپاۋ سالاسىنداعى سوڭعى باستامالارىنا ۇلكەن قىزىعۋشىلىق تانىتتى.
اتوم جوباسىن جاپونيادا تانىستىرۋ شاراسى بەلگىلى «Earth Identity Project» ۇكىمەتتىك ەمەس ۇيىمىنىڭ «سۋرەتسىز سۋرەت كىتابى» اتتى ونەر سالاسىنداعى جوباسى اياسىندا ۇيىمداستىرىلدى. اپتا بارىسىندا حيروسيما جانە ناگاساكي قالالارىندا دا شارالار وتكىزىلدى.
ساۋلەبەك ءبىرجان.
