سالتاناتتى ءىس-شاراعا قازاقستان ەلشىسى باۋىرجان مۇحامەتجانوۆ, گرۋزيا سىرتقى ىستەر ءمينيسترىنىڭ ورىنباسارى الەكساندر حۆتيسياشۆيلي, كۆەمو-كارتلي ءوڭىرىنىڭ گۋبەرناتورى شوتا رەحۆياشۆيلي, رۋستاۆي قالاسىنىڭ مەرى يراكلي تاباگۋا, سونداي-اق جەرگىلىكتى قوعامدىق-ساياسي جانە ىسكەرلىك توپتاردىڭ وكىلدەرى قاتىستى.
ءراسىمدى اشقان ب. مۇحامەتجانوۆ گرۋزيانىڭ قىزىقتى ەكونوميكالىق, مادەني, تۋريستىك ايماقتارىنىڭ بىرىندە قازاقستاننىڭ قۇرمەتتى كونسۋلدىعىنىڭ اشىلۋى ەكى ەلدىڭ ءداستۇرلى دوستىق پەن ءوزارا سەنىم رۋحىنداعى ىنتىماقتاستىعىنىڭ دامۋىن ايعاقتايتىنىن اتاپ ءوتتى. تاۋەلسىزدىك جىلدارى ىشىندە ەكى مەملەكەت قارىم-قاتىناستاردىڭ قالىپتاسۋ كەزەڭىنەن ءساتتى ءوتىپ, ۋاعدالاستىقتاردى ناقتى مازمۇنمەن جانە ءوزارا ءىس-قيمىلدىڭ جاڭا باعىتتارىن ىزدەستىرۋمەن تولىقتىرا وتىرىپ, جاڭا ساپالى دەڭگەيگە شىقتى.
رۋستاۆي قالاسىنداعى قازاقستاننىڭ قۇرمەتتى كونسۋلى گەورگي دجاحۋتاشۆيلي ءوز سوزىندە جاڭا كەڭسە ەكى ەل اراسىنداعى ەكونوميكالىق, مادەني, سپورتتىق, ءبىلىم بەرۋ بايلانىستارىن دامىتۋعا تولىق كومەك كورسەتەتىنىنە سەندىردى. ونىڭ ايتۋىنشا, ەلىمىزدىڭ ازاماتتارى مەن زاڭدى تۇلعالارى ءوز قۇقىقتارى مەن مۇددەلەرىن قورعاۋدا, سونداي-اق قيىن جاعدايلارعا تۇسكەن كەزدە, اسىرەسە ورىن الىپ جاتقان COVID-19 پاندەمياسى مەن كارانتيندىك شەكتەۋلەر كەزىندە كومەك الا الادى.
قۇرمەتتى كونسۋلدىق قازىرگى قازاقستانعا قىزىعۋشىلىق تانىتقان گرۋزين ازاماتتارى ءۇشىن جاڭا اقپاراتتىق ورتالىققا اينالۋى ءتيىس.
