جۋىردا بوي كوتەرگەن "يمامدار ءۇيى" ورتالىعىنىڭ جۇمىسىمەن تانىسۋ ماقساتىندا جامبىل وبلىسىندا جۇمىس ساپارىمەن جۇرگەن قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ناۋرىزباي قاجى تاعان ۇلى سورتوبە اۋىلىنا ارنايى باردى. سونىمەن قاتار, اتالعان ورتالىق رەسمي تۇردە اشىلىپ, وعان قمدب توراعاسىمەن بىرگە اتالعان باسقارمانىڭ فاتۋا ءبولىمىنىڭ مەڭگەرۋشىسى سانسىزباي قۇربان ۇلى, وبلىستىق ورتالىق "ھيباتۋللا تارازي" مەشىتىنىڭ باس يمامى بەيبىت مىرزاگەلديەۆ, وبلىستىق ءدىن ىستەرى باسقارماسىنىڭ باسشىسى جانگەلدى وماروۆ جانە وزگە دە ازاماتتار قاتىستى.
"بۇگىنگى اشىلعان "يمامدار ءۇيى" ءدىننىڭ اق جولىن ۋاعىزداۋعا, جاستاردى ادامگەرشىلىك پەن يماندىلىققا تاربيەلەۋگە ءوز ۇلەسىن قوساتىنىنا سەنىمدىمىن. بۇگىندە وسىنداي ورتالىق اشىپ, ءدىنىمىز بەن ءداستۇرىمىزدى ناسيحاتتاۋىمىز – تاۋەلسىزدىگىمىز بەن بىرلىگىمىزدىڭ ارقاسى", دەيدى قورداي اۋدانىنىڭ اكىمى رۇستەم داۋلەت.
جاڭا سالىنعان "يمامدار ۇيىندە" وڭالتۋ, بەيبىتشىلىك پەن كەلىسىم بولمەلەرى جانە وزگە ۇلت وكىلدەرىنە قازاق ءتىلىن ۇيرەتۋ سىنىبى, ءدارىسحانا, كىتاپحانا, مەديتسينالىق پۋنكت جانە ءماجىلىس زالى بار. بۇدان بولەك, اسحانا, جۋىنۋ بولمەلەرىمەن قاتار كەلەتىن مەيماندارعا ارنالعان جاتاقحانا دا قاراستىرىلعان. سوندىقتان دا بۇل تەك ءدىني ورتالىق ەمەس, ءبىلىم الۋعا, پىكىر الماسۋعا ارنالعان ورتالىق بولىپ ەسەپتەلەدى. مۇندا كەلىپ تاعدىر تالكەگىنە تۇسكەن جاندار دا كەڭەس الا الادى. قورداي اۋدانىنىڭ باس يمامى داۋرەن قۇتتىباەۆتىڭ ايتۋىنشا, "يمامدار ءۇيى" كوپشىلىكتىڭ قولداۋىمەن تۇرعىزىلعان ەكەن.
جامبىل وبلىسى
