بەلباسار اۋىلىنداعى ش.ءۋاليحانوۆ اتىنداعى 400 ورىندىق ورتا مەكتەپ جاقىندا عانا "جۇمىسپەن قامتۋدىڭ جول كارتاسى" باعدارلاماسى اياسىندا كۇردەلى جوندەۋدەن وتكەن. نىساننىڭ قۇرىلىسىنا 116 ميلليون تەڭگەدەن استام قاراجات بولىنگەن. ىرگەتاسى 1969 جىلى قالانعان. ال, 6 مىڭعا تارتا ءتۇتىنى بار د.قوناەۆ اۋىلىنداعى تولە بي اتىنداعى ورتا مەكتەپتىڭ كۇردەلى جوندەۋ جۇمىسىنا 450 ميلليون تەڭگە شاماسىندا قارجى قارالىپتى. سول سياقتى, اۋدان ورتالىعى تولە بي اۋىلىنداعى سپورت كەشەنى "اۋىل – ەل بەسىگى» جوباسى بويىنشا بوي كوتەرگەن. ونىڭ قۇرىلىسىنا 300 ميلليون تەڭگەگە جۋىق قاراجات ءبولىنىپ, مەكەمە 40 ماماندى جۇمىسپەن قامتىپ وتىر. سونىمەن قاتار, شۋ اۋداندىق اۋرۋحاناسىندا ەكى ايعا جەتەتىن ءدارى-دارمەك قورى قالىپتاسقان.
مۇندا 7 وتتەگى قوندىرعىسى جەتكىزىلىپ, كومپيۋتەرلىك توموگرافيا تۇرعىندارعا قىزمەت ەتۋدە. ال, 1989 جىلى سالىنعان شۋ قالالىق اۋرۋحاناسىنا جوندەۋ جۇمىستارىن جۇرگىزۋ ءۇشىن سمەتالىق-جوبالىق قۇجاتتارى ازىرلەنۋدە ەكەن. اتالعان نىساندا جاقىندا جەتكىزىلگەن 1 وتتەگى اپپاراتىن قوسقاندا, قازىر 4 قۇرىلعى جۇمىس ىستەپ تۇر. جاڭادان الىنعان كت قوندىرعىسى ارقىلى وسى ۋاقىتقا دەيىن 300-دەن استام تالداۋ جاسالعان. كارانتين رەجىمى كەزىندە 8 ءموبيلدى توپ ەل ىشىندە جۇمىس ىستەگەن. مۇندا ەكى ايلىق مەديتسينالىق بۇيىمدار مەن ءدارى-دارمەك قورى بار.
سونداي-اق العا اۋىلىندا جاڭا مەكتەپ سالىنۋدا. اۋىلداعى امانگەلدى اتىنداعى 300 ورىندىق مەكتەپتىڭ قۇرىلىسىنا مەملەكەت قازىناسىنان 845 ميلليون تەڭگە شاماسىندا قاراجات قارالعان. ءبىلىم وشاعىن جيھازدارمەن تولتىرۋعا دەمەۋشىلەر ايتارلىقتاي ۇلەس قوسقان. ەندى ەكىنشى توقساندا وقۋشىلار جاڭا مەكتەپتە وقيتىن بولادى. ەندى مۇعالىمدەر اتا-انالارمەن بىرلەسە جۇمىس ىستەپ, شۋ قالاسىنا قاتىناپ وقيتىن 150 العالىق وقۋشىنى وسى مەكتەپكە قايتارۋ كەرەكتىگى ءسوز بولدى. ونىڭ ۇستىنە, كەزەككە تىركەلگەن 150 تۇرعىنعا اۋىلدان جەر تەلىمدەرى بەرىلىپتى.
جامبىل وبلىسى
