جوبا باستاماشىسى Sanguis كومپانياسىنىڭ ديرەكتورى قارلىعاش سىدىقوۆا زەرتحانانىڭ الەۋمەتتىك باعىتتا جۇمىس ىستەيتىنىن ايتادى. مەملەكەتتىك تاپسىرىستار قابىلداۋعا دا دايىن كورىنەدى.
– باعالار حالىقتىڭ بارلىق توبى ءۇشىن قولجەتىمدى بولادى. مەملەكەت بىزگە عيمارات بەردى, وندا ءبىز جوندەۋ جۇمىستارىن جۇرگىزدىك, Siemens جانە Beckman Coulter سياقتى الەمدىك وندىرۋشىلەردىڭ زاماناۋي جابدىقتارىن ورناتتىق. ءبىزدىڭ تەحنيكامىز كلينيكالىق زەرتتەۋلەردىڭ بارلىق ءتۇرىن جۇرگىزۋگە مۇمكىندىك بەرەدى, سونداي-اق بىزدە تولىق اۆتوماتتاندىرىلعان پتر زەرتحاناسى بار, – دەيدى ول.
مەملەكەت-جەكەمەنشىك ارىپتەستىگى اياسىندا ىسكە قوسىلعان زەرتحانادا پتر-تەستىلەۋدەن باسقا, Siemens اناليزاتورى ورناتىلعان. ونىڭ ءبىر ەرەكشەلىگى يممۋنوگلوبۋليندەردى G جانە M وقشاۋلاۋ ارقىلى كۆي تالداۋىن جۇرگىزۋگە مۇمكىندىك بەرەدى. ياعني, كوروناۆيرۋس ينفەكتسياسىنا جەدەل تەست جاسالادى.
بۇدان بولەك, قۋاتتىلىعى جىلىنا 800 مىڭ زەرتتەۋ جاساۋعا جەتەتىن جاڭا زەرتحانا داعدىلى يممۋنوفەرمەنتتىك جانە بارلىق كلينيكالىق-دياگنوستيكالىق زەرتتەۋلەر جۇرگىزە الادى.
تاعى ءبىر جاعىمدى جاڭالىق, قاراعاندى وبلىسىنا ءۇش جىلجىمالى مەديتسينالىق كەشەن اكەلىنىپ, ولار اباي, وساكاروۆ جانە جاڭاارقا اۋداندارىنىڭ ورتالىق اۋرۋحانالارىنا بەرىلدى. ىندەتتىڭ ەكىنشى تولقىنىمەن كۇرەسكە دايارلىق اياسىندا ىسكە اسقان بۇل شارۋا الىستاعى اۋىلداردى مەديتسينالىق كومەكپەن قامتۋدىڭ اياسىن كەڭىتە تۇسەرى ءسوزسىز.
قوستانايداعى «سارىارقااۆتوپروم» زاۋىتىندا جاسالعان بۇل كولىكتەردىڭ شاناعى تەرمو, شۋ جانە ءدىرىل وقشاۋلاعىشپەن, سۋ وتكىزبەيتىن ەدەندىك جابىنمەن جابدىقتالعان. ىشىندە قولدى زارارسىزداندىرۋعا ارنالعان ەلەكتر سورعى جانە ديسپەنسەر بار.
جىلجىمالى مەديتسينالىق كەشەن ورناتىلعان ارنايى اۆتوموبيل تسيفرلى جابدىعى بار جالپى قابىلداۋ كابينەتى, تاجىريبە دارىگەرىنىڭ ايماعى, تالداۋلاردى قابىلداۋ ءبولىمى, اكۋشەر-گينەكولوگ, فۋنكتسيونالدىق جانە ساۋلەلىك دياگنوستيكا كابينەتتەرى, ءدارىحانا پۋنكتى سياقتى جەتى كابينەتتەن تۇرادى. سونداي-اق كوشپەلى كەشەندە رەنتگەن جانە فليۋوروگرافيا جاساۋعا بولاتىن قورعاسىن بولمەسى بار. مۇمكىندىگى شەكتەۋلى جانداردىڭ جاعدايى دا ەسكەرىلگەن, مۇندا ولارعا ارنالىپ پاندۋس-ليفت ورناتىلعان.
قاراعاندى وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى گامال توقسامباەۆ بۇل كەشەندەردىڭ دارىگەرلەرگە, اسىرەسە شالعاي ەلدى مەكەندەردەگى ماماندارعا ۇلكەن دەمەۋ بولاتىنىن ايتادى. ياعني, كارانتين ەنگىزىلىپ, سىرتقا شىعۋ شەكتەلگەن جاعدايدا اتالعان ءموبيلدى كەشەندەر جەرگىلىكتى جەرلەردە ءوز بەتىنشە دەربەس جۇمىس ىستەي بەرەدى.
ايتا كەتۋ كەرەك, بۇل ءموبيلدى دياگنوستيكالىق مەديتسينالىق كەشەن كوشپەلى جاعدايدا زەرتتەۋلەردىڭ سان الۋان ءتۇرىن جۇرگىزۋگە مۇمكىندىك بەرەدى. مىسالى, مەديتسينالىق بريگادالار الىستاعى اۋىلدارعا بارىپ, سكرينينگ, تەكسەرۋ جانە كاسىبي تەكسەرۋ جۇرگىزۋدى ىسكە اسىرىپ, سول جەردە قاجەتتى مەديتسينالىق كومەك كورسەتە الادى. ال وبلىس ورتالىعىنان جىراقتا ورنالاسقان ەلدى مەكەندەردەگى اعايىن ءۇشىن مەديتسينالىق كومەكتىڭ مۇنداي ءتۇرى اۋاداي قاجەت.
قاراعاندى وبلىسى
