نەگىزىندە ۇيىمداستىرۋشىلار بارلىق كارانتيندىك تالاپتى قاتاڭ ساقتاي وتىرىپ ونلاين جوبانىڭ جابىلۋ سالتاناتىن وفلاين رەجىمدە وتكىزۋگە شەشىم قابىلداعان ەكەن. وسىلايشا اراقاشىقتىق ساقتالعان, تەك كولىك ىشىندە وتىرىپ تاماشالايتىن ءىس شارا دەپ جوسپارلانعان. الايدا بۇل تالاپ ساقتالمادى.
جۋىردا شىمكەنت قالاسى باس مەملەكەتتىك سانيتارلىق دارىگەرى ءابدىماناپ تۇلەباەۆتىڭ جاڭا قاۋلىسى جاريالاندى. وندا قالاداعى كارانتين مەن شەكتەۋ شارالارى 9 قاراشا ساعات 00:00-گە دەيىن ۇزارتىلعانى جازىلعان. قاۋلىدا «كورمەلەر, ويىن-ساۋىق, سپورتتىق, وتباسىلىق, سالتاناتتى ەستەلىك ءىس-شارالاردى, فورۋمداردى, كونفەرەنتسيالاردى, سەمينارلاردى جانە ادام كوپ جينالاتىن وزگە دە ءىس-شارالاردى قوعامدىق ورىنداردا, ونىڭ ىشىندە ۇيدە وتكىزۋگە تىيىم سالىنسىن», دەپ كورسەتىلگەن.
اتالعان كونتسەرتتىڭ ۆيدەوسى الەۋمەتتىك جەلىدە تارالىسىمىن, ەل-جۇرت توتەنشە جاعداي كەزىندە كارانتين تالاپتارىن ورەسكەل بۇزعان ۇيىمداستىرۋشىلاردى سىنعا الدى. «كارانتين ۋاقىتىندا مىناۋ نە كونتسەرت؟ يپپودرومدا ۇلتتىق سپورتتان وتەتىن تۋرنيرگە رۇقسات بەرمەي, داڭعازا رەپەرلەردى تايراڭداتقاندارىڭ قالاي؟ ۇلتتىق قۇندىلىعىمىز جوعالىپ, ورنىن #uhack باسقان زامان-اي», دەپ جازدى قالا تۇرعىنى ماقسات شاعىرباەۆ.
ەندى ءبىر توپ جاس اتالعان شارانىڭ قالاعا پايداسى مول جوبا ەكەنىن ماقتاپ, حالىقتىڭ مادەنيەتىن سىنعا الدى.
«...قالايشا, سىزدەر, اكىمدىك پەن ۇيىمداستىرۋشىلاردى كىنالاي الاسىزدار؟ ولار جاعىنان بارلىعى جاقسى ۇيىمداستىرىلىپ, جۇرتقا مۇمكىندىك بەرە الدى. بۇل جەردە كىنالى – تەك حالىق مادەنيەتى. جەكە باسىم سول كونتسەرتكە قاتىستىم. كونتسەپتسيا بويىنشا بارلىعى كولىكتەرىندە وتىرىپ, راديولارىن قوسىپ, تىڭداپ وتىرۋلارى قاجەت ەدى. شىمكەنتتىڭ جاستارىن جاماندايىن دەسەم, وزىمە تيەدى. الايدا شىنى كەرەك – جابايىمىز», دەپ اشىندى «U:hack» قاتىسۋشى ەلنۇر دۇيسەنبەكوۆ.
دەيتۇرعانمەن جاستاردىڭ «Uprojects» جوباسىنا شىمكەنت قالاسىنىڭ اكىمى مۇرات ايتەنوۆ تىكەلەي قولداۋ كورسەتىپ, ونلاين شارانىڭ بەينەبايانىنا ءتۇسىپ, ساتتىلىك تىلەگەن ەكەن. سونداي-اق جەكسەنبىدە وتكەن كەشكىلىك دۋمانعا شىمكەنت قالالىق پوليتسيا دەپارتامەنتىنىڭ قىزمەتكەرلەرى, جەدەل جاردەم كولىكتەرى شاقىرتىلعان.
«قالادا جەدەل جاردەم كولىگى جەتىسپەي جاتقان شاقتا قايداعى ءبىر كونتسەرتكە قىزمەتتىك كولىكتى ۇستاپ وتىرۋ قانشالىقتى زاڭدى؟ ال كوشەلەردەگى كەپتەلىستى رەتتەۋى ءتيىس پوليتسيا قىزمەتكەرلەرى بۇل كونتسەرتتە نە ىستەپ ءجۇر؟», دەيدى مەديتسينا سالاسىنىڭ مامانى گۇلدانا تالعاتقىزى.
نەگىزىندە «Uprojects» قوعامدىق بىرلەستىگى كونتسەرت وتكىزۋگە ارنايى رۇقسات الماعان جاعدايدا قۇقىق قورعاۋ قىزمەتكەرلەرى بۇل جيىندى توقتاتار ەدى. بىراق كەشكىلىك دۋمان ۇزاققا سوزىلىپ, قورىتىندىلانعان.
ءبىز وسى ماسەلە بويىنشا قالالىق پوليتسيا دەپارتامەنتىنىڭ وكىلدەرىنە حابارلاسقان ەدىك.
«حالىق اراسىندا كوروناۆيرۋس ينفەكتسياسىنىڭ تارالۋىنا جول بەرمەۋ ماقساتىندا شىمكەنت قالاسى باس مەملەكەتتىك سانيتارلىق دارىگەرىنىڭ №41 قاۋلىسىنا سايكەس كارانتيندىك رەجىم ۇزارتىلعان. الايدا كورسەتىلگەن شەكتەۋلەرگە قاراماستان, كارانتين تالاپتارىن ورەسكەل بۇزىپ, 2020 جىلدىڭ 1 قاراشاسىندا بايدىبەك بي داڭعىلى بويىندا ورنالاسقان «ناۋرىز» الاڭىندا «Uprojects» قوعامدىق بىرلەستىگى «U:hack» فەستيۆالىن ساقتىق شارالارىن ەسكەرۋسىز ۇيىمداستىرىپ, ازاماتتاردىڭ اۆتوكولىكتەرىنەن شىعىپ, الاڭعا جينالۋىنا جول بەرگەن. وسىعان بايلانىستى اتالعان ۇيىمنىڭ باسشىسىنا اقبتك-ءنىڭ 425 بابىمەن شارا قولدانۋ ءۇشىن جيناقتالعان قۇجاتتار ءال-فارابي اۋدانى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ باسقارماسىنا جولداندى», دەيدى شىمكەنت قالالىق پوليتسيا دەپارتامەنتىنىڭ ءباسپاسوز حاتشىسى رابيعا ءجۇنىس.
كوپ ۇزاماي «Uprojects» قوعامدىق بىرلەستىگىنىڭ جەتەكشىسى توقتار الىمبەكوۆ ءوزىنىڭ الەۋمەتتىك جەلىدەگى پاراقشاسىندا جوبا قورىتىندىسى بويىنشا ويىمەن ءبولىستى.
«بارلىق كارانتيندىك شارالاردى قاتاڭ ساقتاي وتىرىپ جابىلۋ سالتاناتىن وفلاين رەجىمدە وتكىزۋگە شەشىم قابىلدادىق. ءبىزدىڭ كوماندا قوناقتارعا قازىرگى كەزدە الەمنىڭ بارلىق دەرلىك استانالارىندا قاتاڭ ەرەجەلەرمەن وتكىزىلەتىن, ادامدار اراسىنداعى بايلانىستى ازايتا وتىرىپ, ماراپاتتاۋ ءراسىمىن اۆتوموبيل كينوتەاترى ستيلىندە وتكىزۋ ارقىلى بارلىق قولايلى جاعدايلاردى جاساۋعا تىرىستى. الايدا ءىس-شارا سوڭىنا تاياعان ساتتە ازداعان ادام مۋزىكالىق كەشتىڭ اتموسفەراسىنا, ىشتەگى ەموتسياعا بەرىلىپ, كولىكتەرىنەن ەرىكسىز شىعىپ كەتتى. ءبىز بىردەن تەكسەرىپ توقتاتا المادىق. سول ءۇشىن ايىپپۇل تولەپ تە ۇلگەردىك», دەدى ول.
وكىنىشتىسى, جاز باسىندا جەرگىلىكتى بيلىكتىڭ سالعىرتتىعىنان توتەنشە جاعداي كەزىندە قانشاما تۇرعىن جاقىندارىنان ايىرىلدى. وسىعان بايلانىستى پرەزيدەنت قاسىم-جومارت توقاەۆ قالا اكىمى مۇرات ايتەنوۆكە سوگىس جاريالاعان ەدى. ال ەندى وسىنداي كوپشىلىك شارالارعا قالا اكىمدىگى دەر كەزىندە تىيىم سالماسا, باس سانيتاردىڭ قاۋلىسىنا قۇلاق اسپاسا, ماسەلەنىڭ سوڭى ۋشىعىپ كەتپەسىنە كىم كەپىل؟
ازىرگە ەلدە توي تويلايتىن ەمەس, ءومىردى قالاي ساقتاپ قالۋ تۋرالى ويلاناتىن كەزەڭ. سەبەبى بۇگىن توپتاسىپ كونتسەرتكە قاتىسقان جۇرتتىڭ بارلىعى تەست سىناعىنان وتكەنىنە ەشكىم جاۋاپ بەرە المايدى. سوندىقتان كەز كەلگەن تۇرعىن ساقتىق شارالارىن بارىنشا كۇشەيتىپ, ۇيدە بولۋى كەرەك.
شىمكەنت
