– تەكسەرۋشىلەر «اقجول», Castle, Sultan Hall مەيرامحانالارىندا ۇيلەنۋ جانە مەرەيتويلار وتكىزۋ دەرەكتەرىن تىركەدى. ال «مۇراگەر» ساۋدا ۇيىندە ماسكا تاعۋ رەجىمى ساقتالمايدى. مۇندا تەرمومەتريا جوق بولىپ شىقتى. ساتپاەۆ كوشەسىندەگى «فۋدزي» سۋشي بارىندا قىزمەتكەرلەر ماسكاسىز جانە قولعاپسىز قىزمەت كورسەتەدى. «بارماگلوت» بارىندا 30-دان اسا كەلۋشى ساعات 22:00-دەن كەيىن دە بولعان. جۇمىسكەر كەنتىندەگى «گۇلدياس» دۇكەنى ساعات 23:00-دەن كەيىن قىزمەت كورسەتىپ, شەكتەۋ شارالارى رەجىمىن بۇزعان, – دەپ حابارلادى وڭىرلىك كوممۋنيكاتسيالار قىزمەتى.
تۇرعىنداردىڭ مەيرامحانالاردا توي وتكىزۋىنە كىم مۇددەلى دەيسىز؟ الدىمەن بۇعان مەيرامحاناسى بار كاسىپكەرلەر مۇددەلىلىك تانىتارى داۋسىز. مۇنى ولار جاقىندا اشىق ءمالىم ەتتى. مەيرامحانا بيزنەسىمەن اينالىساتىن ءبىر توپ كاسىپكەر وبلىستىق اكىمدىكتىڭ الدىنا جينالىپ, وزدەرىنىڭ تالابىن جاريا ەتتى. بۇل قانداي تالاپ؟
ناقتىسىن ايتقاندا, كاسىپكەرلەر بىرىنشىدەن, سانيتارلىق تالاپتاردى ساقتاي وتىرىپ, 50 ادامعا دەيىن قاتىساتىن توي جاساۋعا رۇقسات بەرۋدى سۇرايدى. ەكىنشىدەن, تويحانانىڭ كوممۋنالدىق تولەمىن تولەۋگە اكىمدىكتىڭ كومەك كورسەتكەنىن قالايدى. تويحانا يەلەرىمەن كەزدەسكەن وبلىس اكىمىنىڭ ورىنباسارى ەرجان ءابىلحانوۆتىڭ ايتۋىنشا, قازىر كوپتەگەن ەلدە كوروناۆيرۋستىڭ ەكىنشى تولقىنى ءوتىپ جاتىر. ال مەملەكەت پەن وبلىستىق اكىمدىك تاراپىنان وتاندىق بيزنەستى قولداۋعا كوڭىل بولىنۋدە.
– الايدا ءار ازاماتتىڭ دەنساۋلىعى مەن قاۋىپسىزدىگى ماڭىزدى ەكەنىن ۇمىتپاۋ كەرەك. قاۋىپتى ىندەتتىڭ قاتەرى ەسكەرىلىپ, وڭىردەگى شاعىن جانە ورتا كاسىپكەرلىك نىساندارى ءۇشىن بىرتىندەپ جەڭىلدەتۋ شارالارى قولعا الىنۋدا. تويحانالار مەن بانكەت زالدارىنا 50 ادامعا دەيىن قاتىساتىن شارالاردى وتكىزۋگە رۇقسات بەرۋ ماسەلەسى قاراستىرىلىپ جاتىر, – دەدى ەرجان ءابىلحانوۆ.
ال وبلىستىڭ باس مەملەكەتتىك سانيتارلىق دارىگەرىنىڭ ۋاقىتشا مىندەتىن اتقارۋشى امانتاي جۇماعاليەۆتىڭ ايتۋىنشا, قاۋىپتى ىندەتتى جۇقتىرۋ دەرەگى ءالى دە تىركەلىپ جاتقاندا ادامدار شوعىرلاناتىن مۇنداي توي-تومالاق وتكىزۋدىڭ قاۋپى باسىم بولادى. سول سەبەپتەن قاۋىپتى ىندەتتىڭ تارالۋ مۇمكىندىگى سەكىلدى ماسەلەنىڭ ەكىنشى جاعىنا كوڭىل اۋدارۋ كەرەك.
– كەزدەسۋدە ايتىلعان ماسەلەنىڭ ءبارىن حاتتاماعا تۇسىردىك. سوعان سايكەس ماسەلەنى وڭ شەشۋ جولدارىن قاراستىرامىز. ارينە, بۇل – ءبىر كۇندە شەشىلەتىن ماسەلە ەمەس. بۇرىن تويحانا يەلەرى عيماراتتىڭ جارىعىنا تولەم تولەپ وتىرسا, ەندى جىلىتۋ ماۋسىمى باستالدى. ولار تولەمدەرى كوبەيگەنىن ايتىپ وتىر. سوندىقتان كاسىپكەرلەردىڭ ۇسىنىسىن ەسكەرىپ, كارانتين كەزىندەگى تالاپتاردى ساقتاي وتىرىپ, ەكى جاققا دا ءتيىمدى تۇسىن قاراستىرامىز, – دەيدى وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسى باسشىسىنىڭ مىندەتىن ۋاقىتشا اتقارۋشى ءابدۋاحيت ابىشەۆ.
راس, بىرنەشە ايلاپ, كاسىپسىز, تابىسسىز وتىرۋ وڭاي ەمەس. دەگەنمەن, مەيرامحاناعا بىرنەشە ادامدى توپىرلاتىپ كىرگىزىپ, توي وتكىزۋدەن تۇسكەن تابىس تابۋ قىمبات پا؟ الدە اينالاڭداعى ادامداردىڭ, اعايىن-تۋىستىڭ دەنساۋلىعى قىمبات پا؟ تەگىندە جاقىنىڭا جاناشىر بولۋدى قالاي تۇسىنەسىز؟
اتىراۋ وبلىسى
