ونلاين فورماتتا وتكەن چەمپيوناتتىڭ جابىلۋ سالتاناتىندا شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان جەڭىمپازداردى قۇتتىقتادى.
"مەملەكەتتىڭ تۇراقتى دامۋىنىڭ نەگىزى – باسەكەگە قابىلەتتى جاستار. مەملەكەتتىك باعدارلامالار جاستاردى جۇمىسپەن قامتىپ قانا قويماي, بىلىكتىلىگىن ارتتىرۋعا, جاڭا ماماندىقتاردى يگەرۋگە, وسى زامانعى تەحنيكا قۇرالدارىن شەبەر مەڭگەرۋىنە بارىنشا جاعداي جاساپ وتىر. ەلىمىزدە WorldSkills قوزعالىسىن دامىتۋعا ەرەكشە ءمان بەرىلۋدە. ايماقتىق كەزەڭدە توپ جارعاندار الدا رەسپۋبليكالىق, حالىقارالىق سىنداردا دا ابىروي بيىگىنەن كورىنەتىنىنە سەنىم زور", – دەدى شىڭعىس جۇمابەك ۇلى.
"WorldSkills Shymkent-2020" ۇلتتىق چەمپيوناتتىڭ ايماقتىق كەزەڭىنە 30 قۇزىرەتتىلىك بويىنشا 92 ۇمىتكەر قاتىسىپ, باق سىنادى. اتاپ ايتقاندا, جەڭىل ونەركاسىپ جانە سەرۆيس كوللەدجى, م.وتەباەۆ اتىنداعى جوعارى جاڭا تەحنولوگيالار كوللەدجى, پوليتەحنيكالىق كوللەدج, جول-كولىك كوللەدجى, ءا.قاستەەۆ اتىنداعى ونەر جانە ديزاين كوللەدجى شاكىرتتەرى ۇزدىك ناتيجە كورسەتىپ, 1 دارەجەلى ديپلوم يەگەرى اتاندى.
جەڭىمپازدارعا 70 مىڭ, جۇلدەلى ءىى ورىن يەگەرلەرىنە 50 مىڭ, ءىىى ورىن يەگەرلەرىنە 25 مىڭ تەڭگە كولەمىندە سەرتيفيكاتتار مەن ديپلومدار تابىس ەتىلدى.
