«كورىپ تۇرعانىمىزداي, وسى كۇنى بۇل تاقىرىپ وزەكتى بولىپ تۇر. ءبىز – ادام مەن تابيعات اراسىنداعى ۇندەستىكتى تابۋعا ۇمتىلامىز. تامىرى تەرەڭ بويلاعان جەلتوراڭعى اعاشىنىڭ ءوزى تاباندىلىق پەن كۇش-قۋاتتىڭ بەينەسىندەي. ول ءتۇرلى قيىندىقتارعا توتەپ بەرىپ كەلەدى. وسى قاسيەت ءبىزدىڭ حالقىمىزعا دا ءتان: تالاي قيىن-قىستاۋ كەزەڭدى باسىنان وتكەرگەن ەلىمىز كۇش جيناپ, العا قاراي ۇمتىلىپ كەلەدى», – دەيدى حورەوگراف انۆارا سادىقوۆا.
بالەت ليبرەتتوسىن ايگىلى اقىن باقىت قايىربەكوۆ جازعان. سپەكتاكلدىڭ ءار كورىنىسى فيلوسوفيالىق مازمۇنعا يە, ال, بەينەلەردىڭ ىشكى تەرەڭدىگى مەن سىرتقى سۇلۋلىعى ايقىن.
«بالەتتى شىعارۋىما قۋات شىلدەباەۆتىڭ «توراڭعى مۇڭى» اتتى عاجايىپ تۋىندىسى تۇرتكى بولدى. كومپوزيتوردىڭ مۋزىكالىق شىعارمالارى بەلگىلى ءبىر وي مەن يدەياعا جەتەلەپ, ءتۇرلى كۇيگە بولەيدى. مۇندا مۇڭ, زار مەن ساعىنىش بولعانىمەن, بارشامىز قول ۇزبەۋىمىز ءتيىس ءۇمىت ساۋلەسى دە بار… ءبىز ءار بەينەنى قازاق مۋزىكالىق اسپاپتارىنىڭ تەرەڭ مازمۇندى اۋەزىن سۋرەتتەيتىن پلاستيكالىق تىلمەن سيپاتتاۋعا تىرىستىق. مىسالى, قوبىز. ونىڭ سارىنى جەلدىڭ كۇشىمەن دالانى كەزەدى», – دەپ اتاپ ءوتتى انۆارا سادىقوۆا.
بالەتمەيستەردىڭ ايتۋىنشا, بالەتتىڭ حورەوگرافياسى كلاسسيكالىق بي مەن قازاق ءبيىنىڭ ۇيلەسىمدىلىگىنەن قۇرالعان. ۇلتتىق حورەوگرافيانىڭ ءستيلى بالەت سپەكتاكلىنىڭ ءتۇرلى بەينەلەرىن سۋرەتتەۋدە كەڭىنەن قولدانىلدى.
«انۆارانىڭ حورەوگرافيالىق تۋىندىلارىندا قازاق ۇلتتىق حورەوگرافياسىنىڭ زاماناۋي فورماسى, زاماناۋي سيپاتى ەسىپ تۇرادى. ونىڭ كوتەرگەن يدەيالارى, تاڭداعان تاقىرىپتارى ادامزاتقا ورتاق بولعاندىقتان, كورەرمەندەر مەن بيشىلەرگە دە ەرەكشە اسەر ەتەدى. رەپەتيتسيا زالىندا انۆارا ەلگەزەك ءارى وتە زەردەلى. ول ارتىستەرمەن بىرگە شىعارماشىلىق جاساۋعا اشىق», - دەپ اتاپ ءوتتى, جەتەكشى سوليست ديلارا شوماەۆا.
بالەتتى كورەرمەننىڭ قابىلداۋىندا سپەكتاكلدىڭ كوركەمدىك بەزەندىرىلۋى دە ايتارلىقتاي ماڭىزعا يە: دەكوراتسيا, كوستيۋمدەر, جارىق – وسىنىڭ ءبارى «استانا بالەت» تەاترى شەبەرلەرىنىڭ كۇشىمەن جاسالادى. كوستيۋم سۋرەتشىسى ناتاليا پروتاسوۆانىڭ ايتۋىنشا, كوستيۋمدەردى جاساعاندا ول شىنايى تابيعي بەينەلەرگە كوڭىل اۋدارىپ, توراڭعى توعايلارىنداعى اعاشتار مەن قۇستاردىڭ كەلبەتىن بالەت كوستيۋمدەرىنە يكەمدەگەن.
«ادام بالاسى نە ىستەسەم دە ءوز ەركىم, دەپ ويلايدى. بىراق, بۇل قاتە. وسى ەكى الەم اراسىنداعى قاقتىعىستى كورسەتۋ ءۇشىن, مەن وتىنشىلارعا قازىرگى زامانعى كيىم كيگىزدىم: دجينسى, فۋتبولكا, باتەڭكە. تابيعات اياسىندا ولاردىڭ بەينەلەرى تۇرپايى بولىپ شىقتى, ناعىز باسقىنشىلاردىڭ بەينەسىندەي», - دەيدى ناتاليا پروتاسوۆا.
سپەكتاكل دەكوراتسيالارىنىڭ جوباسىن جاندوس وماروۆ جاسادى: «سپەكتاكل بەزەندىرۋىنىڭ باسىم بولىگى جۇمساق دەكوراتسيا. سونىڭ ارقاسىندا ءبىز قوڭىر كۇزدەگى ناعىز توراڭعى توعايىنىڭ ءوزىن جاساپ شىقتىق. جالپى سانى وتىز مىڭنان استام ءاربىر جاپىراقتى ءبىز ارنايى ماتادان جاسادىق. اۋەلى ونى ارنايى توقىما بوياۋىنا مالىپ, قايناتىپ, سوسىن كەپتىردىك. سودان كەيىن, ءاربىر قاجەت زاتتى قولمەن كەسىپ دايىندادىق. مۇنىڭ ءبارى دەكوراتسيانىڭ كولەمدى ءارى شىنايى اسەر قالدىرۋى ءۇشىن جاسالادى».
«استانا بالەت» تەاترىن قۇرعان كەزدە, ۇجىم الدىنا قويىلعان ماقساتتىڭ ءبىرى – ۇلتتىق حورەوگرافيانى ناسيحاتتاپ, تىڭ ۇلتتىق بالەتتەر شىعارۋ ەدى. بۇل مىندەتىن تەاتر ءساتتى اتقارىپ كەلەدى: ونىڭ رەپەرتۋارىندا ءۇش ۇلتتىق بالەت, « ۇلى دالا مۇراسى» باعدارلاماسى بار. ال, 6 جانە 7 قاراشادا كورەرمەن نازارىنا «جەلتوراڭعى تۋرالى اڭىز» اتتى جاڭا بالەت ۇسىنىلادى.
سپەكتاكلدەردىڭ باستالۋى: 6-قاراشا, ساعات 19:30. 7-قاراشا, ساعات 18:00.
