قمدب توراعاسىن ايماق باسشىسى بەردىبەك ساپارباەۆ قابىلدادى. كەزدەسۋ بارىسىندا ءدىننىڭ ۇلتارالىق كەلىسىمدى نىعايتۋداعى ءرولى تۋرالى جان-جاقتى قاۋزالدى.
- ءبىز ورتاق كۇش-جىگەرىمىزدىڭ ارقاسىندا قوعامداعى كەلىسىم مەن تىنىشتىقتى ساقتاي الىپ وتىرمىز. ءبىز بىرلىك, توزىمدىلىك جانە مەيىرىمدىلىك قاعيداتتارىن نەگىزگە الا وتىرىپ, بارلىق قيىندىقتاردى ەڭسەرەتىنىمىزگە سەنىمدىمىن. حالىقتىڭ رۋحاني تۇتاستىعىن نىعايتۋعا, الەۋمەتتىك ماسەلەلەردى شەشۋگە قمدب-نىڭ وڭىردەگى فيليالى دا ايرىقشا اتسالىسۋدا. بىرلەسكەن جۇمىستار ناتيجەسىندە قورداي اۋدانىنداعى احۋالدى تۇراقتاندىرۋ مۇمكىندىگىنە قول جەتكىزدىك. يمامداردىڭ روتاتسيالانىپ, قازىرگى تاڭدا مەشىتتەردە ۋاعىزدار قازاق تىلىندە جۇرگىزىلۋدە, - دەدى بەردىبەك ساپارباەۆ.
ول «بەيبىتشىلىك پەن كەلىسىم» جوباسىنىڭ ىسكە اسىرۋ بارىسى تۋرالى توقتالىپ, ونىڭ نەگىزىندە اۋداندارداعى قوعامدىق-ساياسي احۋالعا مونيتورينگ جۇرگىزىلىپ جاتقانىن جەتكىزدى.
ەلىمىزدىڭ باس ءمۇفتيى قورداي اۋدانىندا "يمامدار ءۇيى" اشىلاتىنىن حابارلادى. جاڭا ورتالىقتا ءدىن قىزمەتكەرلەرى ءۇشىن بىلىكتىلىكتى ارتتىرۋ كۋرستارى ۇيىمداستىرىلاتىن بولادى. بۇل كۇنى بەردىبەك ساپارباەۆ پەن ناۋرىزباي قاجى وتپەنوۆ "ھيباتۋللا تارازي" مەدرەسە-كوللەدجى جاتاقحاناسىنىڭ اشىلۋ سالتاناتىنا قاتىستى. ولار جاڭا عيماراتتى ارالاپ تانىسىپ, ونداعى وقۋ جانە تىنىعۋ ءۇشىن بارلىق قولايلى جاعداي جاسالعانىن اتاپ ءوتتى. ەكى قاباتتى عيماراتتا بارلىعى 12 جاتىن بولمە, ەكى وقۋ كابينەتى, كىتاپحانا, اسحانا, كىر جۋاتىن, جۋىناتىن بولمەلەر جانە مونشا ورنالاسقان. جاتاقحانا دەمەۋشىلىك قاراجات ەسەبىنەن بوي كوتەرگەن.
بۇگىندە مەدرەسە-كوللەدجدە 61 ستۋدەنت وقيدى دەسەك, ولاردىڭ اراسىندا ەلىمىزدىڭ باسقا وڭىرلەرىنەن كەلىپ ءبىلىم الىپ جاتقاندار دا بار. بۇگىنگى كۇنگە دەيىن ولار مەدرەسە عيماراتىندا تۇرىپ كەلگەن.
وبلىس جۇرتشىلىعى مەن مۇسىلمان قاۋىمىنىڭ وكىلدەرى الدىندا قۇتتىقتاۋ ءسوز سويلەگەن ايماق باسشىسى 30 جىل بويى قمدب جاستاردى تولەرانتتىلىق نەگىزىندە تاربيەلەۋگە, قازاق حالقىنىڭ سالت-داستۇرلەرىن قۇرمەتتەۋگە ەرەكشە كوڭىل ءبولىپ كەلە جاتقانىن اتاپ ءوتتى. ەلىمىزدە ءدىني ءبىلىم الۋشىلار ءۇشىن بارلىق جاعداي جاسالعان.
- وتكەن جىلى يمامدار جاماعاتقا ەلىمىزدىڭ مۇسىلماندارىنىڭ رۋحاني تۇعىرناماسىنا اينالعان "جەتى رۋحاني قازىق" قۇجاتىن ۇسىندى. ول ەڭبەكسۇيگىشتىك, مەيىرىمدىلىك, پاتريوتيزم سياقتى ادامگەرشىلىككە ۇندەيتىن قۇندىلىقتارعا باعىتتالعان. ءدىني قىزمەتكەرلەر جاستارعا وسى قۇندىلىقتاردىڭ ماعىناسىن, كونفەسسياارالىق ديالوگ نەگىزدەرىن تۇسىنۋگە باۋليدى. قوعامداعى تۇراقتىلىق پەن تىنىشتىقتى قامتاماسىز ەتۋ ارقىلى عانا ءبىز حالىقتىڭ ءال-اۋقاتىن ارتتىرۋعا مۇمكىندىگىنە قول جەتكىزە الامىز, - دەدى وبلىس اكىمى.
ناۋرىزباي قاجى وتپەنوۆ بۇگىندە جوعالعان داستۇرلەر قايتا جاڭعىرىپ, مەشىتتەر بوي كوتەرىپ, مەدرەسەلەر اشىلىپ جاتقانىن تىلگە تيەك ەتتى.
وبلىس اكىمى مەن ەلىمىزدىڭ باس ءمۇفتيى "ھيباتۋللا تارازي" وبلىستىق مەشىتىندە "Asyldin" ستۋدياسىنىڭ, "اجەلەر مەكتەبى" كلۋبىنىڭ جۇمىسىمەن تانىستى.
ءتورايىمى ءجاميلا جۇماباەۆانىڭ ايتۋىنشا, كلۋب ءتۇرلى ۇلت وكىلدەرىنەن قۇرالعان. اجەلەر جاس قىزداردى حالىقتىق داستۇرلەرگە باۋلىپ, باقىتتى ءومىردىڭ قۇپياسىمەن ءبولىسىپ, دۇرىس جولعا تاربيەلەيدى.
- قازاقتار ءتىپتى «اناڭدى ءۇش رەت مەككەگە ارقالاپ اپارساڭ دا, قارىزىڭنان قۇتىلمايسىڭ» دەيدى. سىزدەردىڭ ومىرلىك تاجىريبەلەرىڭىز جاس ۇرپاق ءۇشىن باعا جەتپەس ونەگەگە تولى. سىزدەر ومىردە شاتاسىپ, جازا باسىپ جۇرگەن قىزدارعا قول ۇشىن سوزا الاسىزدار, - دەدى وبلىس اكىمى اجەلەرگە.
ناۋرىزباي قاجى وتپەنوۆ ولارعا وتباسى ينستيتۋتىن دامىتۋعا قوسقان ۇلەستەرى ءۇشىن العىس ءبىلدىردى.
ايتا كەتۋ كەرەك, بۇگىندە وبلىستا 358 ءدىني بىرلەستىك تىركەلگەن دەسەك, ونىڭ ىشىندە 312 مەشىت پەن 46 شىركەۋ بار. التى وبلىستىق, جەتى قالالىق جانە 10 اۋداندىق اقپاراتتىق-ءتۇسىندىرۋ توپتارىنىڭ قۇرامىنداعى تەولوگتار, ءدىنتانۋشىلار, پسيحولوگ جانە مەملەكەتتىك قىزمەتكەرلەر ءتيىستى جۇمىستار جۇرگىزۋدە.
