ەستەرىڭىزگە سالا كەتەيىك, تامىز ايىنىڭ سوڭىندا ەلىمىزدە تۇڭعىش رەت فورسايت زەرتتەۋلەر ءوتىپ, قازاقستاننىڭ كوشباسشى ساراپشىلارى بولاشاق قازاقستاندىقتىڭ بەينەسىن قالىپتاستىرۋ, ينكليۋزيۆتى قوعام مەن ينكليۋزيۆتى دۇنيەتانىمدى قالىپتاستىرۋ جانە قازاقستاننىڭ حالىقارالىق ارەناداعى ورنى دەگەن ءۇش تاقىرىپتا وتكەننىڭ, بۇگىننىڭ جانە ەرتەڭنىڭ باستى ترەندتەرىن سارالاپ, اتالمىش سالالار بويىنشا 2035 جىلعا دەيىنگى پورترەتتى تالقىلاعان بولاتىن.
جالپى, ايتا كەتۋ كەرەك, زەرتتەۋ جۇمىستارى 9 اي بويى Rapid Foresight (جىلدام فورسايت) ادىستەمەسى بويىنشا بولاشاقتاعى قازاقستاندىقتىڭ بەينەسىن جاساۋ جانە 2035 جىلى الەمدىك قوعامداستىقتا قازاقستاننىڭ ورنىن انىقتاۋ ماقساتىندا وسى سالاداعى جەرگىلىكتى جانە شەتەلدىك ساراپشىلاردى تارتا وتىرىپ جۇرگىزىلدى. سونىڭ ناتيجەسىندە ۇسىنىستاردىڭ بارلىعى ءتۇزىلىپ, الداعى 15 جىلدىقتىڭ ستسەناريى جاسالدى.
وسىعان وراي "رۋحاني جاڭعىرۋ" قازاقستاندىق قوعامدىق دامۋ ينستيتۋتىندا فورسايتتىق زەرتتەۋ ناتيجەلەرى بويىنشا ونلاين-كونفەرەنتسيا ءوتتى. وعان مەملەكەتتىك ورگانداردىڭ, جەرگىلىكتى اتقارۋشى ورگانداردىڭ, عىلىمي-ساراپشىلىق قوعامداستىقتىڭ وكىلدەرى جانە ۇكىمەتتىك ەمەس ۇيىمداردىڭ كوشباسشىلارى قاتىستى.
"رۋحاني جاڭعىرۋ" قازاقستاندىق دامۋ قوعامى ينستيتۋتىنىڭ باسقارما توراعاسى دانيار ەسين اتاپ وتكەندەي, "ەۋرازيالىق كەڭىستىكتەگى تۇراقتى دامۋعا باعىتتالعان ۇلى دالا وركەنيەتى 2035 جىلعى قازاقستاننىڭ حالىقارالىق ارەناداعى بەينەسى بولا الادى".
ديالوگ الاڭى اياسىندا كونفەرەنتسياعا قاتىسۋشىلار ادامدارعا جاھاندىق اۋقىمدا اسەر ەتەتىن بىرقاتار مەگاترەندتەردى تالقىلادى. رەسەيلىك ساراپشى, "جاڭا كاسىپتەر اتلاسى" جوباسى جەتەكشىسىنىڭ ورىنباسارى ەۆگەني ۆينوگرادوۆتىڭ ايتۋىنشا الداعى ۋاقىتتا قوعامدىق وزگەرىستەرگە تەز بەيىمدەلە الاتىن ادامداردىڭ ءداۋىرى جۇرەدى.
"وزگەرىستەر جىلدامدىعى, جاڭا تەحنولوگيالىق شەشىمدەردىڭ پايدا بولۋى, جاھاندانۋ كەزەڭى بۇگىندە الەمنىڭ جاڭا كەلبەتىن قالىپتاستىرىپ جاتىر. ياعني, بۇگىنگى جانە ەرتەڭگى ترەندتەر وزگەرىستەرگە جىلدام بەيىمدەلە الاتىن جاڭا تيپتەگى ادامدارلى قالىپتاستىرادى", – دەدى ەۆگەني ۆينوگرادوۆ.
ساراپشىلار بولاشاق جاس قازاقستاندىقتىڭ بىرقاتار ماڭىزدى قاسيەتتەرىن اتاپ ءوتتى. بىرىنشىدەن, ول كەز كەلگەن جاعدايدا ءومىر ءسۇرۋدى جانە ارەكەت ەتۋدى بىلەدى, ءوزىن وزگەرتۋگە ءاردايىم دايىن. ەكىنشىدەن, تسيفرلىق نومادتىڭ ءوز جەكە ءوسۋ باعدارلاماسى بار. الەمنىڭ كەز كەلگەن ترەندتتەرىن سىڭىرۋگە قابىلەتتى جانە جاھاندىق دەڭگەيدە ويلاي الادى. ۇشىنشىدەن, جاڭا بۋىنداعى قازاقستاندىق قىزمەتتىڭ بارلىق سالاسىندا ساندىق جۇيەنى پايدالانا الاتىن "كيبەر-"ادام". تورتىنشىدەن, بولاشاقتا قازاقستاندىق ءپوزيتيۆتى كوممۋنيكاتسيا مەن پسيحيكالىق تۇراقتىلىق داعدىلارىنا يە بولۋى ءتيىس.
كونفەرەنتسياعا قاتىسقان سكانديناۆيالىق اكادەميالىق موبيلدىلىك ينستيتۋتىنىڭ جەتەكشىسى ەلينا ۆانحەمپينگتىڭ ايتۋىنشا بۇگىندە حالىقتىڭ الەۋمەتتىك جاعدايىن جاقسارتۋ ءۇشىن تسيفرلىك جۇيە مەن ونلاين فورماتتاعى جۇمىستاردى دامىتۋ دامىتۋ قاجەت. ال ءوز كەزەگىندە "BTS Education" جشس باسشىسى ساياسات نۇربەك بولاشاقتىڭ ءومىرىن انىقتاۋ ماقساتىندا فورسايت زەرتتەۋلەردى تۇراقتى تۇردە جۇرگىزىپ وتىرعان دۇرىس دەيدى.
"فورسايتتىق زەرتتەۋلەردى تۇراقتى تۇردە جۇرگىزۋ وتىرۋ قاجەت. ويتكەنى ولار بولاشاقتى انىقتاۋعا, جاقسى ەتۋگە جانە سول ماقساتتا جاڭا شەشىمدەر تابۋعا مۇمكىندىك بەرەدى", - دەدى ساياسات نۇربەك.
