سىيىمدىلىعى 70 جولاۋشىعا ارنالعان «Yutong» ماركالى كولىك ەكولوگيالىق تازا ديزەل وتىنىمەن جۇرەدى. ەۋرو-5 ستاندارتتارىنا سايكەس كەلەتىن گاز قوزعالتقىشتارىمەن جابدىقتالىپ, مۇمكىندىگى شەكتەۋلى جاندارعا ىڭعايلى بولۋ ءۇشىن تومەن ەدەندى ەتىپ قۇراستىرىلىپ, ارنايى كوتەرگىش قۇرالى ورناتىلعان. جاڭا قوعامدىق كولىكتەردە قاۋىپسىزدىك شاراسى دا قاراستىرىلعان. ياعني كولىك بەينەباقىلاۋمەن جابدىقتالعان. جازدا تۇرعىندارعا ىڭعايلى بولۋ ءۇشىن سالقىنداتقىش قويىلعان جانە الداعى ۋاقىتتا GPS قوندىرعىسى قويىلماق.
وبلىس اكىمى سەرىكباي ترۇموۆ قالا حالقىن قۋانىشتى ساتپەن قۇتتىقتاپ, جاڭا قوعامدىق كولىكتەر اقتاۋلىقتاردىڭ ءومىر ءسۇرۋ ساپاسىن جاقسارتۋعا باعىتتالعان ماڭىزدى قادام ەكەنىن اتاپ ءوتتى.
«وڭىردە قوعامدىق كولىك ماسەلەسىن شەشۋ ماقساتىندا «كاسپي» اكك ۇك» اق باستاماسىمەن 2018 جىلى «اقتاۋ قالاسى اۆتوبۋس پاركىن جاڭارتۋ» باعدارلاماسى جاساقتالدى. سونداي-اق بۇل Nur Otan پارتياسىنىڭ سايلاۋ الدىنداعى باعدارلاماسىنا دا ەنگىزىلگەن. مەملەكەت باسشىسى قاسىم-جومارت توقاەۆ جىل باسىندا ۇكىمەتتىڭ كەڭەيتىلگەن وتىرىسىندا جولاۋشىلار تاسىمالى مەن ولاردى سۋبسيديالاۋ ماسەلەسىن جۇيەلى تۇردە شەشۋدى تاپسىرعان بولاتىن. مىنە, بۇگىن اقتاۋ قالاسىنا ەلىمىزدە قۇراستىرىلعان وتاندىق ءونىم قالا تۇرعىندارىن تاسىمالدايتىن بولادى», دەدى سەرىكباي ترۇموۆ.
اۆتوبۋستاردىڭ جالپى قۇنى 721,8 ملن تەڭگە, ونىڭ 30%-دىق العاشقى جارناسى مەملەكەت تاراپىنان تولەندى, ال قالعان 70%-ى «قازاقستان دامۋ بانكى» اق-نىڭ ليزينگتىك باعدارلاماسى ارقىلى تولەنەدى.
بۇدان كەيىن كولىك تابىستاۋ شاراسى دەنساۋلىق ساقتاۋ سالاسىندا جالعاستى. مەديتسينا باسقارماسىنىڭ ماتەريالدىق-تەحنيكالىق بازاسى تاعى 2 جىلجىمالى مەديتسينالىق كەشەنمەن تولىقتى. وتاندىق اۆتوكولىك نەگىزىندە قۇراستىرىلعان جانە كوشپەلى جاعدايدا ازاماتتاردىڭ دەنساۋلىعىن تەكسەرۋدىڭ كەڭ سپەكترىنە ارنالعان تەحنيكالار تۇپقاراعان مەن قاراقيا اۋداندىق اۋرۋحانالارىنا تابىستالدى.
سوزىلمالى اۋرۋلاردى ەرتە انىقتاۋ, دەنساۋلىق جاعدايىن, الدىن الۋ جانە ەمدەۋ راسىمدەرىن انىقتاۋ ءۇشىن قاجەتتى زاماناۋي تسيفرلى قۇرالدارمەن جابدىقتالعان جىلجىمالى دياگنوستيكالىق مەديتسينالىق كەشەندەر Yutong قالاارالىق اۆتوبۋسى نەگىزىندە قۇرىلعان. بۇل كولىكتەردىڭ اۆتونومدى جىلىتۋ, كونديتسيونەرلەرى جانە بىرنەشە كابينەتى بار. گينەكولوگيالىق قاراۋ كابينەتى, بيوحيميالىق قان الۋ ۋچاسكەسى, دارىحانالىق پۋنكت, جالپى قابىلداۋ كابينەتى, رەنتگەن-بولمەسى بار كەشەندە مەديتسينالىق تەكسەرۋلەر, ديسپانسەرلىك تەكسەرۋلەر, كونسۋلتاتسيالىق-دياگنوستيكالىق مەديتسينالىق كومەك كورسەتۋ, مەديتسينالىق جانە زەرتحانالىق زەرتتەۋلەر, سالاماتتى ءومىر سالتىن ۇگىتتەۋ جانە قالىپتاستىرۋ قىزمەتى جۇرگىزىلمەك. سونداي-اق قورعاسىن بولمەسىندە قاۋىپسىز رەنتگەن جانە فليۋوروگرافيا جاساۋعا بولادى. ارنايى جاساقتالعان كولىك مەديتسينالىق كومەك كورسەتۋ, سكرينينگتەر وتكىزۋ, بىلىكتى مامانداردىڭ كونسۋلتاتسيالارىن جاساۋ ارقىلى اۋىلدىق جەرلەردەگى حالىققا مەديتسينالىق قىزمەتتەردى جوعارى دەڭگەيدە كورسەتۋگە مۇمكىندىك بەرەدى.
قاراقيا اۋداندىق ورتالىق اۋرۋحاناسىنىڭ باس دارىگەرى گۇلشارا ساقتاپ سەنەك, قۇلاندى جانە بوستان اۋىلدارىنا بارىپ, دياگنوستيكالىق-مەديتسينالىق كەشەن قانداي قىزمەت اتقارۋعا قاۋقارلى ەكەنىن, تۇرعىندارعا ساپالى مەديتسينالىق كومەك كورسەتۋدە ەشقانداي كەدەرگى جوعىن ايتتى. ال تۇپقاراعان اۋداندىق ورتالىق اۋرۋحاناسىنىڭ باس دارىگەرى گۇلشات شالاباەۆا, رەسپۋبليكالىق بيۋدجەت ەسەبىنەن ساتىپ الىنعان كەشەننىڭ كومەگىمەن جۇمىس ەداۋىر جەڭىلدەي تۇسەتىنىن ايتادى.
ماڭعىستاۋ وبلىستىق دەنساۋلىق ساقتاۋ باسقارماسىنىڭ باسشىسى جامال جامانباەۆا جىلجىمالى مەديتسينالىق كەشەنىمەن جەكە تانىسىپ, مەديتسيانلىق كولىكتەردىڭ شالعايداعى اۋىل تۇرعىندارىنا دەر كەزىندە ساپالى مەديتسينالىق كومەك كورسەتىلەتىنىنە سەنىمدى ەكەنىن جەتكىزدى.
ماڭعىستاۋ وبلىسى
