تەحنولوگيا • 04 قاراشا، 2020

كوروناۆيرۋستى بىرنەشە سەكۋندتا انىقتايدى

ۇلىبريتانيادا بىرنەشە سەكۋند ىشىندە كوروناۆيرۋستى انىقتايتىن تەست جاسالدى. جاڭا تەستتى لوۋبورو ۋنيۆەرسيتەتىنىڭ عالىمدارى مەن TOXY-triage جوباسىمەن جۇمىس ىستەگەن الەمنىڭ ءتۇرلى ەلدەرىندەگى دارىگەرلەردىڭ ناتيجەلەرىنە سۇيەنە وتىرىپ دايىنداعان.

اقمارال اعزامقىزى

بريتان عالىمدارى جاقىندا كوروناۆيرۋس ينفەكتسياسىن بىرنەشە ساعات ەمەس، بىرنەشە سەكۋند ىشىندە انىقتاۋدىڭ قاراپايىم ءادىسى پايدا بولۋى مۇمكىن ەكەنىن راستايدى. تەستتىڭ تولىق ورىندالۋى بىرنەشە مينۋتتى الادى. ۋەلستە جاسالعان تىنىس الۋ تەستى Covid-19 ۆيرۋسىن تىنىس الۋ جولدارىنىڭ باسقا دا ينفەكتسيالارىنان بىردەن اجىراتادى. شوتلانديا مەن گەرمانيادا وتكىزىلگەن جاڭا تەستتىڭ سىناق ناتيجەلەرى مەديتسينالىق Lancet جۋرنالىندا جاريالانعان. ونى جاساۋشى Imspex Diagnostics كومپانياسى قارجى تابىلسا، سىناق قۇرىلعىسى التى ايدا پايدالانۋعا دايىن بولاتىنىن مالىمدەدى.

«تەست ناتيجەسىنىڭ تەز دايىن بولاتىنى تەك اۋرۋحانالاردا ەمەس، ءارتۇرلى جاعدايلاردا قولدانۋعا مۇمكىندىك بەرەدى. ونىڭ الەۋەتى اۆياتسيادا، جالپى كولىكتە، ميگرانتتارمەن جۇمىس كەزىندە كورىنەدى. تىنىس الۋ ۇلگىسىن تەز الۋعا بولادى، ول ءينۆازيۆتى ەمەس، سىزگە ارنايى دايىندالعان ادام قاجەت ەمەس، بىرنەشە مينۋت ىشىندە ءسىزدىڭ قولىڭىزدا تەست جاۋابى بولادى»، دەيدى قۇراستىرۋشىلار.

بۇل قۇرىلعى باستاپقىدا وكپەنىڭ قاتەرلى ىسىگى سياقتى اۋرۋلاردى دياگنوستيكالاۋ مەن باكتەريالىق جانە ۆيرۋستىق ينفەكتسيالاردى تەز اجىراتۋ ءۇشىن تەستتەر ازىرلەۋ كەزىندە قولدانىلاتىن تەحنولوگياعا نەگىزدەلگەن. الايدا الەمدى جايلاعان پاندەميا باستالعاننان كەيىن فيرما كوروناۆيرۋستى دياگنوستيكالاۋعا ارنالعان تەست جاساۋعا شەشىم قابىلدادى. زەرتتەۋشىلەر مۇنداي قۇرىلعى Covid-19 ۆيرۋسىن باسقا ينفەكتسيادان قانشالىقتى اجىراتا الاتىنىن سىناپ كوردى. قۇرىلعى تىنىس الۋ ۇلگىسىن تالدايدى، تۇراقسىز حيميالىق ەلەمەنتتەردى ىزدەيدى، ولار رەسپيراتورلىق اۋرۋدىڭ ءتۇرىن انىقتايدى. تەستتەر وسى ەلەمەنتتەردەگى Covid-19 قولتاڭباسىن انىقتاي الدى، ول كەيىنىرەك باسقا ينۆازيالىق تەستىلەۋ ادىستەرىمەن راستالدى. جالپى، تەستەر كوروناۆيرۋستى استما نەمەسە باكتەريالىق پنەۆمونيا سياقتى باسقا اۋرۋلاردان اجىراتا وتىرىپ، 80% جاعدايدا ۆيرۋستى انىقتاي الدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز