وسىعان وراي, جامبىل وبلىسىنىڭ اكىمى بەردىبەك ساپارباەۆتىڭ تاپسىرماسىمەن وقيعانىڭ ءمان-جايىن انىقتاۋ ءۇشىن قۇرامىندا جامبىل وبلىستىق توتەنشە جاعدايلار دەپارتامەنتىنىڭ, مەركى اۋدانى اكىمدىگىنىڭ وكىلدەرىنەن ارنايى كوميسسيا قۇرىلدى. وبلىستىق توتەنشە جاعدايلار دەپارتامەنتى وكىلدەرىنىڭ ايتۋىنشا, اتالعان تۇرعىن ۇيدە ۇگىت-پروفيلاكتيكالىق جۇمىس جۇرگىزىلگەن. الايدا بۇل شارانىڭ كومەگى تيمەگەن.
وسىعان وراي, بۇگىن «وڭىرلىك كوممۋنيكاتسيالار قىزمەتىنىڭ» الاڭىندا وبلىستىق توتەنشە جاعدايلار دەپارتامەنتى باسشىسىنىڭ مىندەتىن اتقارۋشى, پولكوۆنيك ماقسات قوسىباەۆ بريفينگ وتكىزدى. بايانداماشى اۋەلى جەكسەنبى كۇنى مەركى اۋدانىندا ورىن العان جاعدايعا توقتالدى. «اتالعان تۇرعىن ۇيدە ۇگىت-پروفيلاكتيكالىق جۇمىس جۇرگىزىلگەن. بيىلعى جىلدىڭ 15 قىركۇيەگىندە گاز جانە ەلەكتر اسپاپتارىن پايدالانۋ كەزىندە تۇرمىستا ءورت قاۋىپسىزدىگى تالاپتارىن ساقتاۋ تۋرالى جادناما بەرىلگەن بولاتىن. اعىمداعى جىلى 17 تامىز بەن 17 قىركۇيەك ارالىعىندا وتكىزىلگەن تۇرعىن ءۇي سەكتورىندا ءورت قاۋىپسىزدىگى ايلىعىن وتكىزۋ جوسپارىنا سايكەس, دەپارتامەنت قىزمەتكەرلەرى «قازترانسگازايماق» مەكەمەسىنىڭ وكىلدەرىمەن, ۆولونتەرلارمەن بىرلەسىپ, مەركى اۋدانىنىڭ پلودوۆوياگودنوە اۋىلىندا ءورتتىڭ الدىن الۋ جانە حالىقتى ءورت قاۋىپسىزدىگى شارالارىنا وقىتۋ بويىنشا ۇگىت-ناسيحات جۇمىستارىن جۇرگىزدى», دەدى ماقسات قوسىباەۆ. ال, وقيعادان زارداپ شەككەن 3 ادام جەدەل تۇردە اۋرۋحاناعا جەتكىزىلىپ, ءتيىستى مەديتسينالىق كومەك كورسەتىلگەن. «جانساقتاۋ بولىمىنە جاتقىزىلعان ادامداردىڭ بىرەۋى پالاتاعا اۋىستىرىلىپ, ەكىنشىسى وبلىستىق بالالار اۋرۋحاناسىنا جەتكىزىلدى. وقيعا ورنىندا ارنايى كوميسسيا وكىلدەرى جۇمىس ىستەيدى», دەيدى مەركى اۋدانىنىڭ اكىمى مەيىرحان ومىربەكوۆ.
جالپى, جامبىل وبلىسىندا 1 قازانعا دەيىن جاۋاپتى مەكەمە تاراپىنان تۇرعىن ۇيلەرگە پروفيلاكتيكالىق جۇمىس جۇرگىزىلگەن. ناتيجەسىندە, 2167 ۇيدە 2863 ءورت قاۋىپسىزدىگى تالاپتارىنىڭ بۇزۋشىلىقتارى انىقتالعان. ال, 743 ۇيدە كەمشىلىكتەر تولىعىمەن جويىلعان.
جامبىل وبلىسى
