وسكەلەڭ ۇرپاقتى وتانسۇيگىشتىككە تاربيەلەپ, ولاردىڭ تانىم-تالعامىن ۇلت رۋحانياتىنا باعىتتاۋدى كوزدەيتىن ءسوز زەرگەرلەرى سايىسىنىڭ العاشقى اينالىمىنا 14 ادام قاتىسىپ, اقتىق كەزەڭگە 4 ستۋدەنت جولداما الدى. ولاردىڭ قاتارىندا ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتى نۇربول جاۋىنباەۆ, س.امانجولوۆ اتىنداعى شىعىس قازاقستان ۋنيۆەرسيتەتىنىڭ ستۋدەنتى ارداق ادالبەك, س.بايىشەۆ اتىنداعى اقتوبە ۋنيۆەرسيتەتىنىڭ ستۋدەنتى زليحا ناۋرىزالينا جانە ح.دوسمۇحامەدوۆ اتىنداعى اتىراۋ ۋنيۆەرسيتەتىنىڭ ستۋدەنتى جاسار نۇردانبەك ۇلى بار.
شارا قىزدار ۋنيۆەرسيتەتىنىڭ رەكتورى گاۋحار الدامبەرگەنوۆانىڭ قۇتتىقتاۋ سوزىمەن اشىلدى.
– بيىل ۇلى اقىن, دالا كەمەڭگەرى اباي قۇنانباي ۇلىنىڭ 175 جىلدىعى ەلىمىزدە كەڭىنەن اتالىپ وتىلۋدە. ابايعا بەت بۇرۋ, «وتكەننىڭ ارتى, جاڭانىڭ باسى ەدىم» دەگەن ۇلى اقىننىڭ تاعىلىمىنا تەرەڭ بويلاۋ – بۇگىنگى كۇندە ۇلكەن ماڭىزعا يە. اباي – ۇلتتىق بولمىستىڭ ايقىن ۇلگىسى. اباي – دالا دانالارىنىڭ بارشا جاقسى قاسيەتتەرى مەن اسىل مۇرالارىن بويىنا سىڭىرە وتىرىپ, ۇلت ادەبيەتى مەن مادەنيەتىن باعا جەتپەس قازىنالارمەن بايىتقان دانا دا دارا تۇلعا. اباي – ادامزاتقا ورتاق كەمەڭگەر. ۇلى ويشىلدىڭ شىعارمالارىنىڭ 30-دان استام تىلگە اۋدارىلىپ, ومىرشەڭ ولەڭدەرى مەن پالساپالىق ويلارى الەمدىك ادەبيەتتىڭ التىن قورىنا ەنۋى بۇل سوزىمىزگە ايقىن دالەل, – دەدى گاۋحار الدامبەرگەنوۆا.
ۋنيۆەرسيتەت باسشىسى كەمەڭگەردىڭ تويى ويدىڭ تويى بولۋى قاجەت ەكەندىگىن اتاپ ءوتتى.
– كەمەڭگەردىڭ تويى ويدىڭ تويى بولۋى قاجەت. ۇلى ابايدىڭ تويى تاعىلىمنىڭ تويى بولۋى ءتيىس. وسىعان وراي قىزدار ۋنيۆەرسيتەتىنىڭ دانىشپاننىڭ مەرەيتويىنا وراي رەسپۋبليكالىق جاس اقىندار ايتىسىن وتكىزۋدى ۇيعاردى. باستى ماقسات – جاستاردىڭ ورنەكتى سوزدەرى مەن ورەلى ونەرى ارقىلى ەل مۇراتى مەن قۇندىلىقتارىن ناسيحاتتاۋ. كەلىستى دە كەستەلى ءسوزدى جانىنا سەرىك ەتكەن الامانعا قاتىسۋشىلارعا تابىس جانە جەڭىس تىلەيمىن! كەمەلدىك كىلتىن ۇسىنعان اباي مۇراسى جاڭعىرا بەرسىن, – دەدى ءوز سوزىندە گاۋحار تورەمۇراتقىزى.
ايتىس بارىسىندا اقىندار «اباي – دانا, اباي – دارا», «رۋحاني جاڭعىرۋ – باستى باعدار», «تۋعان جەر – تۇرعان جەرمەن ولشەنبەيدى», «انا ءتىلىم – ارداعىم», «تاۋەلسىزدىك – تۇعىرىم» تاقىرىپتارى بويىنشا ءسوز جارىستىردى.
ۇلتتىڭ ۇلىلىعىن ۇلىقتاپ, ءتول مادەنيەتىمىزدىڭ مەرەيىن ارتتىرۋعا سەپ بولعان ءسوز سايىسىندا نۇربول جاۋىنباەۆ ۇزدىك اتانىپ, بايقاۋدىڭ باس جۇلدەسىن قانجىعاسىنا بايلادى. ءبىرىنشى ورىن جاسار نۇردانبەك ۇلىنا بەرىلسە, ەكىنشى ورىن زليحا ناۋرىزاليناعا بۇيىردى. ال جۇلدەلى ءۇشىنشى ورىنعا ارداق ادالبەك لايىق دەپ تانىلدى.
جەڭىمپازدار مەن جۇلدەگەرلەر قىزدار ۋنيۆەرسيتەتىنىڭ رەكتورى گاۋحار الدامبەرگەنوۆانىڭ «العىس حاتىمەن», ارنايى ديپلومدارمەن جانە «اتامۇرا» كورپوراتسياسىنىڭ پرەزيدەنتى راقىمعالي قۇل-مۇحامەد پەن «Tasgroup» كومپانياسىنىڭ باسقارۋشىسى دۋلات تاستەكەەۆ تاعايىنداعان سىياقىلارىمەن ماراپاتتالدى.
الامان ايتىسقا قاتىسۋشىلاردىڭ ونەرىن تالانت ارىنعالي, سايات قامشىگەر, ءلاززات يگىسىن سىندى تانىمال اقىندار باعالاپ, جىر دوداسىنا قازىلىق جاسادى.
وسى ورايدا ايتا كەتەيىك, ونەر سايىسىنىڭ جوعارى دەڭگەيدە وتۋىنە قىزدار ۋنيۆەرسيتەتىنىڭ فيلولوگيا ينستيتۋتىنىڭ قوسقان ۇلەسى مول. ينستيتۋت ديرەكتورى تىنىشتىق ەرمەكوۆانىڭ ايتۋىنشا, حاكىم مەرەيتويىنا ارنالعان ونەر جارىسىنىڭ ماقساتى – اباي مۇرالارى ارقىلى ۇلت ادەبيەتىنىڭ تابىستارىن جانە تاۋەلسىزدىك جىلدارى قول جەتكەن جەتىستىكتەردى دارىپتەۋ.
– بايتاعى – سىرعا, كومەيى – جىرعا تۇنعان ۇلى دالانىڭ توسىندە سان عاسىرلار بويى ءتول رۋحانياتىمىزدىڭ سارقىلماس قازىناسىنا اينالعان قۇندىلىقتار قالىپتاستى. ۇلتتىق بولمىسىمىز بەن ايقىن نىشانىمىزعا اينالعان دارا ءداستۇرىمىز پايدا بولدى. بابادان بالاعا ميراسقا اينالعان مادەني مۇرالارىمىز ەكشەلدى. سونىڭ ءبىرى – ايتىس ونەرى. ايتىس – داۋىرلەرمەن قاناتتاسىپ, عاسىرلارمەن ۇندەسىپ, زامانالارمەن تىلدەسىپ كەلە جاتقان ۇلى ونەر. ايتىس – قازاقتىڭ قانىنا سىڭگەن بەكزات ياكي بىرەگەي دۇنيە. بۇل ونەر – دالا فيلوسوفياسىمەن ساباقتاسىپ, قاناتتاسىپ جاتقان مادەني مۇرالارىمىزدىڭ ءبىرى ءھام بىرەگەيى رەتىندە ۇلت قازىناسىنىڭ قاتارىنا ەندى, – دەپ اتاپ ءوتتى قىزدار ۋنيۆەرسيتەتىنىڭ ءباسپاسوز جانە قوعاممەن بايلانىس ءبولىمىنىڭ جەتەكشىسى جاندار اسان.
الماتى
