«بۇۇ-نىڭ ەلەكتروندى ۇكىمەت جونىندەگى زەرتتەۋى اياسىنداعى ءوڭىر ەلدەرىندە ەلەكتروندى ۇكىمەتتىڭ دامۋىنداعى جەتىستىكتەر مەن سىن-تەگەۋرىندەر» اتتى ونلاين-كونفەرەنتسيانى استانا مەملەكەتتىك قىزمەت حابى, تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى, بۇۇ ەكونوميكالىق جانە الەۋمەتتىك ماسەلەلەر جونىندەگى دەپارتامەنتى, «زەردە» حولدينگى بىرلەسىپ ۇيىمداستىردى.
كونفەرەنتسيا بارىسىندا قاتىسۋشىلار ءوزارا ارەكەتتەسۋ كەلەشەگى جانە وسى ماسەلە بويىنشا جاھاندىق جانە وڭىرلىك ىنتىماقتاستىقتى نىعايتۋ قاجەتتىلىگىن تالقىلادى.
تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين كونفەرەنتسيانى اشا وتىرىپ: «پاندەميا مەملەكەتتىك جانە الەۋمەتتىك قىزمەتتەردى ۇسىنۋدىڭ ءداستۇرلى تاسىلدەرىنىڭ ءالسىز جاقتارىن ايقىنداپ قانا قويماي, كوپتەگەن سىن-قاتەرگە جاۋاپ بەرۋدە تسيفرلى تەحنولوگيالاردىڭ ماڭىزدى ەكەنىن كورسەتتى», دەپ اتاپ ءوتتى.
سونىمەن بىرگە مينيستر بۇۇ-نىڭ زەرتتەۋ ناتيجەلەرى تسيفرلى ترانسفورماتسيا جولىندا مەملەكەتتەردىڭ ايتارلىقتاي ىلگەرى قادام جاساپ جاتقانىن ايتتى.
وسى ورايدا استانا مەملەكەتتىك قىزمەت حابى باسقارۋشى كوميتەتىنىڭ توراعاسى ءاليحان بايمەنوۆ: «COVID-19 پاندەمياسى سەنىمنىڭ الەۋمەتتىك قۇندىلىق قانا ەمەس, كەز كەلگەن ستراتەگيانى, سونىڭ ىشىندە ەلەكتروندى ۇكىمەت ستراتەگياسىن ىسكە اسىرۋعا اۋاداي قاجەت ەكەنىن ءارى ءتيىمدى اكىمشىلىك كاپيتال رەتىندەگى ماڭىزدىلىعىن كورسەتتى. جاڭا تەحنولوگيالاردى قولدانۋدا كەز كەلگەن اسىرا سىلتەۋشىلىككە جول بەرمەي, شەشىم قابىلداۋدا اشىقتىق جانە جاريالىلىق قاتار ءجۇرۋ كەرەك. تاجىريبە الماسۋ زاماناۋي تەحنولوگيالاردى قولدانۋعا دا, جاڭا جاعدايدا ازاماتتاردىڭ قۇقىقتارى مەن بوستاندىقتارىن قورعاۋعا دا قاتىستى بولۋى وتە ماڭىزدى», دەدى.
بۇۇ ەكونوميكالىق جانە الەۋمەتتىك ماسەلەلەر جونىندەگى دەپارتامەنتى (UN DESA) ەلەكتروندى ۇكىمەت باسقارماسى جەتەكشىسى ۆينچەنتسو اكۋارونىڭ ايتۋىنشا, ەلەكتروندى ۇكىمەتكە جاساعان شولۋ بويىنشا مەملەكەتتىك سەكتورداعى تسيفرلى ترانسفورماتسيانى جەدەلدەتۋگە دەگەن سۇرانىس سوڭعى ايلاردا كۇرت وسكەن.
«بۇعان قوسا پاندەميانىڭ ىقپالى ۇكىمەت پەن قوعامدى داعدارىسقا قىسقا مەرزىمدە جاۋاپ بەرۋ, ورتا مەرزىمدە سونىڭ سالدارىن جويۋ جانە ۇزاق مەرزىمدە ستراتەگيالىق شەشىمدەر مەن قۇرالداردى ازىرلەۋ ءۇشىن تسيفرلى تەحنولوگيالارعا جۇگىنۋگە ءماجبۇر ەتتى. بىزگە وسى سەرپىلىستى ءارى قاراي كۇشەيتىپ, تسيفرلى پروگرەسستى ودان ءارى ىلگەرىلەتىپ, تسيفرلى الشاقتىقتى ەڭسەرۋ قاجەتتىگىن ەستەن شىعارماي, ەلدىڭ ىشىندە دە, مەملەكەتتەر اراسىندا دا ەشكىمدى نازاردان تىس قالدىرماۋىمىز كەرەك», دەدى ۆينچەنتسو اكۋارو.
UN DESA ساراپشىسى ارپينە كورەكيان ءوز بايانداماسىندا بۇۇ-نىڭ 2020 جىل بويىنشا ەلەكتروندى ۇكىمەتتىڭ دامۋ دەڭگەيىنە قاتىستى زەرتتەۋدىڭ شەشۋشى ناتيجەلەرى مەن ترەندتەرىن تانىستىردى. سوعان سايكەس بۇۇ-عا مۇشە 193 مەملەكەت اراسىندا 126 مەملەكەتتە ەلەكتروندى ۇكىمەتتىڭ دامۋ دەڭگەيى جوعارى جانە وتە ءتيىمدى دەپ انىقتالعان.
سولاردىڭ اراسىندا دانيا, وڭتۇستىك كورەيا جانە ەستونيا ەلدەرى كوش باستاپ تۇر. ال تمد ەلدەرىنىڭ اراسىندا قازاقستان ۇكىمەتتىڭ اشىق دەرەكتەرى, ونلاين-قىزمەتتەر دامۋ دەڭگەيى يندەكسى جانە تەڭىزگە شىعا المايتىن ەلدەر ىشىندەگى يندەكسى بويىنشا الدىڭعى ورىنعا شىققان.
ءيزرايلدىڭ ۇلتتىق تسيفرلى مينيسترلىگىنە قاراستى مەملەكەتتىك اكت باسقارماسى باس اتقارۋشى ديرەكتورىنىڭ مىندەتىن اتقارۋشى شاحار براحا, بۇۇ-نىڭ ازيا مەن تىنىق مۇحيتى وڭىرىنە ارنالعان ەكونوميكالىق جانە الەۋمەتتىك كوميسسياسى اكت جانە اپاتتار قاۋپىن ازايتۋ جونىندەگى دەپارتامەنت ديرەكتورى تيتسيانا بوناپاچە, ەستونيانىڭ ەلەكتروندى باسقارۋ اكادەمياسى اتقارۋشى ديرەكتورى جانە باسقارما توراعاسى حاننەس استوك كوروناۆيرۋس پاندەمياسى كەزىندە مەملەكەتتىك قىزمەتتەردى ءتيىمدى ۇسىنۋ بويىنشا وزىق تاجىريبەلەرىمەن, سونداي-اق بىرەگەي يننوۆاتسيالىق شەشىمدەرىمەن ءبولىستى.
وسى قاتاردا قىرعىز رەسپۋبليكاسىنىڭ اقپاراتتىق تەحنولوگيالار جانە بايلانىس مەملەكەتتىك كوميتەتىنىڭ توراعاسى التىنبەك يسمايلوۆ, بەلارۋس ەلىنىڭ بايلانىس جانە اقپاراتتاندىرۋ ءمينيسترىنىڭ ءبىرىنشى ورىنباسارى پاۆەل تكاچ, وزبەكستاننىڭ اقپاراتتىق تەحنولوگيالار جانە كوممۋنيكاتسيالار ءمينيسترىنىڭ ءبىرىنشى ورىنباسارى ولەگ پەكوس, سونداي-اق ازەربايجاننىڭ ەلەكتروندى ۇكىمەتتى دامىتۋ ورتالىعى ديرەكتورى فاريز دجافاروۆ, «ۇلتتىق اقپاراتتىق تەحنولوگيالار» اق باسقارما توراعاسى اسەت تۇرىسوۆ جانە تاعى باسقالارى ەلەكتروندى ۇكىمەتتى دامىتۋداعى ءوز جەتىستىكتەرى مەن جاڭا مىندەتتەردى تانىستىردى.
جالپى, استانا مەملەكەتتىك قىزمەت حابىنىڭ ميسسياسى − ايماق جانە باسقا ەلدەر ۇكىمەتتەرىنىڭ ينستيتۋتسيونالدىق جانە ادامي الەۋەتىن كۇشەيتۋدەگى كۇش-جىگەرىن قولداۋ ارقىلى مەملەكەتتىك قىزمەت تيىمدىلىگىن ارتتىرۋعا ۇلەس قوسۋ.
قازاقستان ۇكىمەتى مەن بۇۇ دامۋ باعدارلاماسى باستاماسى اياسىندا 2013 جىلى قۇرىلعان استانا حابى بۇگىنگى تاڭدا 42 قاتىسۋشى ەل مەن 70 ينستيتۋتسيونالدىق ارىپتەستەرىن قامتىپ وتىر.
