بۇگىندە قاراجانباس تاۋلىگىنە ەدىل وزەنىنەن استراحان-ماڭعىستاۋ سۋ قۇبىرى ارقىلى كەلەتىن 17,5 مىڭ تەكشە مەتر سۋ كولەمىن پايدالانۋدا. سۋ تۇششىتۋ زاۋىتىن ىسكە قوسۋ كەن ورنىن سۋمەن قامتاماسىز ەتىپ, ايماق حالقىنىڭ قاجەتتىلىكتەرى ءۇشىن ايتارلىقتاي سۋ كولەمىن بوساتۋعا مۇمكىندىك بەرەدى. وعان قوسا قۇرىلىس اياقتالعاننان كەيىن تاعى 50-گە جۋىق جاڭا جۇمىس ورنى اشىلادى دەپ جوسپارلانعان. سونىمەن قاتار كاسىپورىندى ىسكە قوسۋ ارقىلى «قاراجانباسمۇناي» اق-ىنداعى بىرقاتار تەحنولوگيالىق ماسەلەنى شەشۋ جولىن تابادى.
اتاپ ايتقاندا 2021-2035 جىلدارى ارالىعىندا «قاراجانباسمۇناي» اق كەن ورنىنداعى مۇناي ءوندىرىسىن كەمىندە 700 مىڭ تونناعا ارتتىرۋدى, ۇڭعىمالاردى كۇردەلى جانە جەراستى جوندەۋدى ازايتۋدى, گريفونداردىڭ پايدا بولۋىن شەكتەۋدى جوسپارلاپ وتىر.
وسى ورايدا كوروناۆيرۋس پاندەمياسى سالدارىنان زاۋىتتى ىسكە قوسۋ ءۇشىن قاجەتتى قوندىرعىلاردى جەتكىزۋ مەرزىمى سوزىلىپ, قۇرىلىستىڭ تاپسىرىلۋى ۇستىمىزدەگى جىلدىڭ جەلتوقسان ايىنان 2021 جىلدىڭ 1-توقسانىنا شەگەرىلگەنىن ايتا كەتكەن ءجون.
بۇدان بولەك ءباسپاسوز تۋرى بارىسىندا «قاراجانباسمۇناي» اق ەكولوگيالىق جوبالارى جانە قورشاعان ورتانى قورعاۋ سالاسىنداعى قىزمەتى تانىستىرىلدى. كومپانيانىڭ بۇل سالاداعى جاڭالىقتارى مەن جوسپارى تۋرالى ايتىلدى.
«قاراجانباسمۇناي» اق وتكەن جىلى بۇرىننان قالىپتاسقان تاريحي قالدىقتار ماسەلەسىن ءبىرجولاتا شەشتى. كومپانيا ۋاقىتشا ساقتاۋ پوليگونىنداعى بار-جوعى 180 مىڭ توننادان استام قالدىقتى كادەگە جاراتىپتى. اتاپ ايتقاندا 2010 جىلعا دەيىن – 104 توننا, 2010-2016 جىلدارى تاعى 43,8 توننا قالدىق جويىلدى. ال 2019 جىلى «قاراجانباسمۇناي» اق پوليگوندا قالعان 36 مىڭ توننا قالدىقتى تولىعىمەن كادەگە جاراتقان بولاتىن.
كومپانيا تابيعاتتى قورعاۋ شارالارىن ءجىتى نازاردا ۇستايدى. بۇعان جىل سايىن اۋقىمدى قارجى بولەدى ەكەن. مىسالى, 2016 جىلى 168 ملن تەڭگە بولىنسە, بيىل 479 ملن تەڭگەدەن استام قارجى جۇمساۋ جوسپارلانىپ وتىر.
ەسكە سالا كەتسەك, قازىرگى تاڭدا «قاراجانباسمۇناي» اق جالپى كولەمى 350 گەكتار بولاتىن مۇنايمەن تاريحي لاستانعان جەرلەردى تازارتۋ بويىنشا ءىس-شارالاردى جۇزەگە اسىرۋدا. بۇگىنگە دەيىن ونىڭ 143 گەكتارىن تازالاپ ۇلگەرگەن. سونىمەن قاتار كومپانيا كاسپي تەڭىزىنىڭ جاعالاۋى ايماعىندا 1970 جىلداردىڭ اياعىندا بۇرعىلانعان 11 ۇڭعىمانى جاپتى.
سول 2019 جىلى «قاراجانباسمۇناي» اق جانە ەكولوگيا, گەولوگيا جانە تابيعي رەسۋرستار مينيسترلىگى قورشاعان ورتانى قورعاۋ سالاسىنداعى ىنتىماقتاستىق تۋرالى مەموراندۋمعا قول قويعان بولاتىن. قۇجاتقا سايكەس «قاراجانباسمۇناي» اق ەنشىلەس كومپانيالارى – قبم, «ماڭعىستاۋمۇنايگاز» اق جانە «وزەنمۇنايگاز» اق – كەلىسىمشارت اياسىندا مۇنايمەن لاستانعان جەرلەردى تازالاۋ, سونداي-اق جابدىقتالماعان شلام جيناعىشتارىندا ورنالاستىرىلعان قالدىقتاردى كادەگە جاراتۋ جانە قايتا وڭدەۋ جونىندەگى مىندەتتەردى قابىلدادى.
اتىراۋ وبلىسى
