كينوفەستيۆالدىڭ ۇيىمداستىرۋشىلارى – OzgeEpic زاماناۋي ونەر كەڭىستىگى مەن قازاقستان انيماتسيالىق كينوستۋديالارى اسسوتسياتسياسى. ءبىر ەرەكشەلىگى, بيىلعى فەستيۆال حالىقارالىق دەڭگەيدە اتاپ وتىلمەك. اتاپ ايتقاندا, تۇركيا, ازەربايجان, تۇرىكمەنستان, وزبەكستان, قىرعىزستان, تاتارستان جانە باشقۇرتستان انيماتورلارى اتسالىسپاق.
شارانىڭ ماقساتى – قازاق انيماتسياسىنىڭ دامۋىنا ىقپال ەتۋ جانە جاس دارىندارعا قولداۋ كورسەتۋ. باستاما وسى سالاداعى اعا بۋىن وكىلدەرى تاراپىنان دا قولداۋ تاپقان. «بۇل فەستيۆال ەلىمىزدىڭ انيماتسيالىق الەۋەتىن ارتتىرۋعا ءوز ۇلەسىن قوساتىن ءماندى قوزعالىستىڭ ءبىرى بولادى. ءبىز اعا بۋىننىڭ ەڭبەگىنە قۇرمەتپەن قارايتىن, جاڭا بۋىننىڭ ىزدەنىسىنە قولداۋ بىلدىرەتىن قاۋىمداستىق قۇرۋدى ماقسات ەتەمىز», دەيدى كينوفەستيۆالدىڭ ۇيىمداستىرۋشىسى ماقپال جۇماباي.
ÁMEN-2020 شەڭبەرىندە ۇلتتىق كينونى قولداۋ مەملەكەتتىك ورتالىعىمەن بىرلەسىپ ۇيىمداستىرىلاتىن جەتەكشى وتاندىق جانە شەتەلدىك مۋلتيپليكاتورلاردىڭ شەبەرلىك سىنىپتارى مەن ترەنينگتەرى وتەدى. «رۋحاني جاڭعىرۋ» قازاقستاندىق قوعامدىق دامۋ ينستيتۋتىنىڭ قاتىسۋىمەن «قازاق انيماتسياسىنىڭ وزەكتى ماسەلەلەرى» جانە «تۇركى ەلدەرىنىڭ ورتاق قايراتكەرلەرى تۋرالى حالىقارالىق انيماتسيالىق جوبا» تاقىرىپتارىندا دوڭگەلەك ۇستەلدەر ۇيىمداستىرىلماقشى. وعان قوسا, «قازاقفيلم» كينوستۋدياسىمەن بىرگە قازاقستاندىق انيماتسيانىڭ رەتروسپەكتيۆاسى جوسپارلانعان, وعان وتاندىق انيماتسيا تاريحىنداعى ەڭ ۇزدىك 16 كارتينا كىرەدى (1960-2020), سونىڭ ىشىندە وتاندىق انيماتسيانىڭ نەگىزىن قالاۋشى امەن قايداروۆتىڭ جۇمىستارى دا بار. قازاق انيماتسيا مەكتەبىن قۇرۋدا نەگىزگى ءرول اتقارعان جانە العاشقى قازاقستاندىق انيماتسيا ستۋدياسىن اشقان مەتر امەن قايداروۆ – «قارلىعاشتىڭ قۇرىعى نەگە ايىر؟» اتتى العاشقى ءمۋلتفيلمنىڭ اۆتورى. شارا بارىسىندا قازاقستان جانە تۇركيا مەملەكەتتەرىنىڭ تولىقمەترلى فيلمدەرى دە كورسەتىلەدى. ايرىقشا اتاپ وتەرلىگى, رەجيسسەر قاسيەت ساقيوللانىڭ «ماحامبەت» ءمۋلتفيلمى تۇڭعىش رەت حالىقارالىق دەڭگەيدە كوپشىلىك نازارىنا ۇسىنىلماق.
2019-2020 جىلدار ارالىعىندا تۇسىرىلگەن انيماتسيالىق فيلمدەرگە ارنالعان جالپى كونكۋرس; 2019-2020 جىلدارى ارالىعىندا تۇسىرىلگەن ستۋدەنتتەردىڭ ديپلومدىق, كۋرستىق انيماتسيالىق جۇمىستارى قابىلداناتىن ستۋدەنتتىك جۇمىستاردىڭ بايقاۋى سىندى فەستيۆال بىرنەشە كەزەڭنەن تۇرادى. ال «تابيعات جانە ادام» تاقىرىبىنداعى كوميكستەر كونكۋرسىنا بارلىق ءوتىنىم بەرۋشىلەر مەن انيماتورلار قاتىسا الادى.
سىنشىلار تاراپىنان وڭ قولداۋعا يە بولعان فەستيۆال جۇمىسى وتاندىق انيماتسيا سالاسى مەن كورەرمەن ءۇشىن ەلەۋلى جاڭالىق بولىپ وتىر. جىل سايىنعى جاستاردىڭ ءتۇسىرىپ جۇرگەن فيلمدەرىنە نازار اۋدارساق, بولاشاق انيماتسيا ماماندارىنىڭ قاتارعا قوسىلىپ كەلە جاتقانىن اڭعارامىز. بۇل رەتتە ÁMEN انيماتسيالىق فيلمدەر فەستيۆالىنىڭ جاس ماماندار ءۇشىن باعىت-باعدار بەرۋدە مۇمكىنشىلىگى زور.
