وسى ايماقتى اينالىپ ءوتۋ بارىسىندا بۇل جەردە 306 اعاش وسەتىندىگى, ونىڭ ىشىندە داڭعىل بويىندا 254 قىلقان جاپىراقتى اعاش, 26 جاپىراقتى اعاش, 24 جەمىس اعاشى مەن 2 بۇتالى اعاش بار ەكەندىگى انىقتالدى.
ساراپشىلار ولاردى قاراپ شىققاندا, كەيبىرىنىڭ كۇتىمى ناشار بولىپ شىقتى. اعاشتار قۋراعان. سوندىقتان كوميسسيا قاۋىپتى جانە قۋراعان اعاشتاردى كەسۋگە رۇقسات بەرۋ تۋرالى شەشىم قابىلدادى. بارلىعى 306 اعاشتىڭ 47-ءسى كەسىلەدى, 23 اعاش باسقا اۋداندارعا اۋىستىرىلادى. 27 قازاننان باستاپ بۇل اعاشتار قايتا وتىرعىزىلادى.
الماتى قالاسى جاسىل ەكونوميكا باسقارماسى باسشىسىنىڭ ورىنباسارى ۇلان ابدۋلداەۆ: "بۇل ايماقتا اعاش كەسۋ ءبىرىنشى كەزەكتە توتەنشە جاعدايدى جويۋ ءۇشىن جۇزەگە اسىرىلادى. كەيبىر اعاشتاردىڭ ءدىڭى كەۋىپ كەتكەندىكتەن, قۇلاۋ قاۋپىن تۋدىرادى. ءبىز قالانىڭ جاسىل قورىن جاسارتىپ, اباي داڭعىلىنىڭ بولىنەتىن جولاعىن دوستىق داڭعىلىنان بايتۇرسىنوۆ كوشەسىنە دەيىن جاقسى جاعدايعا جەتكىزگىمىز كەلەدى", دەيدى.
جۇمىس توبىنىڭ مۇشەسى, وسىمدىكتەر كارانتينىن قورعاۋ ينستيتۋتىنىڭ ورماندار مەن جاسىل ايماقتاردى قورعاۋ سەكتورىنىڭ مەڭگەرۋشىسى, بيولوگيا عىلىمدارىنىڭ كانديداتى نۇرجان مۇحاماديەۆ اباي داڭعىلىنىڭ بولىنەتىن جولاعىنداعى جاسىل ەكپەلەر سوڭعى ۋاقىتتا ەستەتيكالىق جانە ساندىك كورىنىسىن جوعالتقانىن العا تارتتى. وندا ءبارى رەتسىز جانە قىلقان جاپىراقتى, جاپىراقتى جانە جەمىس اعاشتارى ارالاسىپ تۇر. باسقاشا ايتقاندا, قاراعاي, شىرشا, تۋيا, سودان كەيىن الما اعاشى قاتار تۇر. جەمىستى اعاشتارىنا دا داڭعىل بويى اسا قولايسىز بولعاندىقتان, دۇرىس وسپەيدى.
"شىندىعىندا, اباي داڭعىلىندا كولىك وتە كوپ, ءتۇتىن دە كوپ بولىنەدى. جانە اعاشتاردىڭ مەزگىلسىز قۋراۋىنا قىستا جولعا قۇيىلاتىن تۇز رەاكتيۆتەرى دە سەپتەسىپ, كەرى اسەر ەتەدى. مەن ءدال وسى اباي داڭعىلىن ءبولىپ تۇرعان جاسىل جولاقتى بىردەي ستيلدە كورگىم كەلەدى. اعاشتاردىڭ قۇرعاقشىلىققا جانە تۇزعا ءتوزىمدى تۇرلەرىن وتىرعىزۋ قاجەت. مىسالى, كۇل تاماشا بولار ەدى. جالپى, ابايدان قۋراپ جاتقان اعاشتاردىڭ ءبىر بولىگىن كەسىپ تاستاپ, ونىڭ ورنىنا وسى جەرگە بەيىمدەلگەن باسقا اعاشتاردىڭ تۇرلەرىن وتىرعىزۋ كەرەك", دەيدى نۇرجان مۇحاماديەۆ.
ماسەلەن, اباي داڭعىلىنا وتىرعىزۋعا ۇسىنىلىپ جاتقان ساندىك قىلقان جاپىراقتى اعاشتاردان بولەك, كۇل اعاشىنا كەلسەك, وسە كەلە جارىق سۇيگىش, ال كوشەت تۇرىندە كولەڭكەگە ءتوزىمدى كەلەدى. ول توزاڭدانۋعا كەدەرگى جاسامايتىن جاپىراقتارى شىققانعا دەيىن ءساۋىر-مامىر ايلارىندا گۇلدەيدى.
الماتى
