پارلامەنت سەناتى حالىقارالىق قاتىناستار, قورعانىس جانە قاۋىپسىزدىك كوميتەتىنىڭ مۇشەلەرى ەلىمىزدىڭ توتەنشە جاعدايلار مينيسترلىگىنىڭ باسشىلىعىمەن كەزدەسۋ وتكىزدى, دەپ حابارلادى سەناتتىڭ ءباسپاسوز قىزمەتى.
پارلامەنت سەناتى حالىقارالىق قاتىناستار, قورعانىس جانە قاۋىپسىزدىك كوميتەتىنىڭ مۇشەلەرى ەلىمىزدىڭ توتەنشە جاعدايلار مينيسترلىگىنىڭ باسشىلىعىمەن كەزدەسۋ وتكىزدى, دەپ حابارلادى سەناتتىڭ ءباسپاسوز قىزمەتى.
كەزدەسۋ بارىسىندا قازاقستان اۋماعىنداعى تابيعي جانە تەحنوگەندىك سيپاتتاعى توتەنشە جاعدايلاردىڭ الدىن الۋ جانە ولاردى جويۋداعى مينيسترلىك قىزمەتىن زاڭنامالىق تۇرعىدا قامتاماسىز ەتۋ ماسەلەلەرى تالقىلاندى.
توتەنشە جاعدايلار ءمينيسترى ۆ.بوجكو باستاعان مينيسترلىك وكىلدەرى ۆەدومستۆو جۇمىستارىنىڭ باستى باعىتتارى مەن الدارىنا قويىلعان ماقساتتارى تۋرالى حاباردار ەتتى. سەناتورلار اپاتتان قۇتقارۋ جۇمىستارى بويىنشا كورسەتكىشتەردىڭ ايتارلىقتاي جاقسارعانىنا جوعارى باعا بەرىپ, مينيسترلىكتىڭ ەلدى مەكەندەردەگى تاسقىنداردى جانە ادامداردىڭ سۋدا اپات بولۋىن بولدىرماۋ, سونداي-اق, وندىرىستىك قاۋىپسىزدىك پەن توتەنشە جاعدايلارعا جەدەل شارا قولدانۋدى قامتاماسىز ەتۋ جونىندەگى قىزمەتىمەن جان-جاقتى تانىستى.
دەپۋتاتتار قازىرگى تاڭدا پارلامەنت قابىرعاسىندا قارالىپ جاتقان «ازاماتتىق قورعاۋ تۋرالى» زاڭ جوباسىنىڭ نەگىزگى ەرەجەلەرىن تالقىلاۋعا ەرەكشە نازار اۋداردى. كەزدەسۋ كەزىندە وسى زاڭ جوباسىنىڭ ماقساتتارى مەن باعىتتارى تۋرالى ەگجەي-تەگجەيلى مالىمەتتەر ايتىلىپ, ولاردى الداعى ۋاقىتتا سەناتتا تالقىلاۋ بارىسىندا پايدالانۋ تۋرالى ءسوز بولدى.
سونىمەن قاتار, كەزدەسۋ اياسىندا قۇتقارۋ قىزمەتى ينفراقۇرىلىمىن جەتىلدىرۋ, كادرلار ساياساتى, گۋمانيتارلىق كومەك جانە توتەنشە جاعدايلار سالاسىنداعى حالىقارالىق ىنتىماقتاستىققا قاتىستى ماسەلەلەر تالقىلاندى. كەزدەسۋدەن كەيىن دەپۋتاتتار استانا قالاسى توتەنشە جاعدايلار دەپارتامەنتىنىڭ ءورت ءسوندىرۋ بولىمىندە بولىپ, اۆاريالىق-قۇتقارۋ جانە ءورت ءسوندىرۋ تەحنيكالارىمەن تانىستى.
