جانۋارلار دۇنيەسىن قورعاۋ جانە بالىق شارۋاشىلىعى ءبولىمىنىڭ باس مامانى رۋسلان بالتاەۆتىڭ ايتۋىنشا, اعىمداعى جىلدىڭ تامىزىندا رەزەرۆتىك قورداعى 13 بالىق شارۋاشىلىعىنا سۋ ايدىندارىن بەكىتىپ بەرۋ كونكۋرسى وتكىزىلگەن. كونكۋرسقا 18 كاسىپكەردەن 20 كونكۋرستىق ءوتىنىم ءتۇسىپ, ناتيجەسىندە 5 كاسىپكەرگە 5 بالىق شارۋاشىلىعى سۋ ايدىندارى بەكىتىلىپ بەرىلگەن. الداعى ۋاقىتتا قالعان سۋ ايدىندارىنا كونكۋرس جاريالانادى. جالپى وڭىرىمىزدەگى بالىق شارۋاشىلىعى سۋ ايدىندارىنا وسى جىلدىڭ 15 اقپانىنان باستاپ, 1 شىلدەسىنە دەيىن بالىق اۋلاۋ ءليميتى 673,3 توننانى قۇراعان. بۇگىنگى كۇنگە 666 توننا بالىق اۋلانىپتى. ناتيجەسىندە تابيعات پايدالانۋشىلاردان جەرگىلىكتى بيۋدجەتكە 11 ملن 943 مىڭ تەڭگە تۇسكەن. ال اعىمداعى جىلدىڭ 1 شىلدەسىنەن 2021 جىلدىڭ 1 شىلدەسىنە دەيىن وبلىس اۋماعىنداعى بالىق شارۋاشىلىعى سۋ ايدىندارىنا بالىق اۋلاۋ ءليميتى 1150,7 توننانى قۇراپ وتىر.
وبلىستاعى بالىق شارۋاشىعىن دامىتۋدا سۋ ايدىندارىن تىرشىلىك نارىمەن قامتاماسىز ەتۋدە كەدەرگىلەر بار كورىنەدى.
«باسقارما وبلىستاعى بارلىق سۋ ايدىندارىن سۋمەن قامتاماسىز ەتىلۋىن زەردەلەپ شىقتى. ناتيجەسىندە, 121 سۋ ايدىننىڭ تەك 17-دە عانا سۋ دەڭگەيى تۇراقتى ەكەندىگى انىقتالىپ وتىر. ءبىز وبلىسىمىزداعى بالىق شارۋاشىلىعى سۋ ايدىندارىن سۋمەن تۇراقتى قامتاماسىز ەتپەسەك, كەلەشەكتە بالىق شارۋاشىلىعىن دامىتۋ قيىنعا سوعادى. ونىڭ ۇستىنە, تابيعي سۋ قويمالارىندا وسىرىلگەن بالىق اۋلاۋ كۆوتاسىن كوتەرۋ دە قيىندىق تۋعىزادى» - دەدى مامان.
سوندىقتان باسقارما جەكە توعاندا ينتەنسيۆتى بالىق ءوسىرۋ شارۋاشىلىعىن دامىتۋ تاجىريبەسىن قولعا العان. بۇل ءادىستىڭ ەرەكشەلىگى سول كاسىپكەر ءوزىنىڭ جەرىنە توعان سالىپ, بالىق وسىرەدى. جەم, شاباق, انالىق بالىق ساتىپ الۋ, قۇرال-جابدىق ساتىپ الۋ مەملەكەت تاراپىنان سۋبسيديالانادى. توعاندى الىپ قويۋ قاۋپى بولمايدى.
«جامبىل اۋدانىندا جاسوركەن اۋىلىنىڭ ماڭايىندا جەكە كاسىپكەر ساۋرانباەۆ ر. ءوزىنىڭ جەكە مەنشىك جەرىنە توعان سالىپ, جىلىنا 30 تونناعا دەيىن بالىق ءوندىرىپ وتىر. ونىڭ ۇستىنە, توعان جاعالاۋىنا دەمالاتىن ورىن سالىپ, قىزمەت كورسەتۋدە» - دەيدى رۋسلان بالتاەۆ.
سونىمەن قاتار, وڭىرىمىزدە تاۋارلى بالىق ءوسىرۋ كاسىبىن ورىستەتۋ جولعا قويىلۋدا. وبلىس اكىمىنىڭ تاپسىرماسىنا سايكەس, وڭىرىمىزدەگى وزەندەردىڭ جاعاسىنان بالىق شارۋاشىلىعىن جۇرگىزۋگە قولايلى جەرلەردى انىقتاۋ ماقساتىندا ارنايى توپ قۇرىلعان. جۇمىسشى توپ زەردەلەۋ جۇمىستارىن جۇرگىزىپ, قورداي, شۋ جانە مويىنقۇم اۋداندارى ارقىلى وتكەن شۋ وزەنىنىڭ ارناسىن جانە جامبىل مەن بايزاق اۋداندارى ارقىلى وتكەن تالاس وزەنىنىڭ ارناسىنان توعان جاساۋعا جارامدى 24 جەر ۋچاسكەلەرىن انىقتاعان. قورداي, شۋ جانە مويىنقۇم اۋداندارىنداعى شۋ وزەنىنىڭ بويىندا بارلىعى 119 گەكتاردى قۇرايتىن 13 ۋچاسكە انىقتالىپ وتىر. مامانداردىڭ ايتۋىنشا, وسى ۋچاسكەلەردە بالىق ءوسىرۋ توعانى جاسالسا 238 توننا تاۋارلى بالىق وسىرۋگە مۇمكىن بولماق. ال جامبىل جانە بايزاق اۋداندارىنداعى تالاس وزەنىنىڭ بويىنان 16,6 گەكتار اۋماقتى قۇرايتىن 11 ۋچاسكە الىنىپ, ول جەردە 24,8 توننانى قۇرايتىن تاۋارلى بالىق وسىرۋگە بولاتىندىعىن العا تارتۋدا.
سونداي اق, تاۋ بوكتەرلەرىندەگى سالقىن سۋلاردا فورەل شارۋاشىلىعىن دامىتۋ بويىنشا قارقىندى جۇمىستار باستالعان. فورەل بالىعىن وسىرۋگە قولايلى وزەندەردى انىقتايتىن جانە رەزەرۆتىك قورداعى بالىق شارۋاشىلىعى سۋ ايدىندارىنا عىلىمي زەرتتەۋ جۇمىستارعا وبلىستىق بيۋدجەتتەن 29,5 ملن. تەڭگە ءبولىنىپ, بۇگىنگى كۇنى كونكۋرس جەڭىمپازى «بالىق شارۋاشىلىعى عىلىمي-وندىرىستىك ورتالىعى» جشس-ءى تانىلعان. بۇل ورتالىق قورداي, مەركى, ت.رىسقۇلوۆ, جۋالى اۋداندارىنىڭ تاۋ بوكتەرلەرىندەگى 22 تاۋ وزەندەرىنە جانە 36 بالىق شارۋاشىلىعى سۋ ايدىندارىنا عىلىمي زەرتتەۋ جۇمىستارىن جۇرگىزۋدە.
سۋ ايدىندارىندا بالىق سانىن كوبەيتۋ ءۇشىن ءبىرىنشى بالىقتاندىرۋ جۇمىستارىن جۇيەلى جالعاستىرۋ كەرەكتىگى انىق. بۇل باعىتتا كۇزگى بالىقتاندىرۋ قارقىندى ىسكە اسۋدا. ءاربىر بالىق شارۋاشىلىعى سۋ ايدىنىنداعى بالىقتاندىرۋ جۇمىسى باسقارمانىڭ جانە جامبىل وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىمەن قۇرىلعان بالىقتاندىرۋ جۇمىستارى كوميسسيانىڭ كەسىمى ارقىلى قابىلدانۋدا. بۇل شاباقتاردىڭ باسىم كوپشىلىگى شاباق وسىرەتىن نەگىزگى تالىمباق - «ساندەل» شارۋا قوجالىعىنان الىنۋدا. بۇل تالىمباق 10 ملن شاباق وسىرۋگە قاۋقارلى.
