بۇگىن, 18 قاراشا كۇنى الماتىدا كسرو جانە قازاقستان حالىق ءارتىسى, اسا تانىمال وپەرا ءانشىسى ەرمەك سەركەباەۆپەن قوشتاسۋ ءراسىمى بولدى. ايگىلى ءانشىنى سوڭعى ساپارعا شىعارىپ سالۋعا ارنالعان قارالى ميتينگ ونىڭ ءوزى كوپ جىلدار ەڭبەك ەتكەن اباي اتىنداعى وپەرا جانە بالەت تەاترىنىڭ عيماراتىندا ءوتتى. بۇل تۋرالى NewTimes.kz اقپارات اگەنتتىگى حابارلادى.
الماتى قالالىق اكىمدىگى ءباسپاسوز قىزمەتىنىڭ مالىمەتى بويىنشا, قارالى ميتينگىدە قالا اكىمى احمەتجان ەسىموۆ مەملەكەت باسشىسى نۇرسۇلتان نازارباەۆتىڭ كوڭىل قوسىن بىلدىرگەن جەدەلحاتىن وقىپ بەردى. وندا ەرمەك سەركەباەۆتىڭ ەڭبەگى ەلىمىزدىڭ ءان ونەرى تاريحىندا, ال ەسىمى حالىقتىڭ جۇرەگىندە ماڭگى قالاتىنى ايتىلعان. ەلباسى كوڭىل ايتۋىن وقىپ تۇرىپ ا.ەسىموۆ: «داۋىسى قانداي اسەم بولسا, جانى دا سونداي سۇلۋ ونىڭ ورىنداۋىنداعى قازاقتىڭ حالىق اندەرى مەن الەمدىك وپەرا تۋىندىلارىنداعى باستى اريالار تىڭداۋشىلاردىڭ جانىن ءاردايىم نۇرعا بولەيتىن», – دەدى. سوڭىنان جەدەلحاتتى ءارتىستىڭ ۇلى بايعالي سەركەباەۆقا بەردى.
مادەنيەت جانە اقپارات ءمينيسترى مۇحتار قۇل-مۇحاممەد بارىنشا باياندى ءومىر ءسۇرىپ, ۇلكەن جەتىستىكتەرگە جەتكەن ەرمەك سەركەباەۆتىڭ ارتىندا وشپەس ءىز قالدىرعانىن, تالانتتى بالالار ءوسىرىپ شىعارعانىن, كوپتەگەن شاكىرت دايىنداعانىن اتاپ ءوتتى.
بۇل كۇنى ەرمەك سەركەباەۆتىڭ تۋعان-تۋىستارىنا كوڭىل ايتۋ ءۇشىن سونداي-اق بيبىگۇل تولەگەنوۆا, ءاسانالى ءاشىموۆ, ەرمەك امانشاەۆ, ءجانيا اۋباكىروۆا, مارات بيسەنعاليەۆ سىندى كوپتەگەن ونەر قايراتكەرلەرى, ارتىستەر مەن انشىلەر, سونداي-اق ءانشىنىڭ تالانتىنا تابىنۋشى جۇرتشىلىق كەلدى.
ەرمەك سەركەباەۆ 2013 جىلى ۇزاققا سوزىلعان ناۋقاستان كەيىن جاسى 88-گە قاراعان شاعىندا ومىردەن ءوتتى.
مۇرات ايتقوجا.
