تاجىكستان پرەزيدەنتى ەمومالي راحمون ءوز جارلىعىمەن ۇكىمەتتى وتستاۆكاعا جىبەردى. بۇل تۋرالى ريا «نوۆوستي» حابارلادى.
«بۇل – ەلىمىزدىڭ كونستيتۋتسياسىنا ساي, جاڭا مەملەكەت باسشىسى سايلانعاننان كەيىن بولاتىن قۇبىلىس», – دەدى تاجىكستان پرەزيدەنتى ءباسپاسوز قىزمەتىنىڭ وكىلى ريا «نوۆوستي» تىلشىسىنە بەرگەن سۇحباتىندا. سونداي-اق ول جاڭا كابينەت قۇرامى قۇرىلعانعا دەيىن ۇكىمەت مۇشەلەرى ءوز جۇمىستارىن جالعاستىرا بەرەتىنىن ەسكەرتتى. تاجىكستان كونستيتۋتسياسى بويىنشا, پرەزيدەنت ۇكىمەتتىڭ دە باسشىسى بولىپ تابىلادى. ال ۇكىمەت مۇشەلەرى قاتارىنا پرەمەر-مينيستر, ونىڭ ورىنباسارلارى, مينيسترلەر مەن مەملەكەتتىك كوميتەتتەردىڭ باسشىلارى كىرەدى.
6 قاراشا كۇنى تاجىكستاندا پرەزيدەنت سايلاۋى بولىپ ءوتتى. وندا سايلاۋشىلاردىڭ 84,23 پايىز داۋسىن جيناعان ەمومالي راحمون ءتورتىنشى مارتە جەڭىسكە جەتتى.
ايدار ورىسباەۆ.
