جوعارىدا ايتىلعانداي, اعزانىڭ ءبىر مۇشەسى سىر بەرە قالسا عانا مەديتسينا قىزمەتكەرلەرىنەن كومەك سۇراۋعا ءماجبۇر بولامىز. وسى قاتاردا دارىگەرلەر, مەدبيكەلەر جانە مەديتسينا مەكەمەلەرىنىڭ وزگە دە وكىلدەرى بار ەكەنى بەلگىلى. مىڭداعان ادامداردىڭ ومىرىنە اراشا ءتۇسىپ جۇرگەن اق حالاتتى ابزال جانداردىڭ ەڭبەگى شىن مانىندەگى ۇلى ءىس دەپ اتاۋعا ابدەن لايىقتى.
سولاردىڭ ءبىرى – «بۋراباي» رەسپۋبليكالىق وڭالتۋ ورتالىعى» رمك مەدبيكەسى تامارا قامەتوۆا. سوڭعى ۋاقىتتا وكپە جانە وزگە دە تىنىس مۇشەلەرى دەرتىنە تاپ بولعاندار ءجيى كەزدەسەدى. ونى تولىق جازىپ, ەمدەۋ ەكى كەزەڭنەن تۇرادى ەكەن. بۇل باعىتتا وڭالتۋ ساتىسىنىڭ اتقاراتىن ءرولى وتە جوعارى. وسى رەتتە تامارا تۇسىپبەكقىزى ۇلكەن مەن كىشىنىڭ, ناقتىراق ايتقاندا, بالالار مەن جاسوسپىرىمدەردىڭ ءارى ەگدە جاستاعى ادامداردىڭ جاي-كۇيىن بارومەتردەي باقىلاي الاتىن ءوز ءىسىنىڭ شىنايى شەبەرى ەكەنىن ايتۋعا ءتيىسپىز. ونىڭ ۇزاق جىلدان بەرى جيناقتاعان باي تاجىريبەسى وزگە ارىپتەستەرىنە ۇلگى-ونەگە بولارلىقتاي. ادامداردىڭ جاراتىلىسى مەن ءبىتىم-بولمىسى جانە دەرتتىڭ پايدا بولۋى مەن تارالۋ جولدارى بىرىنە-ءبىرى مۇلدە ۇقسامايدى. قانشا اعزا بولسا, سونشا ءتۇرلى ەرەكشەلىك بولۋى جازىلماعان زاڭدىلىق سەكىلدى. ناۋقاستىڭ كوڭىل-كۇيىنىڭ قالىپتى بولۋى وڭالتۋ شارالارىنىڭ ناتيجەلى بولۋىنىڭ باستى ءبىر كەپىلى. بۇل تۇرعىدا بۇگىنگى اڭگىمەمىزدىڭ كەيىپكەرى ەمدەۋشى دارىگەرمەن ءوزارا كەلىسىپ, اقىلداسا وتىرىپ اركەز ولاردىڭ بابىن تابۋعا ۇمتىلىس جاساپ جۇرگەنى سۇيسىندىرەدى. دەنساۋلىق ساقشىلارى ءدارىنىڭ نەمەسە بۇگىنگى زاماناۋي مەديتسينالىق قۇرال-جابدىقتاردىڭ كومەگىمەن عانا ەمەس, جۇرەك جىلۋىمەن جانە جىلى شىرايلى قارىم-قاتىناسىمەن دە ەم الۋشىلارعا دەم بەرە الادى. مۇنداي بيىك ادامگەرشىلىك قاسيەت تامارانىڭ بويىندا ەجەلدەن قالىپتاسقانىن ۇجىم مۇشەلەرى مەن وڭالتۋ كەزەڭىندە بولعاندار ءجيى ايتادى.
تاعى ءبىر بايقاعانىمىز, تامارانىڭ قاي كەزدە دە ءوز قىزمەتىنە بيىك تالاپ ۇدەسىنەن قاراي بىلەتىندىگى, كاسىبي شەبەرلىگىن ودان ءارى ۇشتاپ, جەتىلدىرىپ وتىرۋعا ۇدايى قام-قارەكەت جاساۋعا ءازىر تۇراتىنى. جاڭانى ۇيرەنۋ قاي كەزدە دە, ءتىپتى زەينەت جاسىنا جەتكەن ۋاقىتتا دا كەشتىك ەتپەيتىنىن تامارا تۇسىپبەكقىزىنىڭ تاباندى ءىس-قيمىلى ارقىلى تاعى ءبىر ايقىن تۇيسىنگەندەي بولدىق. مىنە, ول تالاپ پەن جان جىلۋىن وسىلايشا ءبىر-بىرىمەن ۇشتاستىرىپ كەلەدى. ءوز تاجىريبەسىن كەيىنگى جاس بۋىن, ورتا مەديتسينا قىزمەتكەرلەرىمەن ۇدايى ءبولىسىپ جۇرگەنى دە ونىڭ ادامي ءبىتىم-بولمىسىن بيىكتەتە تۇسەدى.
دەنساۋلىق ساقتاۋ ءىسىنىڭ ۇزدىگى, سونىمەن بىرگە ونەگەلى وتباسىنىڭ ۇيىتقىسى, ادال جار, اسىل انا تامارا قامەتوۆانىڭ ورتا بۋىن مەديتسينا قىزمەتكەرى رەتىندە وڭالتۋ قىزمەتىندە جيناقتاعان باي تاجىريبەسى بۇل سالاداعى ورتاق ىسكە قوسىلعان سۇبەلى ۇلەس بولىپ سانالادى. قاي كەزدە دە ەم الۋشىلارعا جاناشىرلىق تانىتىپ, ولاردىڭ جاندارىنان تابىلا بىلگەن تامارانىڭ جۇلدىزى جوعارى بولا بەرەرى تالاسسىز.
تەمىر قۇسايىن,
«Egemen Qazaqstan»
اقمولا وبلىسى,
بۋراباي اۋدانى
