ءدارىحانالاردا مەديكامەنتتەردى قىمبات باعادا ساتۋعا قاتىستى 1 مىڭعا جۋىق دەرەك تىركەلدى. مىسالى, باتىس قازاقستان وبلىسىنداعى ءدارىحانالاردىڭ بىرىندە «اربيدول» ءدارىسىنىڭ باعاسى شەكتى دەڭگەيدەن ەكى ەسە جوعارىلاتىلىپ, بەكىتىلگەن 2312 تەڭگەنىڭ ورنىنا 5000 تەڭگەدەن ساتىلعان.
سونىمەن قاتار ءدارىحانالاردان تىس جەرلەردە قاۋىپسىزدىك ليتسەنزيالارى مەن سەرتيفيكاتتارى جوق ءدارى-دارمەكتەر مەن مەديتسينالىق بۇيىمداردى زاڭسىز ساتۋعا قاتىستى 300-دەن استام جاعداي انىقتالدى. سونىڭ ىشىندە, جامبىل وبلىسىندا ءدارى-دارمەكتەرگە جالعان قاۋىپسىزدىك سەرتيفيكاتى جاسالعان جانە فارماتسەۆتيكالىق قىزمەتكە ليتسەنزياسى جوق قۇنى 44 ميلليون تەڭگە بولاتىن قىرعىزستاننان اكەلىنگەن 82 پرەپارات ءتۇرىن ساتۋعا توسقاۋىل قويىلدى.
جالپى, زاڭسىز اينالىمنان قۇنى 230 ميلليون تەڭگەدەن اساتىن 10 ميلليون بۋما ءدارى-دارمەك پەن مەديتسينالىق بۇيىم تاركىلەندى. انىقتالعان زاڭ بۇزۋشىلىق دەرەكتەر بويىنشا 3 سوتقا دەيىنگى تەرگەۋ امالدارى جۇرگىزىلۋدە جانە 1183 ادام اكىمشىلىك جاۋاپقا تارتىلعان.
دەنساۋلىق ساقتاۋ مينيسترلىگى ءدارى-دارمەكتەردىڭ بولشەك ساۋداداعى شەكتى باعاسىن قويۋ ءۇشىن ولاردىڭ ءتىزىمىن تولىقتىرۋ ماسەلەسىن پىسىقتاۋدا. سونىمەن قاتار مەديتسينا قىزمەتكەرلەرىنە ۇستەمەاقى تولەۋ كەزىندە بولاتىن زاڭ بۇزۋشىلىقتاردى انىقتاۋعا قاتىستى كەشەندى شارالار جالعاسۋدا.
جۇرگىزىلىپ جاتقان جۇمىستار مەن قىلمىستىق ىستەردىڭ تەرگەلۋى قاۋىپسىزدىك كەڭەسى اپپاراتىنىڭ قاتاڭ باقىلاۋىندا.
