بۇگىنگى جارمەڭكەگە 130-دان استام شارۋا قوجالىقتارى ءوز ونىمدەرىن اكەلدى. تارازى باسىندا ساۋدالاناتىن تاۋاردىڭ جالپى كولەمى 140 توننانىڭ ۇستىندە. قالا حالقىنا 28 توننا ەت ونىمدەرى, 19 توننا سيىر ەتى, 5 توننا جىلقى ەتى, 100 كەلى قوي ەتى, 400 تونا قۇس ەتى ارزان باعامەن ۇسىنىلىپ وتىر. سونىمەن قاتار, 14 توننا جوعارعى سۇرىپتى ۇن, 5,5 توننا ماكارون, 144 مىڭ جۇمىرتقا, 10 توننا وسىمدىك مايى اكەلىندى. تۇراقتاندىرۋ قورىنان جالپى كولەمى 55 توننا بولاتىن 7 ءتۇرلى الەۋمەتتىك ماڭىزى بار ازىق-ت ۇلىك ساۋدالانادى, دەدى اۋىل شارۋاشىلىعى باسقارماسىنىڭ باسشىسى تيمۋر بيسەمباەۆ.
قالا تۇرعىندارى مۇنداي سەنبىلىك جارمەڭكەلەردىڭ شەكتەۋ شارالارىنا قاراماستان ءجيى ءوتىپ تۇرعانىن قالايدى. ويتكەنى ساۋداسى جۇرگەن ساتۋشى دا, ارزان باعاعا كەرەگىن تاپقان تۇتىنۋشى دا ريزا.
- سيىر ەتىن 1800 تەڭگەدەن ساتتىم. ءبىر جارىم ساعاتتىڭ اينالاسىندا تۇك قالدىرماي الىپ كەتتى. كەشە ادەيى دۇكەنگە كىرىپ, ەتتىڭ باعاسىن ءبىلدىم. سيىردىڭ ءبىر كەلى ەتى 2600-2800 تەڭگەدەن ساتىلىپ جاتىر. الىپساتارلارعا ەت وتكىزەيىن دەسەم, كەلىسىن 1200 تەڭگەدەن سۇرايدى. بۇگىن مۇندا كەلىپ, ءوز ماڭداي تەرىممەن باققان مالدى لايىقتى باعاعا وتكىزدىم. بىزگە دە جاقسى, ساتىپ الۋشىعا دا ءتيىمدى. سوندىقتان حالىققا جارمەڭكەنىڭ اپتاسىنا ءبىر بولماسا دا, ايىنا ەكى رەت ءوتىپ تۇرعانى پايدالى, دەيدى التىنسارين اۋدانىنان كەلگەن فەرمەر مارات ساعىندىقوۆ.
