2020 جىلعى 14 قازاننان باستاپ باسپاناعا مۇقتاج جان رەتىندە 1986 جىلدان باستاپ 2017 جىلعا دەيىنگى مەرزىمدى قوسا العاندا, اكىمدىكتەر كەزەگىنە تۇرعان قازاقستان رەسپۋبليكاسىنىڭ ازاماتتارىنان ءوتىنىش قابىلداۋدىڭ ءۇشىنشى كەزەڭى باستالادى. ياعني ەندى جوباعا 2016-2017 جىلدار ارالىعىندا اكىمدىك كەزەگىنە تۇرعان ازاماتتار دا قاتىسا الادى.
باعدارلاماعا قاتىسۋ ءۇشىن سوڭعى التى اي ىشىندەگى وتباسىنىڭ ءار مۇشەسىنە كەلەتىن وتباسىلىق تابىستىڭ ءبىر ايلىق كولەمى 3,1 كۇنكورىس مينيمۋمىنان اسپايتىن (2020 جىلدىڭ 1 ساۋىرىنەن باستاپ كۇنكورىس مينيمۋمى – 32 668 تەڭگەگە تەڭ) ەڭبەك جانە (نەمەسە) كاسىپكەرلىك قىزمەتتەن تۇسەتىن كىرىستىڭ (زەينەتاقى اۋدارىمدارىن, جەكە تابىس سالىعى مەن باسقا دا مىندەتتى اۋدارىمداردى ەسەپتەمەگەندە) بولۋى تالاپ ەتىلەدى. ياعني 2020 جىلى وتباسىنىڭ ءار مۇشەسىنە كەلەتىن تابىس كولەمى 101 271 تەڭگەدەن اسپاۋى ءتيىس.
باعدارلامانىڭ ءبىرىنشى كەزەڭىندە 19 140 ءوتىنىش قابىلداندى, ونىڭ 6 690-ى كەزەككە تۇرۋ مەرزىمىنە (1986-2010 جىلدار) ساي كەلدى. ناتيجەسىندە, جالپى كولەمى 6 ملرد-تان استام تەڭگەگە 470 نەسيەلىك ءوتىنىش ماقۇلداندى.
باعدارلامانىڭ ەكىنشى كەزەڭىندە 18 770 ءوتىنىش قابىلداندى, ونىڭ 14 061-ءى كەزەككە تۇرۋ مەرزىمىنە (2011-2015 جىلدار) ساي كەلدى. ناتيجەسىندە, جالپى كولەمى 14 ملرد-تان استام تەڭگەگە 1 031 نەسيەلىك ءوتىنىش ماقۇلداندى.
ەكى كەزەڭدى قوسا العاندا 37 910 ءوتىنىش قابىلدانىپ, ونىڭ 20 751-ءى كەزەككە تۇرۋ ۋاقىتىنا (1986-2015 جىلدار) ساي كەلدى. ناتيجەسىندە, جالپى كولەمى 20 ملرد 300 ملن تەڭگەگە جۋىق قاراجاتقا 1500 نەسيەلىك ءوتىنىش ماقۇلداندى.
«شاڭىراق» قاناتقاقتى جوباسىن جۇزەگە اسىرۋ ءۇشىن ۇلتتىق بانكتىڭ ەنشىلەس ۇيىمىنىڭ قاراجاتىنان 210 ملرد تەڭگە كولەمىندە قاراجات ءبولۋ جوسپارلانعان. ونىڭ 90 ملرد تەڭگە كولەمىندەگى العاشقى بولىگى تۇرعىن ءۇي قۇرىلىس جيناق بانكىنە ءتۇستى. وسى بيۋدجەتكە سايكەس ەلىمىزدىڭ شامامەن 7-8 مىڭداي وتباسىن باسپانامەن قامتاماسىز ەتۋ جوسپارلانىپ وتىر. جىلدىق مولشەرلەمەسى 5 پايىزعا تەڭ (جتسم 5,2%), جەڭىلدەتىلگەن زايمدى الۋ ءۇشىن باعدارلاما قاتىسۋشىلارى اكىمدىك كەزەگىندە تۇرۋلارى قاجەت. سونداي-اق تۇرعىن ءۇي قۇرىلىس جيناق بانكىندەگى شوتتارىنا زايم مولشەرىنىڭ 10 پايىزىنان كەم تۇسپەيتىن سومانى باستاپقى جارنا رەتىندە جيناۋى قاجەت. نەسيەلەندىرۋ مەرزىمى 20 جىلعا دەيىن.
اتالعان باعدارلاما بويىنشا تۇرعىن ءۇيدى تەك جاڭا سالىنعان ۇيلەردەن عانا الۋعا بولادى. بۇل «5-10-20» باعدارلاماسى بويىنشا جەرگىلىكتى اكىمدىكتەر سالىپ جاتقان نەسيەلىك تۇرعىن ۇيلەر مەن جەكە قۇرىلىس كومپانيالارى سوققان ۇيلەر (سونداي-اق «تۇرعىن ءۇي قۇرىلىسىنا كەپىلدىك بەرۋ قورى» اق كەپىلدىگى بار).
«شاڭىراق» باعدارلاماسى بويىنشا پاتەر الۋعا بولاتىن قۇرىلىس كومپانيالارىنىڭ ءتىزىمىن www.hcsbk.kz سايتىنان جۇكتەپ الۋعا بولادى. اكىمدىكتەر سالعان نەسيەلىك تۇرعىن ۇيلەردىڭ 1 شارشى مەترى بويىنشا كەلەسى باعا مولشەرلەرى بەلگىلەنگەن: الماتى قالاسىندا – 240 مىڭ تەڭگەگە دەيىن, نۇر-سۇلتان قالاسىندا – 220 مىڭ تەڭگەگە دەيىن, شىمكەنت قالاسى مەن الماتى ماڭىنداعى ايماقتاردا – 200 مىڭ تەڭگەگە دەيىن, اقتوبە, اتىراۋ, اقتاۋ, تۇركىستان, قاراعاندى قالالارى مەن قاراعاندى وبلىسىندا – 180 مىڭ تەڭگەگە دەيىن, باسقا وڭىرلەردە – 160 مىڭ تەڭگەگە دەيىن. پاتەرلەر جەكە قۇرىلىس كومپانيالارى سوققان ۇيلەردەن ساتىپ الىنعان جاعدايدا ەڭ جوعارى زايم سوماسى نۇر-سۇلتان مەن الماتى قالالارىندا – 18 ملن تەڭگە, اتىراۋ, اقتاۋ, اقتوبە, شىمكەنت, تۇركىستان, قاراعاندى قالالارى مەن قاراعاندى وبلىسىندا 15 ملن تەڭگەگە دەيىن, ال قالعان وڭىرلەردە 12 ملن تەڭگەگە دەيىنگى باعا ۇسىنىلعان. اكىمدىك كەزەگىندە تۇرعان ازاماتتار باعدارلاماعا قاتىسۋ تۋرالى جانە تولەمگە قابىلەتتىگىن باعالاۋ جونىندەگى وتىنىشتەرىن تەك
www.hcsbk.kz سايتى ارقىلى ەلەكتروندى تۇردە بەرە الادى. بۇل تۇرعىن ءۇي قۇرىلىس جيناق بانكىنىڭ كليەنتتەرىنە دە, ازىرشە بانكتەن سالىم اشىپ, كليەنتتەر قاتارىنا قوسىلىپ ۇلگەرمەگەن تۇرعىندارعا دا قاتىستى. ءوتىنىش بەرۋ مەرزىمى 2020 جىلدىڭ 14 قازان – 13 قاراشا ارالىعىندا جۇرگىزىلەدى. اكىمدىك كەزەگىنە قاي ۋاقىتتان باستاپ ەسەپكە تۇرعانىڭىزدى egov.kz سايتى ارقىلى نەمەسە جەرگىلىكتى اتقارۋشى بيلىك ورگاندارىنان بىلۋگە بولادى.
باعدارلاماعا قاتىسۋ ءۇشىن جاسالاتىن 6 قادام:
1-قادام: www.hcsbk.kz بانك سايتىنداعى «قولجەتىمدى تۇرعىن ۇي/«شاڭىراق» پيلوتتىق جوباسى ءبولىمى ارقىلى ەلەكتروندىق ءوتىنىش بەرۋ;
2-قادام: بانك سايتىندا ءوتىنىش بەرگەن كۇننەن باستاپ 3 كۇن ارالىعىندا بانك قىزمەتكەرىنىڭ قوڭىراۋىن كۇتىپ, وعان جاۋاپ بەرۋ. ول نەسيەلەندىرۋ شارتتارى مەن باعدارلاما تالاپتارىن ءجىتى ءتۇسىندىرىپ, ءوتىنىش تاپسىرۋ ءۇشىن ءسىزدى بانك بولىمشەسىنە جازادى;
3-قادام: تولەم قابىلەتتىلىگىڭىزدى باعالاۋ ءۇشىن قۇجاتتارىڭىزدى الىپ, بانك بولىمشەسىنە بەلگىلەنگەن ۋاقىتتا كەلۋ;
4-قادام: زايمدى ماقۇلداۋ جونىندە بانكتىڭ وڭ شەشىمىن الۋ;
5-قادام: بانك تالاپتارىنا ساي, جەكە قۇرىلىسشىلاردان جاڭا تۇرعىن ءۇي تابۋ (سونداي-اق «تۇرعىن ءۇي قۇرىلىسىنا كەپىلدىك بەرۋ قورى» اق كەپىلدىگى بار), ساتۋ-ساتىپ الۋ نەمەسە ۇلەستىك قاتىسۋ كەلىسىمدەرىن جاساۋ;
6-قادام: بانكتەن زايم الۋ!
زايمدى الۋ ءۇشىن ءوتىنىش بەرۋشىنىڭ جيناق شوتىندا نەسيە كولەمىنىڭ 10%-ىنان كەم تۇسپەيتىن تۇرعىن ءۇي قۇرىلىس جيناعى بولۋ كەرەك.
