«اقپاراتتىق-ەسەپتەۋ ورتالىعى» اق ءباسپاسوز قىزمەتىنىڭ مالىمەتىنشە, ساقتاندىرۋ ەكى ونىممەن ۇسىنىلعان. ءبىرىنشىسى, ساقتاندىرۋ شارۋاشىلىق اۋماعىندا جۇرگىزىلسە, ەكىنشى ساقتاندىرۋ كەڭەيتىلگەن, ياعني شارۋاشىلىقتان 5 شاقىرىم راديۋستى قۇرايتىن كولەمدە جۇرگىزىلەدى. اسىل تۇقىمدى جانە قاراپايىم سيىرلاردى ساقتاندىرۋ مۇمكىندىگى بار. ەڭ تومەنگى سانى 30 ءىرى قارا بولۋى شارت.
تۇسىنىكتى بولۋ ءۇشىن ەكى مىسالدى قاراستىرايىق. مىسالى, فەرمەردە 30 باس اسىل تۇقىمدى, جەتكىلىكتى ءىرى قارا بار, ءبىر باستىڭ ورتاشا قۇنىن فەرمەر 500 مىڭ تەڭگەگە باعالايدى دەلىك. 30 باس – ساقتاندىرۋعا جاتاتىن مينيمالدى تابىن. وسىنداي مال سانىنا تاريف ەڭ جوعارى – 2,31%. بۇل مىسالدا ساقتاندىرۋ سوماسى 15 ملن تەڭگەنى (30ح500 000) قۇرايدى. تولەم ءۇشىن سىيلىقاقى – 346 500 تەڭگە.
وسى جەردە ارنايى تۇسىندىرمە قاجەت. ساقتاندىرۋ كەزىندە اۋىل شارۋاشىلىعىن قارجىلاي قولداۋ قورى ارقىلى تولەنەتىن 50%-دىق مەملەكەتتىك سۋبسيديا بار. ءىس جۇزىندە, ساقتاندىرۋ شارتىن جاساعاندا, مال وسىرۋشىگە بۇل سومانىڭ تەك جارتىسىن, ياعني 173 250 تەڭگەنى تولەۋى قاجەت. وسىلايشا ەگەر بۇكىل تابىن تاسقىن سۋعا باتىپ كەتسە نەمەسە زيانكەستەر باسىپ السا, ساقتاندىرۋ تولەمى 14 ملن 500 مىڭ تەڭگەنى قۇرايدى. قالعان بولىگى (500 مىڭ تەڭگە) – كەز كەلگەن جاعدايدا ساقتاندىرۋ كومپانياسىندا قالاتىن ءسوزسىز اۋدارىلىم.
ەگەر بۇكىل تابىن ەمەس, تەك 5 باس قانا زارداپ شەكسە, بۇل ءۇشىن تولەم 2 ملن تەڭگەنى قۇرايدى (4 باس ءۇشىن). قاراپايىم تىلمەن ايتقاندا, ءبىر سيىر ارقاشان ساقتاندىرۋ كومپانياسىنىڭ پايداسىنا شىعادى.
ناتيجەسىندە, جىلىنا ءبىر باس ءۇشىن 5 775 تەڭگە (173 250 / 30 باس) تولەگەن فەرمەر بولاشاقتا ءوزىن كوپتەگەن قيىنشىلىقتاردان قۇتقارا الادى.
ەڭ تومەنگى تاريف كورسەتكىشى – 1,54%, بۇل تەك 100 جانە ودان كوپ باس مالدى ساقتاندىرۋدان باستالادى. تۇسىنىكتى بولۋ ءۇشىن تاعى دا مىسال كەلتىرەلىك. ساقتاندىرۋ شارتى بويىنشا بار-جوعى 385 مىڭ تەڭگەنى تولەي وتىرىپ ء(دال سول مولشەردە مەملەكەتتەن سۋبسيديا الىنادى), ءسىز قانداي دا ءبىر سەبەپپەن مال ءولىمىنىڭ سالدارىنان قورعانا الاسىز. سونىمەن بىرگە 1 باستى ساقتاندىرۋ قۇنى نەبارى 3 850 تەڭگەنى قۇرايدى. اسىل تۇقىمدى سيىرلاردىڭ ناقتى قۇنىن ەسكەرەتىن بولساق, بۇل ونشا كوپ ەمەس.
– اتاپ ءوتۋ كەرەك, تاراپتار قول قويعان ساقتاندىرۋ شارتى, قول قويىلعاننان كەيىن ءبىر ايدان كەيىن عانا «جۇمىس ىستەي» باستايدى. بۇل جالعان سحەمالاردىڭ الدىن الۋ ءۇشىن جاسالادى. جالپى العاندا, مەحانيزمنىڭ ءوزى وتە قاراپايىم جانە ىڭعايلى. ويتكەنى كەلىسىم جاساۋدىڭ بارلىق پروتسەسى ونلاين رەجىمدە, Qoldau سايتىندا وتەدى. فەرمەر, بۇگىندە قىزمەت كورسەتەتىن 5 ساقتاندىرۋ كومپانيالارىنىڭ ىشىنەن تاڭداۋ جاساي الادى. ءبىزدىڭ كومپانيا ساقتاندىرۋمەن اينالىسپايدى, ءبىز اقپاراتتىق قىزمەتتى ۇسىنامىز. ساقتاندىرۋ كومپانيالارىنىڭ ءتىزىمى بويىنشا فەرمەر ءوزى سەنىمدى كومپانياعا تاۋەلسىز تاڭداۋ جاسايدى. مالدى ساقتاندىرۋ فەرمەرلەردىڭ نەسيە الۋى ءۇشىن وتە ماڭىزدى. ويتكەنى بانكتەر مەن قارجى ۇيىمدارى ساقتاندىرىلعان مالدى كەپىلدىككە الادى. بۇل – ۇلكەن جەتىستىك. فەرمەرلەر مۇنداي مەحانيزمدى كوپتەن كۇتتى, – دەپ تۇسىندىرەدى «AGROINSURANCE» كومپانياسىنىڭ مامانى ماشۋر زارلىق.
ساقتاندىرۋ جاعدايى تۋىنداعان جاعدايدا فەرمەر تولەمدەرگە ونلاين رەجىمىندە, سونداي-اق «AGROINSURANCE» قىزمەتىن پايدالانا وتىرىپ, Qoldau پورتالى ارقىلى جۇگىنە الادى. ساقتاندىرۋ كومپانياسى كەلىسىمشارتقا سايكەس دەرەكتەردى تەكسەرۋ ءۇشىن شارۋا قوجالىعىنا بارۋعا قۇقىلى.
