«MED-EL جۇلدىزى» اتتى مۋزىكا فەستيۆالىنە قوستانايلىق جاس دارىنمەن قاتار, رەسەي, ۋكراينا سياقتى كوپتەگەن ەلدىڭ ونەرپاز ورەندەرى قاتىسقان. شىڭعىس بايقاۋعا قوستاناي قالاسىنىڭ ورتالىعىندا تۇسىرىلگەن «Rise like a phoenix» ءانىنىڭ بەينەبايانىن جىبەرىپتى.
– ۇلىم وتيتپەن اۋىرىپ, ءۇش جاسىندا مۇلدەم ەستۋ قابىلەتىن جوعالتتى. ءتورت جاسقا تولعان سوڭ, يمپلانت ورناتتىق. ءتىلى قالىپتاسقان سوڭ, بالامىزدىڭ ءان سالۋدى ۇناتاتىنىن اڭعاردىق. ءسويتىپ, ۆوكال ۇيىرمەسىنە بەردىك. كەيىن بيگە جازىلىپ, ەكى ۇيىرمەنى قاتار الىپ ءجۇردى. شىڭعىس ەستۋ قابىلەتى زاقىمدانعان بالالارعا ارنالعان ارنايى بالاباقشادا تاربيەلەندى. بىراق قازىر كوپشىلىكپەن بىرگە جالپى ءبىلىم بەرەتىن مەكتەپكە بارىپ ءجۇر, – دەدى جاس ءانشىنىڭ اناسى ءلاززات اعىباەۆا.
قازىلار القاسى ءان فەستيۆالىنە قاتىسقان 85 ۇمىتكەردىڭ 16-سىن عانا فينالعا جىبەرگەن. 10 قازاندا وتكەن اقتىق كەزەڭنىڭ قورىتىندىسى بويىنشا ۇزدىكتەر قاتارىنان دارالانىپ شىققان شىڭعىس جەڭىمپاز اتاندى. اناسىنىڭ ايتۋىنشا, بۇل دارىندى ونەرپازدىڭ العاشقى جەڭىسى ەمەس. ول بۇعان دەيىن پولشا استاناسىندا دا ءان شىرقاپ, جەڭىس تۇعىرىنان كورىنىپتى.
قوستاناي وبلىسى
