الماتى قالالىق ەكونوميكالىق تەرگەۋ دەپارتامەنتىنىڭ قىزمەتكەرلەرى توتەنشە جاعداي كەزىندە زاڭسىز ويىن بيزنەسىن ۇيىمداستىرعان استىرتىن كازينو ۇيىمداستىرۋشىسىنا قاتىستى سوتقا دەيىنگى تەرگەۋدى اياقتادى.
"وسى جىلدىڭ مامىر ايىندا جۇرگىزىلگەن جەدەل-تەرگەۋ شارالارى بارىسىندا الماتىدا "ويىن بيزنەسى تۋرالى" زاڭنىڭ تالابىن بۇزعان جاسىرىن كازينو انىقتالدى. تەكسەرۋ كەزىندە مەكەمەدە ويىنشىلار مەن جۇمىسشىلار بولعان, ءارى پوكەر ۇستەلى, 13 دانا ويىن اۆتوماتى, رۋلەتكا ۇستەلى, سونداي-اق, كومپيۋتەرلىك تەحنيكا, نوۋتبۋك, تەلەديدارلار جانە ۇلتتىق جانە شەتەل ۆاليۋتاسىنداعى اقشا تاركىلەنگەن", دەپ حابارلادى قارجى مونيتورينگ كوميتەتىنىڭ ءباسپاسوز قىزمەتى.
بۇعان قوسا, الماتى قالاسى المالى اۋداندىق سوتىنىڭ ۇكىمىمەن جاسىرىن ويىنحانا ۇيىمداستىرۋشىسى قر قىلمىستىق كودەسىنىڭ 307-بابى 3-بولىگىنىڭ 2-تارماعىنا ("اسا ءىرى مولشەردە تابىس تابۋ جانە زاڭسىز ويىن بيزنەسىن ۇيىمداستىرۋ") سايكەس كىنالى دەپ تانىلدى. ءسويتىپ وعان 4 جىل 2 ايعا دەيىن باس بوستاندىعىنان ايىرۋ جازاسى تاعايىندالدى.
