ارقالىق قۇس فابريكاسىنداعى جاعداي ۇكىمەت پەن ايماق باسشىلىعىنىڭ ەرەكشە نازارىندا ەكەنىن ايتقان وبلىس اكىمى ءوندىرىستى قالپىنا قايتا كەلتىرۋ ماقساتىندا كاسىپورىنعا قولداۋ كورسەتىلەتىنىن جەتكىزىپ, فابريكا باسشىلىعىنا جۇمىسشىلاردى قىسقارتۋعا جول بەرمەۋدى تاپسىردى.
– ءدال قازىرگى جاعدايداعى ماڭىزدى ماسەلە – جۇمىسشىلاردىڭ قىسقارىپ قالۋىنا جول بەرمەۋ, ادامدار قالاي بولعاندا دا ءوز جۇمىستارىن جالعاستىرۋى كەرەك, – دەگەن ارحيمەد مۇحامبەتوۆ قۇس تۇماۋىن ءارى ورىستەتپەۋ ماسەلەسىنە توقتالدى. ودان سوڭ بۇعان دەيىن جىلىنا 120 ملن جۇمىرتقا شىعارىپ كەلگەن فابريكا ءوندىرىسىن 2022 جىلعا دەيىن جىلىنا 100 ملن جۇمىرتقا وندىرە الاتىن دەڭگەيگە جەتكىزىپ, بۇرىنعى قاۋقارىن قايتا قالپىنا كەلتىرۋ جوسپارى تالقىلاندى.
بۇگىنگە دەيىن فابريكادا 502 مىڭ 611 قۇس ولەكسەسى مەن 1 ملن 452 193 جۇمىرتقا جويىلىپ, كاسىپورىن اۋماعىن دەزينفەكتسيالاۋ جۇمىستارى اتقارىلىپ جاتىر. ىندەتكە قارسى سانيتارلىق وڭدەۋ, زارارسىزداندىرىپ, تازارتۋ شارالارى قاراشانىڭ باسىنا دەيىن جالعاساتىن بولادى. 9 قاراشادان باستاپ فابريكا عيماراتتارىنا زەرتحانالىق تەكسەرۋ شارالارىن جۇرگىزىپ, ۆەتەرينارلىق باقىلاۋدان وتكىزۋ جوسپارلانىپ وتىر. ودان كەيىن, ياعني قاراشا جانە اقپان ارالىعىندا قارجىلاندىرۋ كوزدەرى قاراستىرىلىپ, فابريكا ەسەپشوتىنا اقشا ءتۇسۋى ءتيىس. اقپان ايىندا شيكىزات, جەم, ۆەتەرينارلىق ءدارى-دارمەك ساتىپ الۋ كوزدەلگەن.
2021 جىلدىڭ اقپانىندا فابريكاعا 220 مىڭ باس بالاپان اكەلىنەدى. كاسىپورىن مامىردان باستاپ مەكيەندەردى ۇياشىقتارعا ورنالاستىرىپ, شىلدەدە قوسىمشا تاعى ءبىر لەك بالاپان ساتىپ اكەلۋدى جوسپارلاپ قويعان. ودان كەيىن فابريكا ءوندىرىسى اقىرىنداپ جاندانىپ, تاۋىقتار تامىز ايىنان باستاپ ساتۋعا كەلەتىن دايىن تاۋار كۇيىندەگى جۇمىرتقا تابا باستايدى. وسىلايشا, كەلەسى جىلى ارقالىق قۇس فابريكاسى ءوزىنىڭ وندىرىستىك قۋاتىنا تولىق كوشۋى ءتيىس.
كاسىپورىن باسشىلارىنىڭ ايتۋىنشا, ءوندىرىستى بىرتىندەپ وڭالتۋعا ارنالعان بىرجىلدىق جوسپاردى جۇزەگە اسىرۋ ءۇشىن 1,5 ملرد تەڭگەدەن استام قارجى كەرەك. «اگروينتەرپتيتسا» ىندەت باستالعالى 356 ملن تەڭگەنىڭ تابىسىنان قاعىلعان. فابريكاعا قۇس تۇماۋىنان كەلگەن جالپى شىعىن كولەمى 554 ملن 677 مىڭ تەڭگەگە جەتىپ وتىر. قازىردىڭ وزىندە كاسىپورىننىڭ 206 ملن 620 مىڭ تەڭگە نەسيە قارىزى بار. ءوندىرىس اقپانعا دەيىن جۇمىس ىستەمەگەن جاعدايدا جۇمىسشىلارعا بەرىلۋى ءتيىس جالاقى قورى – 84 ملن 800 مىڭ تەڭگە. ونىڭ ۇستىندە وسى كەزەڭ ارالىعىندا 65 ملن 790 مىڭ تەڭگە نەسيە قارىزى وتەلۋى كەرەك. مىندەتتى سالىق تولەمىنىڭ مولشەرى – 24 ملن تەڭگە.
ءوندىرىستى قايتا قالپىنا كەلتىرۋ جوسپارىن تاعى ءبىر قاراپ شىعىپ, پىسىقتاپ الۋ قاجەتتىگىن ەسكەرتكەن اكىم 250 ادامدى جۇمىسپەن قامتىپ وتىرعان ارقالىق قۇس فابريكاسىن مەملەكەت قولداۋسىز قالدىرمايتىنىن ايتتى.
ايماق باسشىسى ودان كەيىن ايدار اۋىلىنا ات باسىن بۇرىپ, بىلتىردان بەرى سالىنىپ جاتقان مال شارۋاشىلىعى كەشەنىنىڭ قۇرىلىسىمەن تانىستى. قۇنى 3,5 ملرد تەڭگە بولاتىن اۋقىمدى جوبا بويىنشا 76,5 گەكتار اۋماققا 7 500 باس اسىل تۇقىمدى ءىرى قاراعا ارنالعان بورداقىلاۋ الاڭى مەن اسىل تۇقىمدى مال باسىن كوبەيتەتىن ورتالىعى بار الىپ كەشەن سالىنۋى ءتيىس.
2019 جىلى قازان ايىندا باستالعان قۇرىلىس نىسانىنىڭ ءبىر بولىگى, ياعني بورداقىلاۋ الاڭى 2021 جىلدىڭ اقپان ايىندا پايدالانۋعا بەرىلمەك. ال اسىل تۇقىمدى مال باسىن كوبەيتەتىن رەپرودۋكتور سول جىلدىڭ قىركۇيەك ايىنان جۇمىس ىستەي باستايدى.
وبلىس اكىمى ات باسىن تىرەگەن كەلەسى نىسان ارقالىق جىلۋ-ەنەرگيا كومپانياسى بولدى. اكىم كوممۋنالدىق كاسىپورىنداعى جىلۋ ماۋسىمىنا دايىندىق بارىسىمەن تانىستى. قازىر مۇندا جىل سوڭىنا دەيىن جەتەتىن 6440 توننا مازۋت وتىنى بار.
– بيۋدجەتتەن 1,39 ملرد تەڭگە قاراستىرىلىپ وتىر. الداعى ۋاقىتتا ارقالىققا تاعى 18 500 توننا مازۋت اكەلىنەدى. بۇل وتىن كولەمى 2020-2021 جىلعى جىلۋ ماۋسىمىنا جەتۋى ءتيىس. جالپى, قالاداعى نىسانداردىڭ ءبارى قىسقى ماۋسىمعا تولىق دايىن ەكەنىنە كوز جەتكىزدىم, – دەدى ا.مۇحامبەتوۆ.
وبلىس اكىمى ودان كەيىن ارقالىق قالاسىن جىلۋمەن قامتۋ جۇيەسىن جاڭعىرتۋ جوباسىنىڭ جۇزەگە اسىرىلۋ بارىسىن تەكسەرىپ, جاڭا جىلۋ كوزدەرىنىڭ قۇرىلىسىمەن تانىستى. جوبانىڭ باستى ماقساتى – بۇعان دەيىن قىستان باعاسى ۋداي مازۋتپەن شىعىپ كەلگەن ارقالىقتى 2030 جىلعا دەيىن بىرتىندەپ كومىرمەن جىلىتۋعا كوشىرۋ. بۇل ماقساتقا 7,4 ملن تەڭگە بولىنگەن. بيىل جىل باسىندا جوسپارلانعان جۇمىستىڭ 43%-ى ەڭسەرىلىپ, 3 ملرد 200 ملن تەڭگە يگەرىلدى. قالانىڭ جاڭا جىلۋ ورتالىعى 2021 جىلدىڭ قىركۇيەك ايىندا پايدالانۋعا بەرىلەدى. بيىلعا ارقالىق جىلۋمەن جانە ەلەكتر قۋاتىمەن قامتاماسىز ەتەتىن ورتالىق مازۋت وتىنىن پايدالانادى. بىراق قازىردىڭ وزىندە قالاداعى بىرقاتار نىسان كومىرمەن جىلىتىلادى.
ارقالىق جىلۋ-ەنەرگيا كومپانياسىندا قازىر جاڭا جىلۋ جۇيەسىن قامتاماسىز ەتەتىن باس عيماراتتىڭ قۇرىلىسى ءجۇرىپ جاتىر. عيماراتقا ەكى تسيكلون, ەكى سۋ جىلىتقىش پەش ورناتىلدى. نىساندا بارلىعى 130 ادام جۇمىس ىستەپ جاتىر.
باس عيماراتتىڭ استىڭعى قاباتى توسەلىپ, تابانىنا بەتوندى-ەرىتىندى توراپ سالىندى. ەندى 3 بۋ قازاندىعى جانە سۋمەن جىلىتاتىن 2 قازاندىق ورناتىلادى. نىساندى ارالاپ كورگەن وبلىس اكىمى مەردىگەرگە قۇرىلىس-مونتاج جۇمىستارىن ۋاقتىلى اياقتاۋدى قاداپ تاپسىردى.
ودان كەيىن ا.مۇحامبەتوۆ «جۇمىسپەن قامتۋدىڭ جول كارتاسى-2020» باعدارلاماسى بويىنشا قولعا الىنىپ جاتقان جوبالاردىڭ جايىمەن تانىستى. اتالعان باعدارلاما بويىنشا بيىل ارقالىق وڭىرىندە جالپى قۇنى 1,1 ملرد تەڭگە بولاتىن 10 جوبا جۇزەگە اسىرىلىپ, ناتيجەسىندە 250 جاڭا جۇمىس ورنى اشىلعان. وبلىس اكىمى الدىمەن «جىگەر» ستاديونىنا باردى. ستاديونعا «اليۋميني قۇرىلىس» جشس كۇردەلى جوندەۋ جۇرگىزىپ, سپورت زالىن قايتا جاڭارتىپ جاتىر. جوبانىڭ قۇنى – 58,1 ملن تەڭگە. قۇرىلىس جۇمىستارى اياقتالىپ قالعان, قازىر 1600 كورەرمەنگە ارنالعان ورىندىقتار قويىلىپ جاتىر.
سونىمەن قاتار اتالعان باعدارلاما اياسىندا بيىل جازدا ارقالىقتاعى №2 ورتا مەكتەپكە كۇردەلى جوندەۋ اياقتالدى. مەكتەپ عيماراتىنىڭ شاتىرى, تەرەزەلەرى مەن كوممۋنيكاتسيا جۇيەسى اۋىستىرىلىپ, ءىشى-سىرتى ارلەنگەن. مۇنىڭ سىرتىندا, بيىل ءبىلىم وشاعىنىڭ جانىنان مەكتەپ جاسىنا دەيىنگى بالعىندارعا ارنالعان شاعىن ورتالىق اشىلىپ وتىر. ارقالىق ايماقتىق اۋرۋحاناسىنىڭ عيماراتى دا كۇردەلى جوندەۋدەن وتۋدە. بۇل اۋرۋحانادا بۇگىندە 360 ادام, ونىڭ ىشىندە 10 جوعارى بىلىكتىلىگى بار دارىگەر ەڭبەك ەتەدى.
اۋرۋحانا ۇجىمىمەن كەزدەسكەن ايماق باسشىسى ەمدەۋ مەكەمەسىنىڭ باس دارىگەرى نۇرلان ەرجانوۆتىڭ ەسەبىن تىڭدادى. باس دارىگەردىڭ سوزىنشە, اۋرۋحاناداعى ءدارى-دارمەك قورى 3 ايعا جەتەدى.
قوستاناي وبلىسى
