كەزدەسۋ بارىسىندا اليك شپەكباەۆ جەمقورلىققا قارسى ءتيىمدى ساياساتتى جۇرگىزۋ تاسىلدەرىمەن ءبولىسىپ, مەملەكەتتىك باسقارۋدىڭ ءتۇرلى سالالارى بويىنشا كەشەندى جانە جۇيەلى جۇمىستىڭ ماڭىزدىلىعىن اتاپ ءوتتى.
"قازىرگى تاڭداعى قازاقستاننىڭ جەمقورلىققا قارسى ساياساتىنىڭ باسىمدىقتارى – مەملەكەتتىك اپپاراتتى اشىقتىق پەن ايقىندىق قاعيداتتارىنا, تۇتىنۋشىعا باعدارلانعان قىزمەتكە تولىققاندى كوشىرۋ ارقىلى ترانسفورماتسيالاۋ, پاراساتتىلىق يدەولوگياسى تۇرعىسىنان اۋقىمدى اعارتۋ, ءتيىمدى الدىن الۋ جانە پارمەندى قىلمىستىق-قۇقىقتىق قۇرالدار. وسىنىڭ بارلىعىن ءبىز كۇندەلىكتى ىسكە اسىرۋدامىز", دەپ اتاپ ءوتتى ا. شپەكباەۆ.
ءوز كەزەگىندە, وزبەك سىبايلاس جەمقورلىققا قارسى ۆەدومستۆوسىنىڭ ديرەكتورى اكمال بۋرحانوۆ ەلدىڭ نەگىزگى حالىقارالىق رەيتينگتەردەگى دايەكتى وسۋىمەن وبەكتيۆتى تۇردە راستالعان قازاقستاننىڭ جەمقورلىققا قارسى ءىس-قيمىلداعى ىلگەرىلەۋىن اتاپ ءوتتى. سونداي-اق, جەمقورلىققا قارسى ءىس-قيمىلدىڭ ۇلتتىق قۇقىقتىق نەگىزدەرىن قالىپتاستىرۋ كەزىندە قازاقستان تاراپىنان كونسۋلتاتسيالىق جانە پراكتيكالىق قولداۋعا مۇددەلىلىگىن ءبىلدىردى.
سونىمەن قاتار, شەتەلدىك سپيكەر ەكى ەلدەگى جەمقورلىققا قارسى ءىس-قيمىلدىڭ تۇجىرىمدامالىق تاسىلدەرىنىڭ ۇقساستىعىن اتاپ ءوتتى. تاياۋدا قۇرىلعانىنا قاراماستان, وزبەك ۆەدومستۆوسى ءتيىستى زاڭنامالىق قوردى قالىپتاستىرۋ, ەلدىڭ ءاربىر مەملەكەتتىك ورگانىندا سىبايلاس جەمقورلىققا قارسى كومپلاەنس-قىزمەتتەردى جانە شەنەۋنىكتەردىڭ كىرىستەرىن دەكلاراتسيالاۋ جۇيەسىن ەنگىزۋ بويىنشا ۇدەمەلى جۇمىس جۇرگىزۋدە.
كەزدەسۋ دوستىق جىلى شىرايدا ءوتتى. تاراپتار نيەت حاتتاماسىمەن جانە الداعى ەكى جاقتى ساپارلارمەن بەكىتىلگەن ۇزاق مەرزىمدى ستراتەگيالىق ارىپتەستىك تۋرالى كەلىستى.
