مەديتسينا • 07 قازان، 2020

الماتىلىق دارىگەر حالىقارالىق FameLab-2020 بايقاۋىنا قاتىسادى

20 رەت كورسەتىلدى

وسى اپتادا FameLab Kazakhstan عىلىمي كوممۋنيكاتسيالىق بايقاۋى فينالىنىڭ ترانسلياتسيا مارەگە جەتىپ، وعان وتاندىق 10 جاس عالىم قاتىستى، ونىڭ ىشىندە سەگىزى Nazarbayev University وكىلدەرى، دەپ حابارلايدى Egemen.kz

الدىمەن FameLab – عىلىمي كوممۋنيكاتسيا سالاسىنداعى الەمدىك كوشباسشى بايقاۋ سانالاتىندىعىن العا تارتا كەتۋ كەرەك. 2005 جىلدان بەرى وتكىزىلىپ كەلەدى.

جارىستا باعى جانعان نۇرلان سۇلەيمەنوۆ 750 000 تەڭگە سىيلىققا يە بولىپ قانا قويماي، حالىقارالىق FameLab-2020 بايقاۋىنا قازاقستاننىڭ اتىنان قاتىسۋ مارتەبەسىنە لايىق دەپ تانىلدى. ەكىنشى جانە ءۇشىنشى جۇلدەلەرگە يە بولعان شوحيستا يسمايلجانوۆا مەن اسەل احمەتوۆاعا 350 مىڭ تەڭگەدەن ءتيدى. كورەرمەندەردىڭ تاڭداۋى بويىنشا ش.يسمايلجانوۆا ۇزدىك سپيكەر اتانىپ، Kindle ەلەكتروندى كىتابىنا يە بولدى.

ء"ىشىمدى قۋانىش كەرنەپ تۇر! نەگىزى، FameLab بايقاۋىنا قاتىسۋ تۋرالى شەشىمگە سوڭعى كۇنى كەلىپ، ۆيدەونى تۋرا سوڭعى ساتتە جىبەردىم، سوندىقتان فينالعا وتەمىن دەپ كۇتپەدىم. ماستەر-كلاسس وتە  ۇنادى. بىزگە ءوز ءستيلىمىزدى تابۋعا كومەكتەسىپ، عىلىم تۋرالى قاراپايىم تىلمەن، ءارى وتە قىزىقتى قىلىپ جەتكىزۋگە بولاتىنىن كورسەتتى. بۇرىن ماعان تەك بيولوگيا قىزىقتى سەكىلدى بولىپ كورىنەتىن، بىراق ەندى قولىڭنان كەلسە – بارلىعىن قىزىقتى جەتكىزە بىلۋگە بولاتىنىن كوردىم. FameLab بايقاۋىنىڭ ارقاسىندا وسىنى ۇيرەنگىم كەلەتىنىن ءتۇسىندىم"، دەيدى بايقاۋ جەڭىمپازى ن.سۇلەيمەنوۆ.

بۇگىنگە دەيىن قازاقستانداعى جۇزدەگەن جاس عالىم قاتىسىپ ۇلگەرگەن FameLab بايقاۋىن «شەۆرون» كومپانياسىنىڭ قولداۋىمەن British Council (بريتان كەڭەسى) بەسىنشى جىل قاتارىنان  ۇيىمداستىرىپ ءجۇر. بيىل بايقاۋدىڭ وتۋىنە OYLA عىلىمي-كوپشىلىك جۋرنالى دا قولداۋ كورسەتتى.

بايقاۋدىڭ ماقساتى – عىلىمدى ناسيحاتتاۋ جانە ونى زەرتتەۋگە دەگەن قىزىعۋشىلىقتى ارتتىرۋ. FameLab دارىندى جاس عالىمداردى انىقتاۋعا كومەكتەسىپ، ولاردىڭ كوممۋنيكاتسيالىق ماشىقتارىن جەتىلدىرۋگە ىقپال ەتەدى.

بايقاۋ فينالىنىڭ قازىلار القاسىنا ۇلىبريتانيانىڭ قازاقستانداعى ەلشى ورىنباسارى دجوناتان لەيفيلد، Causaly Inc تەحنيكالىق ديرەكتورى جانە نەگىزىن قالاسۋشى ارتۋر ساۋداباەۆ جانە The Village Kazakhstan نەگىزىن قالاۋشىسى ايسانا اشيم كىردى.

"FameLab – كەرەمەت ءىس-شارا! بريتان كەڭەسى FameLab بايقاۋىن 25 ەلدە وتكىزەدى. مۇندا الەمنىڭ تۇكپىر-تۇكپىرىنەن عالىمدار جينالىپ، عىلىم جايلى سويلەسىپ، ويلارى ءبىر تۇستان شىعاتىن تۇلعالار تىڭ يدەيالارىمەن ءبولىسىپ، ءوزارا پىكىر الماسادى. جەڭىمپاز ءوزىنىڭ عىلىمي كوممۋنيكاتسيالىق ماشىعىن جەتىلدىرۋگە، سونداي-اق تاجىريبەلى حالىقارالىق ترەنەرلەر وتكىزەتىن ماستەر-كلاسقا قاتىسۋعا مۇمكىندىك الادى"، دەيدى بريتان كەڭەسى ورتالىق ازيا بويىنشا سەرىكتەستىك ءبولىمىنىڭ باسشىسى بەن گرەي.

ء"بىز STEM باعىتقا ەرەكشە كوڭىل بولەمىز، سوندىقتان دا FameLab بايقاۋىنا قولداۋ كورسەتەمىز دەپ شەشتىك، ويتكەنى بۇل كۇردەلى عىلىمي يدەيالارمەن ءبولىسۋدىڭ قاراپايىم ءارى قىزىقتى ءتاسىلى"، دەيدى "شەۆرون" كومپانياسىنىڭ قوعاممەن بايلانىس ءبولىمىنىڭ كوورديناتورى جانار قوشپانوۆا.

سوڭعى جاڭالىقتار

اراق ساتىلمايتىن اۋدان

ايماقتار • 14 مامىر، 2021

ۇقساس جاڭالىقتار