– ەلدە بەلەڭ العان ىندەت ونەردىڭ اياقالىسىن ءبىراز تەجەدى. ول راس. ايتسە دە شىعارماشىلىق يەلەرى ۇيدە جاتىپ تا ىزدەنىستەرىن توقتاتپادى دەپ سەنەمىز. ءوزىڭىز قالايسىز, كارانتيندە قارايىپ قالعان جوقسىز با؟
– شۇكىر, تەاترداعى جۇمىس جاي-جايلاپ باستالىپ جاتىر. كارانتين الدىندا پرەمەراسى وتكەن ۇستازىمىز, قازاقستاننىڭ ەڭبەك سىڭىرگەن قايراتكەرى, رەجيسسەر نۇرقانات جاقىپباي قويعان ۋ.شەكسپيردىڭ «حانزادا» («گاملەت») تراگەدياسىن ساحنادا ءبىر-اق رەت ويناپ ۇلگەرگەن بولاتىنبىز. ودان كەيىن تەاترلار كارانتينگە جابىلىپ قالدى دا, سول ءرولدىڭ بۋىرقانىسى بۇلقىنىپ ىشتە قالىپ قويدى. قازىر گاملەتتىڭ ىزدەنىسىندە ءجۇرمىن. بۇعان دەيىن بايقاپ-باقپاعان ەرەكشەلىكتەردى ەكشەپ, كەيىپكەرىمنىڭ تابيعاتىن بايىتسام دەيمىن. ويتكەنى گاملەت – كۇردەلى ءرول. سونىڭ ءوز ساراپتاۋىمداعى بوياۋىن قالىڭداتقىم, وزىندىك ەرەكشەلىگىن تاپقىم كەلەدى. جالپى, ءارتىس دەگەن وپتيميست حالىق قوي, بىرنەشە ايعا سوزىلعان كارانتين, ۇزاق ۋاقىت ۇيدە تاپجىلماي وتىرىپ قالۋ اكتەر ادامعا ەڭ اۋەلى ءوزىنىڭ ىشىنە ءۇڭىلىپ, شىعارماشىلىق ىزدەنىستەرى تۋرالى, بۇعان دەيىن ويناعان نەمەسە كەلەشەكتە وينايتىن رولدەرى تۋراسىندا ويلانۋعا, جاساعان جۇمىستارىنىڭ ارتىق-كەمىن سارالاپ, الدىنا جاڭا ماقسات پەن تىڭ تالاپتار قويۋعا تاماشا مۇمكىندىك جاسادى دەپ ويلايمىن. وقۋعا ۋاقىت مۇرشا بەرمەي جۇرگەن كوپ كىتاپتى قايتا پاراقتاپ, الداعى اتقارار شىعارماشىلىق جوسپارلارىمىزدى دا ءبىراز جۇيەلەپ العان جايىمىز بار. ودان كەيىن, ارينە جاستار تەاترى ساحناسىندا جاڭا قويىلىم قويسام دەگەن دە ويىم بار. ناقتى قانداي سپەكتاكل ەكەنىن ايتا المايمىن, قازىر دراماتۋرگيامەن جۇمىس ىستەپ, ساحنالاۋعا بولاتىن جاقسى قويىلىم ىزدەستىرۋ ۇستىندەمىن. ويتكەنى 2-3 جىلداي بولدى, رەجيسسەرلىك باعىتتاعى ىزدەنىستەرىم ءبىراز توقتاپ قالدى. سونى قايتا جانداندىرىپ, اۋقىمدى ءبىر سپەكتاكلدى ومىرگە اكەلگىم كەلەدى.
– بيىل 90 جىلدىق مەرەيتويى اتالىپ ءوتىپ جاتقان قازاق ءۆالسىنىڭ پاديشاحى ءشامشى قالداياقوۆتىڭ ءومىرى مەن شىعارماشىلىعىن قامتيتىن ء«ان-اعا» دەرەكتى-كوركەم سەريالىندا باستى ءرولدى سومدادىڭىز. ادەتتە, كوركەم فيلمگە قاراعاندا, دەرەكتى فيلمدە ويناۋدىڭ جۇگى دە, جاۋاپكەرشىلىگى دە اۋىر دەپ جاتادى. سىزگە قالاي؟ ء«شامشى» شارشاتپادى ما؟
– بۇل جوباعا كەلۋىم قىزىق بولدى. «شامشىگە» دەيىن ەكى جىلداي كينوعا تۇسپەي, شىعارماشىلىعىمدا ازداپ ءۇزىلىس بولىپ قالىپ ەدى. كينو الاڭىن, ءتۇسىرىلىمدى ساعىنىپ تۇردىم. ءشامشى اعامىزدىڭ كوزىن كورگەن, جاقىن ارالاسقان ادامدار ارامىزدا ءجۇر, سوندىقتان ءرولدىڭ جاۋاپكەرشىلىگى دە ۇلكەن ەكەنىن تاڭدالعان كۇننەن-اق سەزدىم. بىراق, مەنىڭ تابيعاتىما سىڭگەن ءبىر مىنەز – ول اعىسقا قارسى ءجۇزۋ. «مۇمكىن ەمەس» دەگەن دۇنيەدەن مۇمكىن نارسە جاساعىم كەلەدى. «بولمايدى» دەگەن نارسە, كەرىسىنشە, مەنى شابىتتاندىرادى, قايرايدى, قاناتتاندىرادى. سوندىقتان رەجيسسەردەن ۇسىنىس تۇسكەندە كوپ ويلانبادىم: «نەگە جاساپ كورمەسكە؟» دەپ ءوز-وزىمە سۇراق قويدىم دا, «تاۋەكەل!» دەپ كىرىسىپ كەتتىم. ءوزىڭدى سىناماساڭ, اياپ, ايالاپ, وبەكتەي بەرگەننەن, وزىڭە دە, شىعارماشىلىعىڭا دا كەلەر پايدا جوق. جالپى, مەن شىعارماشىلىق ىزدەنىستە ءوزىمدى ازاپتاعاندى, قيناپ جۇمىس ىستەگەندى جاقسى كورەمىن. جانىمنىڭ ء«موزاحيسىمىن» (كۇلدى).
– ءوزىڭىز ايتپاقشى, ء«ان اعانىڭ» جاۋاپكەرشىلىگى ۇلكەن بولىپتى. رولگە قالاي ىزدەندىڭىز؟
– ءشامشى اعامىزعا ارناپ فيلم تۇسىرىلگەلى جاتقانىن ماعان ءتۇسىرىلىم باستالاردان ءۇش اي بۇرىن عانا ايتتى. ونىڭ وزىندە ناقتى ء«وتتىڭ» دەگەن جوق, تەك رەجيسسەر (ج.پوشانوۆ. – اۆت.): «مۇرتىڭدى الماي تۇرا تۇرشى» دەپ قانا ەسكەرتتى. بىراق, سول ءبىر اۋىز ءسوز مەنى ءان الەمىنە, سازگەردىڭ سىرشىل الەمىنە جەتەلەي بەردى. شىنىمدى ايتايىن, ءتۇسىرىلىم باستالعانعا دەيىن مەن ءرولىمدى قالاي وينايتىنىمدى دا بىلگەن جوقپىن. قارتايعان كەزدەگى بەينەجازبالارىن كورىپ, كىتاپتاردى پاراقتاپ ىزدەنگەندەي بولدىم. بىراق, ناتيجە ازداۋ, كوڭىلىم قاناعاتتانا قويمادى. سىناقتىق تۇسىرىلىمگە كەلگەندە دە, قالاي وينارىمدى بىلمەدىم. رەجيسسەر دە: «بىلاي وينا, بەينەنى وسىلاي اشساق دۇرىس بولادى» دەگەندەي جوبالاپ بولسىن باعىت-باعدار سىلتەيتىن ويلارىن ايتا قويمادى. ەشكىم ۇندەگەن جوق. سودان ءوز بىلگەنىمشە, ءوز ويىمداعى, كوڭىلىمدەگى ءشامشى اتامىزدىڭ بەينەسىن كورسەتۋگە تىرىستىم. كىتاپتاعى زامانداستارى ايتقان ەستەلىكتەردى ساراپتاي وتىرىپ, كومپوزيتوردىڭ جيىنتىق مىنەزىن ءتۇزدىم. ء«ومىر بويى بالا بولىپ وتكەن», ء«ازىل-قالجىڭعا جاقىن» دەگەن سىندى مىنەزدەرىن اشۋعا تالپىندىم. ىشىمدىككە جاقىن بولعان دەگەن دە دەرەكتەر ايتىلادى. بىراق, ونى ۋرالاپ العا ۇستاعان جوقپىن. ونىڭ ۇستىنە, ستسەناري ماعان بىردەن ۇنادى. سەريالدىڭ ستسەناريى فيلمدەگىدەي ايقىش-ۇيقىش ديناميكالى ەمەس, مونوتوندى, بىركەلكى, بىرىرعاقتى جازىلادى. بىراق, وندا ىشكى جان دۇنيە قاتپارلارى اسىعىسسىز, ايشىقتالا كورسەتىلەدى. سول ءيىرىمدى مەن وسى ستسەناريدەن كوردىم. جان جۇرەككە تيەتىن, كوڭىلدى قوزعايتىن تۇستار بولدى. سوندىقتان دا فيلمدە بارىنشا شىنايى, سەزىممەن ويناۋعا تىرىستىم. سىرتقى كەلبەت ەمەس, ەڭ ءبىرىنشى ىشكى جان دۇنيەسىن ەشقانداي پافوسسىز, اسىرەلەۋسىز, بارىنشا شىنايى الىپ شىعۋعا تالپىندىم.
– ەستۋىمىزشە, شابىت كەلگەندە ءوزىڭىزدىڭ دە ءان شىعاراتىن ونەرىڭىز بار كورىنەدى. شامشىدەي سىرشىل كومپوزيتوردىڭ تابيعاتىن اشۋدا بۇل تالانتىڭىزدىڭ كوپ كومەگى تيگەن بولار...
– ءيا, جۇرەكتى سەلت ەتكىزەر ءسوز تابىلعاندا, ءان شىعاراتىن قابىلەتىم بالا كەزدەن بار بولاتىن. سونى ۇلكەن ساحناعا ارناپ ق.ءجۇنىسوۆتىڭ «العاشقى ماحاببات» كومەدياسىن ساحنالاۋ بارىسىندا قولعا الا باستادىم. ءبىر نارسەدەن, وقيعادان جاقسى اسەر السام, بىردەن گيتارانى ىزدەيمىن. ءسويتىپ, تولقىنىسىمدى ءان ارقىلى شىعارامىن. كەيبىر اندەر ەكى-ءۇش كۇندە شىقسا, كەيبىرى جارتى ساعاتتا تۋادى. ول ەندى كوڭىل-كۇيگە بايلانىستى. ماسەلەن, وسىدان بىرنەشە جىل بۇرىن اقان ساتاەۆتىڭ «اناعا اپارار جول» فيلمىنە باردىق. فيلم جۇرەككە جەتتى. ەرتەڭىندە كولىكتە كەتىپ بارا جاتىپ تا وسى اسەردەن ارىلا المادىم. جۇمىسقا كەلە سالا, قولىما گيتارانى الدىم. جارتى ساعاتتا ءبىر ءان تۋدى ءسويتىپ. كەيدە وسىلاي شىعارماشىلىق شابىتىم انگە دە كوشىپ كەتەدى. اندەرىم ونشا كوپ ەمەس, ازىرگە وزىمنەن باسقا ەشكىم ايتىپ جۇرگەن جوق (ك ۇلىپ الدى). وتكەن جىلى ورالحان بوكەيدىڭ «ۇيقىم كەلمەيدى..» اڭگىمەسىنىڭ جەلىسىندە مۋزىكالىق مونوسپەكتاكل قويعان ەدىم. سول جەردە ون شاقتى ءانىم ورىندالادى. جالپى, ءان شىعارعان وزىمە ۇنايدى. ال ادامنىڭ جانى راحات تاباتىن دۇنيەمەن اينالىسقانىنان ارتىق قانداي باقىت بار؟! ءشامشىنى ويناعاندا دا ءان تۋاتىن جەرلەردە جانىم راحاتتانىپ, سازگەردىڭ كوڭىل كۇيىن بارىنشا شىنايى جەتكىزۋگە تىرىسىپ باقتىم. ەندى, ارينە, سوڭىمىزدان ءشامشى سياقتى جۇرەكتى تەربەتەر عالامات اندەر قالدىرامىز با, جوق پا – ول جاعى بەلگىسىز.
– ەڭ ءبىرىنشى ءان تۋا ما الدە سوزگە قاراپ اۋەن كەلە مە؟
– مەن پوەزيانى كوپ وقيمىن. سولاردىڭ ىشىنەن «انگە كەلەدى-اۋ» دەگەن ولەڭدەردى جيناپ قويامىن دا, ورايى كەلىپ تۇرعان سوزدەردى اندەرىمە پايدالانامىن. بىراق, انگە ءسوز تابۋ وتە قيىن. وزىڭدە ونداي تالانت بولماعاننان كەيىن, ىزدەيسىڭ, ىزدەنەسىڭ. كوڭىل تۇكپىرىندەگى ءسوز ءدوپ تابىلعاندا, ءانىڭنىڭ تابيعاتىن تولىققاندى اشاتىن پوەزيا كەزىكسە – سول كۇنى مەنەن باقىتتى ادام جوق! ونەر اكادەمياسىندا بىرگە وقىعان حامزا كوكسەبەك دەگەن دوسىم بار. كەيدە سول ەكەۋمىز بىرلەسە وتىرىپ جازامىز. ءان سوزىنە ارنايى تاپسىرىس بەرىپ جازعىزعان جالعىز اۆتور ازىرگە سول كۋرستاسىم عانا.
– ءشامشى ءرولى اكتەر رەتىندە سىزگە نە بەردى؟
– ءار كينو ماعان تاجىريبە, جاڭا ءبىر بەلەس. كينو الەمىندە باسقا قىرىمنان كورىنگىم كەلدى. ءشامشى ماعان سول مۇمكىندىكتى بەردى دەپ ويلايمىن. كوپشىلىك مەنى الدار كوسە دەپ تانيدى عوي. سول امپلۋادان شىققىم كەلدى. ەرتەڭ مەنى كورگەندە كورەرمەن: «الدار كوسە!» دەپ ەمەس, ء«شامشى كەلە جاتىر!» دەپ قۋاناتىن بولسا, ونەر ادامى ءۇشىن بۇل دا ۇلكەن جەتىستىك. ەل مەنى ءبىر-اق بەينەمەن تانىعانىن قالامايمىن. ءار جاساعان جۇمىسىم ەل ەسىندە قالىپ جاتسا – ونەردەگى ماقساتىمنىڭ ورىندالعانى.
– كەزىندە كينو ماماندارى تاراپىنان ۇلكەن پىكىرتالاسقا ارقاۋ بولعان «برات يلي براك» كومەدياسى شە؟ جالپى فيلم كوپ سىنالسا دا, اكتەر رەتىندە سىزگە ۇلكەن تانىمالدىلىق اكەلگەن سياقتى...
– جالپى, مەن وسى كۇنگە دەيىن تۇسكەن فيلمدەردىڭ بارلىعىنا كاستينگ ارقىلى تاڭدالدىم. بىراق بۇل كومەديادا رەجيسسەردە دە, پروديۋسەردە دە «وسى اكتەر الىپ شىعادى-اۋ» دەگەن سەنىم باسىم بولدى ما, 5-6 ۇمىتكەردىڭ اراسىنان تالاسسىز تاڭدالدىم. ارينە, «برات يلي براك» سىنشىلار تاراپىنان سىنعا كوپ ىلىكتى. كەرىسىنشە, قالىڭ كورەرمەننىڭ كوڭىلىنەن شىققان سەكىلدى. كومەديا تابيعاتىنا ساي جازىلعان ستسەناري, ونىڭ ۇستىنە كاسسالىق دۇنيە بولعاندىقتان بۇل ءفيلمنىڭ جەڭىل, ويناقى بولۋى زاڭدى دا ەدى. البەتتە, سىنشىلار تاراپىنان ايتىلعان ەسكەرتۋلەردى وڭ قابىلدادىق. بىراق فيلم الدىنا قويعان ءوز ماقساتىن تولىق ورىندادى دەپ ويلايمىن. وزگەنى ايتپاعاندا, «برات يلي براك» جەكە ءوز باسىما شىعارماشىلىق ۇلكەن تاجىريبە بولدى. ويتكەنى بۇل مەنىڭ تولىققاندى كومەديا جانرىندا ءوزىمدى باستى رولدە سىناپ كورگەن العاشقى وبرازىم. ارينە, ەرتەرەكتە «الدار كوسە» فيلمىندە وينادىم عوي. بىراق ونىڭ تابيعاتى كومەدياعا قاراعاندا, اڭىز, اپساناعا كوبىرەك جاقىنداۋ ەدى. ماقساتى دا باسقا. سوندىقتان دا اتالعان كومەدياعا ۇسىنىس تۇسكەن كەزدە, ستسەناريىن ۇناتىپ, امبە ءوزىمدى ەكراندا جاڭا جانردا سىناپ كورگىم كەلىپ, بىردەن كەلىسىمىمدى بەردىم. شەشىمىمە وكىنبەيمىن. اكتەر ءۇشىن قاي جانر دا بىردەي. ەشقانداي ونەر ءتۇرىن جوققا شىعارعىم كەلمەيدى. ءبارىنىڭ بىردەي ءومىر سۇرۋگە حاقىسى بار.
– بۇگىنگى كورەرمەننىڭ دەڭگەيىن قالاي باعالايسىز؟ ياعني باسقاشا ايتقاندا, كورەرمەن ونەرگە تارتىلۋ كەرەك پە, الدە ونەردىڭ كورەرمەنگە يىلگەنى ءلازىم بە؟
– مەنىڭشە, ءبىز كورەرمەندى ونەرگە تارتاتىنداي جاعدايدا ەمەسپىز. رەسەي, ءيا, ول جاعىنان بىزدەن الدەقايدا كوشىلگەرى. ول جاقتاعى قاراپايىم كورەرمەننىڭ تەاتردى قابىلداۋ مادەنيەتى دە باسقا. ال بىزدەگى جاعداي قانداي؟ ءومىرى تەاتر كورمەگەن كورەرمەن بار ارامىزدا. ءيا, ءسوزىڭىز ورىندى. ونەر كورەرمەندى تاربيەلەۋ كەرەك. بىراق, ول مادەنيەتكە جەتكەنگە دەيىن دە ۇزدىكسىز جۇمىس تالاپ ەتىلەدى. مەنىڭ ويىمشا, تەاتر التىن ارالىقتى ۇستاپ, بارلىق كورەرمەنگە بىردەي قىزمەت ەتۋى قاجەت. سەبەبى ءار كورەرمەن – ءبىزدىڭ نانىمىز, تۇتىنۋشىمىز. سوندىقتان ول ەكەۋى بىرگە جۇرەتىن نارسە. ءبىز كورەرمەندى بيىك ونەرگە تارتپاستان بۇرىن, اۋەلى ولاردى دايىنداۋىمىز كەرەك. ول ءۇشىن ارا-تۇرا كورەرمەن دەڭگەيىنە ءتۇسىپ, ساحنا مادەنيەتى ارقىلى وزىمىزبەن بىرگە العا ىلەستىرىپ اكەتۋىمىز قاجەت. سول سەبەپتەن دە مەن رەجيسسەرلەر مەن اكتەرلەردى ونەر مەن حالىق اراسىنداعى دانەكەرشى كوپىر بولۋ كەرەك دەپ ەسەپتەيمىن. جاي عانا سىرتتاي باقىلاپ قاراڭىزشى, «شانشار» مەن «الداراسپانعا» نەمەسە كۆن-گە كورەرمەن كوپ بارادى. ازىلدەرىنە ىشەكتەرى قاتقانشا كۇلەدى. مىنە, وسىدان-اق ويلانۋ كەرەك. دەمەك, كورەرمەن ءبىزدىڭ ۇسىنعان ابسۋردىمىز بەن ءاپسانامىزدى, فيلوسوفيامىزدى ءالى تۇسىنەتىن دەڭگەيدە ەمەس. سوندىقتان اۋەلى ءبىز سول ونەرگە كوتەرىلەتىن كورەرمەندى الدىن الا دا
يىنداپ, تەاترعا قىزىقتىرا وتىرىپ, بيىك ونەردىڭ نە ەكەنىن ءتۇسىندىرۋىمىز كەرەك. جاي-جايلاپ بويعا سىڭىرگەنىمىز ءلازىم. «بىردەن!» دەگەن دۇنيە بولمايدى. ازىرگە مەن وسى جاعىندامىن. قازىرگى ونەردىڭ مىندەتى تاڭعالدىرۋ دا, تاربيەلەۋ دە ەمەس, قازىرگى ونەردىڭ ميسسياسى – سەندىرۋ.
– بۇگىنگى زاماناۋي تەاتر ونەرىنىڭ اياقالىسىن قالاي باعالايسىز؟ قازاق تەاتر ونەرىندە جۇرگەن اكتەرلەر زاماناۋي تەاتر ونەرى قويىپ جاتقان تالاپتارعا ساي ما؟
– زاماناۋي تەاتر ونەرى دەگەندە, جالپى مۇنى ەكى جاقتان قاراستىرۋعا بولادى. اۋەلى شىعارماشىلىق, ودان كەيىن تەحنيكالىق جاعىنان. سۇراعىڭىزعا ناقتى كەلسەم, مەن زاماناۋي تەاتر دەپ نەنى ايتار ەدىم؟ ول – رەجيسسەرلىك تاپقىرلىق, اكتەرلىك ىزدەنىس جاعىنان شارىقتاۋ شىڭعا جەتكەن ونەر. ادامدى دەل-سال جاعدايعا ءتۇسىرىپ, جان دۇنيەسىن الەمتاپىرىق كۇيگە اكەلەتىن قويىلىم – مىنە, وسى مەن ءۇشىن زاماناۋي تەاتر ونەرىنىڭ جەتىستىگى. وكىنىشكە قاراي, بۇل جاعىنان ءبىزدىڭ تەاتر ونەرى وتە باياۋ, ءالسىز دامىپ جاتىر. اسىقپاي, اقىرىنداپ كەلە جاتىرمىز. ويتكەنى بىزدە تالپىنىس بولعانىمەن, جاقسى كادرلار وتە از. تالانتتى اكتەرلەر كوپ, بىراق تاپقىر, جاڭاشىل ويلى رەجيسسەرلەر, كوركەم ويلى ساحنا سۋرەتشىلەرى تاپشى. وسى جاعىنان دەندەپ جۇمىس ىستەۋىمىز كەرەك.
– اكتەرلىكتەن بولەك, ەلوردالىق جاستار تەاترىندا بىرنەشە قويىلىمدى ساحناعا ءساتتى شىعارعان رەجيسسەر رەتىندە ءوزىڭىزدى, جۇمىستارىڭىزدى جاقسى بىلەمىز. الداعى ۋاقىتتا كينورەجيسسۋرادا باعىڭىزدى بايقاپ كورگىڭىز كەلمەي مە؟
– نەگە كەلمەسىن؟ ارينە, كينو – مەنىڭ ەڭ قىزىعاتىن سالام. قازىر دە كينوستسەناري جازۋ ۇستىندەمىن. بىراق, ونىڭ قالاي شىعاتىنى بەلگىسىز. ايتسە دە, ءوزىمدى ونەردىڭ قاي سالاسىندا دا دالەلدەپ كورگىم كەلەدى. سەبەبى بۇگىنگى ونەر اكتەردەن امبەباپتىقتى تالاپ ەتەدى. اكتەر ادام ءبىر جاقتى شەكتەلۋگە بولمايدى دەپ ەسەپتەيمىن. ۋاقىتتىڭ اعىسىن اڭداماساڭ, جۇتىلىپ كەتەسىڭ. سوندىقتان الداعى ۋاقىتتا شابىت پەن مۇمكىندىك بولسا, نەگە سىناپ كورمەسكە؟! جالپى, اكتەرلىك ونەردى تاڭداعان تالاپكەرلەردىڭ كوپشىلىگى بۇل سالاعا «كينوعا تۇسسەم, ءوزىن كينو ارقىلى تانىتسام» دەپ كەلەدى. سول سەكىلدى مەنىڭ دە كينوعا دەگەن قىزىعۋشىلىعىم ەرەكشە. تەاتردى كەيىنىرەك, وقۋعا تۇسكەننەن كەيىن, ساحنا سىرىنا قانىعا كەلە جاقسى كورىپ كەتتىك قوي. بىراق, ەڭ العاش ونەرگە دەگەن ماحابباتىمدى وياتقان كينو بولاتىن. ال ءتۇپتىڭ تۇبىندە باعىندىرۋ ءۇشىن دە ول ارمانىما قايتىپ ورالاتىنىم حاق. تەاتردا بۇل ارمانىمدى تولىققاندى باعىندىرماسام دا, جانىممەن ۇندەسەر جاقسى رولدەردى ويناپ, كورەرمەن تاراپىنان دا, سىنشىلار تاراپىنان دا ءوز دەڭگەيىندە باعامدى الىپ ءجۇرمىن. ۇستازىمىز نۇرقانات جاقىپباي ساحنالاعان ن.گوگولدىڭ «رەۆيزور» قويىلىمىنداعى حلەستاكوۆ ءرولى, ماسەلەن, بۇگىندە مەنىڭ تەاترداعى بويتۇمار رولىمە اينالعان بەينەلەردىڭ ءبىرى. ال كينودا (سەريال ەمەس, كوركەم فيلم. – اۆت.) شىعارماشىلىق تولقۇجاتىما اينالاتىنداي, كينوتەاترلاردان جارق ەتىپ كورىنەتىندەي ونداي ءرولدى جاساي قويعان جوقپىن. سوندىقتان ازىرگە كينو ونەرىنە قاناعاتسىز بولىپ ءجۇرمىن. كينوداعى ءوزىمنىڭ ءرولىمدى تاپقىم كەلەدى...
– اڭگىمەڭىزگە راحمەت.
اڭگىمەلەسكەن
نازەركە جۇماباي,
«Egemen Qazaqstan»
