وزگەرتۋ قاجەت دەپ سانالعان كوشەلەردىڭ قاتارىندا لەنين كوشەسى دە اتالعان-تىن. ەندى مىنە, ءسوز ىسكە اسىپ, قاراعاندى قالاسىنداعى ورتالىق كوشەلەردىڭ ءبىرى – لەنين اتىنداعى كوشەنىڭ اتاۋى كەلمەسكە كەتىپ, زامان تالابىنا ساي «اباي كوشەسى» بولىپ وزگەرتىلدى.
ايتا كەتەتىن ءبىر جايت, بۇل وزگەرتۋگە جەرگىلىكتى بيۋدجەتتەن كوك تيىن دا جۇمسالمادى. جاڭا اتاۋ جازىلعان تاقتايشالاردى اۋىستىرۋعا كەتكەن بارلىق شىعىندى جەكە كاسىپكەر ەرلان ءاشىم كوتەرىپ العان ەكەن. «لەنين كوشەسىنىڭ اتاۋىن اباي كوشەسىنە اۋىستىرۋعا بايلانىستى بارلىق شىعىندى قالامىزدىڭ پاتريوتى, جاناشىر كاسىپكەر, ء«Nاtige» ءسۇت فابريكاسى» جشس-ءنىڭ ديرەكتورى ەرلان ءاشىم ءوزى كوتەرۋدە. كوشە اتاۋىن اۋىستىرۋعا بيۋدجەتتىك قاراجات بولىنگەن جوق», دەپ حابارلادى قاراعاندى قالاسى اكىمىنىڭ ءباسپاسوز حاتشىسى اسەل سادۋاقاسوۆا.
ەسكە سالار بولساق, جوعارىدا ايتقان قوعامدىق تىڭداۋدا بولعان ايتىس-تارتىس كەزىندە «بيۋدجەتتىڭ قاراجاتىن بوسقا شاشقانشا, اقشانى باسقا دا شەشىمىن كۇتكەن ماسەلەلەرگە نەگە جۇمساماسقا؟», دەگەن سارىنداعى پىكىرلەر دە ايتىلعان بولاتىن. مىنە, سول كەزدە وسىنداي پىكىر يەلەرىنە قاراتا جەكە كاسىپكەر ەرلان ءاشىم كوشە اتاۋلارىن وزگەرتۋگە كەتەر شىعىننىڭ ءبارىن ءوزى كوتەرۋگە دايار ەكەندىگىن مالىمدەگەن ەدى.
قاراعاندى قالاسىنىڭ تۇرعىندارى ورتالىق كوشەلەردىڭ بىرىنە كەمەڭگەر تۇلعا اباي قۇنانباي ۇلىنىڭ ەسىمى بەرىلگەنىن زور قۋانىشپەن قابىل الدى. مۇنداي يگى ءىستى ولار حاكىمنىڭ بيىلعى 175 جىلدىق مەرەيتويىنا ارنالعان لايىقتى تارتۋ دەپ ەسەپتەيدى.
قاراعاندى وبلىسى
