جاقىندا الەۋمەتتىك جەلىنى شارلاپ كەتكەن جاۋىز اكەنىڭ بالاسىن اياۋسىز ۇرىپ-سوققان ۆيدەوسى كوپشىلىكتى شوشىتتى. بۇل – كوز كورىپ, جۇرتقا جاريا بولعان, بۇلتارتپاس ايعاق رەتىندە تارالعان جاعداي. ال كوپشىلىك بىلە بەرمەيتىن, وتباسىنىڭ ويرانىن شىعارىپ, قۇتىن قاشىرىپ وتىرعان زورلىق-زومبىلىقتار قانشاما؟!.
اتالعان وقيعا تۇركىستان وبلىسى قازىعۇرت اۋدانىنا قاراستى قىزىلقيا اۋىلىندا بولعان. الەۋمەتتىك جەلىدە تاراعان ۆيدەودا وتاعاسى بالاسىن اياۋسىز ۇرىپ جاتقانى تۇسىرىلگەن. تاعى ءبىر ۆيدەودا ەكىنشى بالاسى دا وپاسىز اكەسىنەن وڭباي تاياق جەپتى.
قازىر كۇيەۋىنەن كورەسىنى كورگەن ايەلى بالالارىن الىپ قاشىپ, توركىنىنەن پانا تاۋىپتى. ايەل بۇعان دەيىن پوليتسياعا جۇبايىنىڭ مۇنداي ارەكەتىن ايتىپ اۋىزشا ارىزدانعان, بىراق ءوتىنىش بەرۋدەن باس تارتقان ەكەن. ەندى پوليتسەيلەر 4 قازان كۇنى الەۋمەتتىك جەلىلەرگە مونيتورينگ جۇرگىزۋ بارىسىندا اتالعان وقيعانى انىقتاپ, ءىس سوتقا دەيىنگى تەرگەۋ تىزىلىمىنە قىلمىستىق كودەكستىڭ
110-بابى – ازاپتاۋ بويىنشا تىركەلدى.
جۇرتتىڭ جاپپاي نارازىلىعىن تۋدىرعان مۇنداي وقيعالار تۇرمىستىق زورلىق-زومبىلىققا قارسى ءىس-شارالاردى كۇشەيتىپ, وتباسىنىڭ بەرەكەسىن قاشىرعان وسپادارلاردىڭ جازاسىن بارىنشا قاتايتۋ كەرەك ەكەنىن كورسەتەدى. بۇل ماسەلە مەملەكەت باسشىسىنىڭ دا نازارىنان تىس قالماي, پرەزيدەنت تاپسىرماسىمەن پارلامەنتتە وتباسىنداعى زورلىق-زومبىلىققا قارسى جازانى كۇشەيتۋ جونىندە زاڭ جوباسى قارالىپ جاتىر.
وسىنداي وقيعاعا قىنجىلىس بىلدىرگەندە كوپشىلىك كوبىنە قۇقىق قورعاۋ ورگاندارىنىڭ ارەكەتسىزدىگىن سىنعا الادى. ايتالىق بيىلعى 8 ايداعى جاعداي بويىنشا تۇرمىستىق زورلىق-زومبىلىققا بايلانىستى 130 مىڭ شاعىم تۇسكەن ەكەن. ونىڭ تەك 2,5 مىڭىنا قاتىستى قىلمىستىق ءىس قوزعالىپ, 30 مىڭ ءىس اكىمشىلىك قاراۋعا جىبەرىلگەن. ياعني, پوليتسيا بارلىق شاعىمعا ءتيىستى شارا قولدانا الماعان.
ال ىندەت قوس وكپەدەن قىسقان كۇردەلى كەزەڭدە ۇيىندە قالىپ, ۇرەي قۇشاعىنا ەنگەن, وتاعاسىنان ءجابىر كورگەن جاعدايلار كۇرت كوبەيدى. قوعامنىڭ بىرلىگى سىنالار شىرعالاڭ شاقتا شاڭىراعىنىڭ شىرقىن بۇزار قاتىگەز اكەدەن كەلەتىن قاۋىپتىڭ الدىن الۋ ماڭىزدى بولىپ تۇر.
(تاقىرىپتىڭ جالعاسىن 15-بەتتەن وقيسىزدار)
