يگى شارا الماتىلىق كاسىپكەر عالىم چۋاشەۆتىڭ باستاماسىمەن قولعا الىنعان. ال ۇيىمداستىرۋ جاعى دميتري كيمگە جۇكتەلگەن. ەكى ازاماتقا قولداۋ كورسەتكەن ايدىن سادىبەكوۆ تە سەرىكتەرىمەن بىرگە جولعا شىققان. مارافونشىلار ەلىمىزدەگى ەكولوگيالىق ماسەلەلەرگە كوپشىلىكتىڭ نازارىن اۋدارۋدى ماقسات تۇتادى.
– ءار قالاعا توقتاپ, الدىمەن 42 شاقىرىم مارافون جۇگىرەمىز. ودان كەيىن تال وتىرعىزامىز دەپ شەشتىك. وسىلايشا ەڭ كەمى 760 اعاش كوشەتىن وتىرعىزۋدى جوسپارلاپ وتىرمىز. ءار وڭىرگە ايالداعان سايىن ساپىمىزعا جەرگىلىكتى مارافونشىلار قوسىلىپ جاتىر. سول كىسىلەر جول كورسەتەدى, – دەدى عالىم چۋاشەۆ.
تاڭعى ساعات 8:00-دە وبلىستىق اكىمدىك عيماراتى الدىنداعى الاڭدا جينالعان مارافونشىلار ورتالىق ستاديونعا بارىپ جۇگىردى. عالىم چۋاشەۆ 42 شاقىرىم 195 مەتر قاشىقتىقتى باعىندىرسا, دميتري 22 شاقىرىمدى جۇگىرىپ ءوتتى. جالپى ەسەپتەگەندە, اكتسيا اياسىندا عالىم 380, دميتري 190 شاقىرىمدى باعىندىرىپتى. ايدىن دا ءبىراز جەر جۇگىردى. بىراق جاراقاتىنا بايلانىستى جۇگىرىسىن توقتاتتى دا, ونى ەسەپكە تىركەتۋدەن باس تارتتى.
الىستان ات ارىلتىپ جەتكەن مەيماندار ساپىنا ەكولوگيالىق ماسەلەلەرگە بەيجاي قارامايتىن قوستانايلىق سپورتشىلار دا قوسىلدى. مارافون اياقتالعان سوڭ, سپورتشىلار توبىل جاعالاۋىنداعى تاۋەلسىزدىكتىڭ 25 جىلدىعى اتىنداعى ساياباققا 15 اعاش كوشەتىن وتىرعىزدى.
– ءبىز قوستانايعا دەيىن ەلىمىزدىڭ 8 قالاسىندا 200-دەي كوشەت ەكتىك. كەيبىر قالالاردا, ءتىپتى, ەكى جەردە اعاش وتىرعىزدىق. الايدا ۋاقىت تىعىز, مۇنداي مۇمكىندىك كوپ بولا بەرمەيدى. اكتسيا اياقتالعانشا, جالپى سانى 760 اعاش كوشەتىن وتىرعىزۋدى كوزدەپ وتىرمىز, – دەدى ايدىن سادىبەكوۆ.
مارافونشىلار قالا مەن قالانىڭ اراسىنا ءوز كولىكتەرىمەن جەتەدى. ولاردىڭ ەندىگى باعىتى – اقتوبە قالاسى. ەكوشارا قازاننىڭ جەتىسى كۇنى الماتى قالاسىندا اياقتالادى.
قوستاناي وبلىسى
