جىلۋعا دەگەن سۇرانىس نەگىزىنەن وبلىس ورتالىعىندا ارتىپ تۇر. تالدىقورعان قالاسىندا ورتالىق جىلىتۋ جۇيەسىنە قوسىلعان 82 بيۋدجەتتىك مەكەمە مەن 753 كوپقاباتتى تۇرعىن ءۇي بار. ەندى بۇل نىساندارداعى ادامدار جاۋرامايتىن بولدى. جالپى, بيىلعى جىلىتۋ ماۋسىمىنا دايىندىق جۇمىستارىنا بيۋدجەتتەن 15,9 ملرد تەڭگە قارجى بولىنگەن بولاتىن. ونىڭ ىشىندە جىلۋمەن جابدىقتاۋ نىساندارىن جوندەۋ ءۇشىن 6 ملرد تەڭگە, كومىر, مازۋت, ديزەل وتىنىن ساتىپ الۋعا 9,4 ملرد تەڭگە, جىلۋ جۇيەلەرىن جوندەۋگە جانە قاجەتتى قۇرال-جابدىق ساتىپ الۋعا 538 ملن تەڭگە بولىنسە, كاسىپورىنداردىڭ ءوز قاراجاتتارى ەسەبىنەن 2,1 ملرد تەڭگە تاعى قاراستىرىلعان.
اۋدانداردا دا جىلۋ بەرۋ ماۋسىمى باستالدى. ونىڭ ىشىندە كوپپاتەرلى ۇيلەردى ورتالىق جىلۋ جۇيەسىنە قوسۋ مەن جەكە قازاندىقتارعا جالعاۋ ءىسى بيىل العاش رەت جۇزەگە اسقان اۋداندار دا بار. ماسەلەن, قاراساي جانە تالعار اۋداندارىندا مىڭنان اسا ابونەنتتەرى بار 23 كوپپاتەرلى تۇرعىن ءۇي ورتالىق جىلۋ جۇيەسىنە قوسىلعان. بۇل ءۇشىن 14 جەكە جىلۋ قازاندىعى سالىندى.
سونداي-اق بيىل قاراتال, قاراساي, ەڭبەكشىقازاق جانە پانفيلوۆ اۋداندارىندا 108 كوپپاتەرلى تۇرعىن ءۇيدى جىلىتۋ ءۇشىن 33 جەكە قازاندىقتى ىسكە قوسۋ جوباسى ازىرلەنگەن بولاتىن. ال الداعى جىلى ەڭبەكشىقازاق, قاراساي, ۇيعىر, كوكسۋ جانە ىلە اۋداندارىندا 17 ءمودۋلدى قازاندىق سالۋ ءۇشىن 254,3 ملن تەڭگە ءبولىنىپ وتىر ەكەن. ناتيجەسىندە 106 كوپپاتەرلى تۇرعىن ءۇي ورتالىق جىلۋ جۇيەسىنە قوسىلماق.
ايتپاقشى, ايماقتاعى جىلىتۋ قازاندىقتارى مەن جەكە ۇيلەر 379,5 مىڭ توننا كومىر تۇتىنادى. قازىر قاجەتتى قاتتى وتىن دايىنداۋ 80 پايىزدان استى. وبلىس بويىنشا 64,3 شاقىرىم جىلۋ ماگيسترالى, 13,4 مىڭ شاقىرىم ەلەكتر جەلىسى, 3 016 ترانسفورماتور ستانساسى مەن باسقا دا قۇرىلعىلار جوندەۋدەن ءوتىپ, قىسقى ماۋسىمعا ساقاداي ساي بولىپ تۇر.
الماتى وبلىسى
