قازىردىڭ وزىندە ءوتىنىم بەرگەن 48 الەۋمەتتىك نىسان ورتالىق جىلۋ جۇيەسىنە قوسىلدى. وبلىس ورتالىعىنداعى تۇرعىن ۇيلەردىڭ ءبىرازى ءالى كۇنگە دەيىن تەحنيكالىق دايىندىق اكتىلەرىن الماعان. سوندىقتان ولار جىلۋ جۇيەسىنە ەڭ سوڭعى كەزەكتە قوسىلادى. «قجەك» وكىلدەرى تەحنيكالىق اكتىسى جوق ءۇي تۇرعىندارىنا ءار پاتەرگە كىرىپ تۇرعان ىستىق سۋ قۇبىرىن كەشىكتىرمەي اشىپ, جەلىگە جينالىپ قالعان اۋانى سىرتقا شىعارۋ تۋرالى كەڭەس بەردى. ولاي بولماعان جاعدايدا قۇبىرداعى سۋ لاستانىپ, ىستىق سۋدىڭ ساپاسى كۇرت ناشارلاۋى مۇمكىن.
جەرگىلىكتى كومپانيا جىلۋ بەرۋدىڭ ساپاسىن جاقسارتۋ ماقساتىندا 30 جىل بويى قولدانىلىپ كەلگەن ورتالىقتاندىرىلعان جىلۋمەن قامتۋ جۇيەسىندەگى جەلىلىك سۋدىڭ تەمپەراتۋرالىق كەستەسىن قايتا قاراپ, 31 تامىزدا جاڭا كەستە بەكىتتى. بۇعان دەيىن قۇبىرعا جىبەرىلەتىن ىستىق سۋدىڭ تەمپەراتۋراسى 55 گرادۋسقا دەيىن بولىپ كەلسە, ەندى جاڭا كەستە بويىنشا جىلۋ جۇيەسىنىڭ تەمپەراتۋراسى 60 گرادۋستان كەم بولمايدى.
– جىلۋ تاراتۋشى قۇبىرداعى تەمپەراتۋرانىڭ ارتۋى ءبىزدىڭ تۇتىنۋشىلارىمىز ءۇشىن قولايلى جاعداي تۋعىزادى. وسىعان بايلانىستى كۇز, كوكتەم ايلارىندا قالا تۇرعىندارىنان كەلىپ تۇسەتىن ارىز-شاعىمدار ازايادى دەپ ۇمىتتەنەمىز, – دەدى «قجەك» مكك ءباسپاسوز قىزمەتى.
ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى داۋرەن اسقاروۆتىڭ ايتۋىنشا, بيىل وبلىستاعى 27 جوبانى جۇزەگە اسىرۋعا 13 ملرد تەڭگە بولىنگەن. بۇل جوبالاردىڭ ىشىندەگى ەڭ ءىرىسى دە, ەڭ ماڭىزدىسى دا – ارقالىق جىلۋ ەنەرگياسى ورتالىعىن رەكونسترۋكتسيالاۋ.
ارقالىق قالاسىن ءار جىلۋ ماۋسىمىنان الىپ شىعۋ ءۇشىن جىل سايىن رەسپۋبليكا بيۋدجەتىنەن 2 ملرد تەڭگەنىڭ ۇستىندە ترانسفەرت بولىنەدى. بۇعان دەيىن قىستان مازۋتپەن شىعىپ كەلگەن ارقالىقتىڭ جىلۋ جۇيەسىن بىرتىندەپ كومىرگە كوشىرۋ ماقساتىندا بيۋدجەتتەن 7,4 ملن تەڭگە ءبولىنىپ, «ارقالىق قالاسىنىڭ جىلۋمەن جابدىقتاۋ جۇيەسىن 2030 جىلعا دەيىن قايتا جاڭارتۋ» جوباسى قولعا الىنعان. بۇگىندە جاڭا جىلۋ كوزىنىڭ قۇرىلىسى قارقىندى. باس عيماراتتىڭ استىڭعى قاباتى توسەلىپ, تابانىنا بەتوندى-ەرىتىندى توراپ سالىندى. 3 بۋ قازاندىعى جانە سۋمەن جىلىتاتىن 2 قازاندىق ورناتىلدى.
– جىل باسىندا جوسپارلانعان جۇمىستىڭ 43%-ى ەڭسەرىلىپ, 3 ملرد 200 ملن تەڭگە يگەرىلدى. قالانىڭ جاڭا جىلۋ ورتالىعى 2021 جىلدىڭ قىركۇيەك ايىندا پايدالانۋعا بەرىلەدى. بيىل ارقالىق جىلۋمەن جانە ەلەكتر قۋاتىمەن قامتاماسىز ەتەتىن ورتالىق مازۋت وتىنىن پايدالانادى. قالاداعى كەيبىر نىساندار كومىرمەن جىلىتىلادى. جىلۋ ماۋسىمىنا جەتەتىن مازۋت جەتكىزىپ الۋ جاعىن رەتتەپ الدىق. بيىل بيۋدجەتتەن بولىنگەن 1,39 ملرد تەڭگەگە 18,4 مىڭ توننا مازۋت ساتىپ الدىق, – دەدى ارقالىق قالاسىنىڭ اكىمى قايرات ابىشەۆ.
بۇگىندە وبلىس اۋماعىندا باس-اياعى 529 ەلدى مەكەن بولسا, سونىڭ 70-ىنە تابيعي گاز كەلىپ تۇر. تۇرعىن ءۇي كوممۋنالدىق شارۋاشىلىق باسقارماسىنىڭ مالىمەتىنشە, كوپتەگەن اۋداندا تۇرعىندار ۇيگە گاز قۇبىرىن تارتقىزۋعا ىقىلاسسىز. اۋىلدىق ەلدى مەكەندەردە جىلىنا تۇرعىنداردىڭ 10-15%-ى عانا كوگىلدىر وتىن تارتقىزادى ەكەن. ويتكەنى گاز قۇبىرىن وتكىزۋمەن اينالىساتىن مەكەمەلەردىڭ قىزمەتى اسا قىمبات بولعاندىقتان, ونى ەكىنىڭ ءبىرىنىڭ قالتاسى كوتەرە بەرمەيدى. الايدا كوگىلدىر وتىننىڭ قىزىعىن كورىپ وتىرعان اۋداندار دا جوق ەمەس. ماسەلەن, بيىل فەدوروۆ اۋدانىنىڭ ورتالىعىنداعى تۇرعىن ۇيلەردىڭ تەڭ جارتىسىنان استامى گازبەن جۇمىس ىستەيتىن ورتالىقتاندىرىلعان جاڭا قازاندىقتار ارقىلى جىلىتىلادى.
قوستاناي وبلىسى
