جاقىندا مادەنيەت جانە سپورت مينيسترلىگىنىڭ ءتىل ساياساتى كوميتەتى كوپتىڭ كوكەيىندە جۇرگەن توسىن باستامانىڭ ۇيىتقىسى بولدى. مەملەكەت قارجىسىمەن سوڭعى جىلدار بەدەرىندە جارىق كورگەن كىتاپ اۆتورلارى مەن سىنشىنىڭ ونلاين پىكىرتالاسىن ۇيىمداستىردى. بۇگىندە ونلاين جۇزدەسۋ ءبىزدىڭ كۇندەلىكتى تىرلىگىمىزگە دە بىرتىندەپ سىڭىسە باستادى عوي. پىكىرتالاستىڭ نەگىزگى ماقساتى – جاڭا كىتاپتاردى كوپشىلىككە كەڭىنەن ناسيحاتتاۋ, ونىڭ جەتىستىكتەرى مەن كەمشىلىكتەرىن ادەبي سىنشى كوزىمەن ەلدىڭ ساناسىنا ءسىڭىرۋ, كىتاپ وقۋدى زامان تالابىنا ساي قايتا جاڭعىرتۋ, كەنجەلەپ قالعان بالالار ادەبيەتىندەگى ولقىلىقتى تىڭ دۇنيەلەرمەن تولىقتىرۋ, ءسويتىپ ادەبي شىعارمالاردى ءبىزدىڭ ومىرلىك بولمىسىمىزعا اينالدىرۋ ءۇشىن ءبىز نە ىستەي الامىز دەگەن تولعاقتى پروبلاماعا جۇرتتىڭ تاعى ءبىر نازارىن اۋدارۋ ەدى.
پىكىرتالاسقا قازاقستان جازۋشىلار وداعى, ۇلتتىق مەملەكەتتىك كىتاپ پالاتاسى, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ فيلولوگيا, جۋرناليستيكا فاكۋلتەتىنىڭ ستۋدەنتتەرى, جەر-جەردەگى وقىرماندار, بارلىعى ەكى جۇزدەي ادەبيەت سۇيەر قاۋىم قاتىستى. العاشقى ءسوزدى ءتىل ساياساتى كوميتەتىنىڭ توراعاسى ادىلبەك قابا الىپ, «مادەنيەت جانە ونەر سالاسىنداعى باسەكەلەستىكتى جوعارىلاتۋ, قازاقستاندىق مادەني مۇرانى ساقتاۋ, زەردەلەۋ مەن ناسيحاتتاۋ جانە مۇراعات ءىسىنىڭ ىسكە اسىرىلۋ تيىمدىلىگىن ارتتىرۋ» باعدارلاماسى «ادەبيەتتىڭ الەۋمەتتىك ماڭىزدى تۇرلەرىن ساتىپ الۋ, باسىپ شىعارۋ جانە تاراتۋ» كىشى باعدارلاماسى بويىنشا جۇزەگە اسىپ جاتقان شارالارعا كەڭىنەن توقتالىپ ءوتتى. ساراپتامادان وتكەن, وقىرمان قاۋىمعا بەرەرى مول, جاستارىمىزدى رۋحاني جاعىنان جەتىلدىرىپ, وتانسۇيگىشتىككە تاربيەلەيتىن ادەبي شىعارمالاردى باسىپ شىعارىپ, تاراتۋ شارۋاسى ودان ءارى جالعاسا بەرەتىندىگىن ناقتى دالەلدەرمەن ءتۇسىندىرىپ بەردى. ءسويتىپ پىكىرتالاستىڭ كۇن تارتىبىنە قويىلعان تاقىرىبىنا ويىستى. وتكەن جىلى جارىق كورگەن بەلگىلى جازۋشى, حالىقارالىق «الاش», حالىقارالىق قازاق پەن-كلۋبى سىيلىعىنىڭ لاۋرەاتى قۋانىش جيەنبايدىڭ «كۇزدىڭ جىلى جاڭبىرى» اتتى پروزالىق جيناعى مەن جازۋشى زاريا جۇمانوۆانىڭ «اقبوتا» اتتى بالالارعا ارنالعان كىتابى تالقىلاندى. قازاقستاننىڭ ەڭبەك سىڭىرگەن قايراتكەرى, بەلگىلى ادەبيەت سىنشىسى ءاليا بوپەجانوۆا ەكى جيناقتى باستان-اياق وقىپ شىعىپ, شىعارمالار جايلى پىكىرىمەن ءبولىستى: «قۋانىش جيەنباي – مەنىڭ زامانداسىم, ءبىر كەزدە «قازاق ادەبيەتى» گازەتىندە ءبىراز جىل بىرگە قىزمەت ىستەگەنبىز. ياعني بۇل ازاماتتىڭ شىعارماشىلىعىنان تولىقتاي حاباردارمىن. مەنىڭ بۇل ويىما وزگەلەر دە قوسىلاتىن شىعار, قۋانىش قازىرگى قازاق پروزاسىندا وزىندىك بەتالىسى, جازۋ مانەرى قالىپتاسقان جانە ءونىمدى جازاتىن قالامگەر. ونىڭ تۋىندىلارىندا قازىرگى ۋاقىت پەن وتكەن كەڭەستىك كەزەڭدەگى ادامنىڭ تىنىس-تىرشىلىگى, قوعام مەن ادام, ادام مەن تابيعات اراسىنداعى بايلانىس, ودان تۋىندايتىن كۇردەلى ماسەلەلەر كەيىپكەر بولمىسىمەن بىتە قايناسىپ, وقىرمانعا كوركەمدىك الەمىنىڭ ەسىگىن اشادى. جازۋشى قيىننان قيىستىرىپ, ادامنىڭ قولى جەتپەيتىن جاعداياتتاردى ءسوز ەتپەيدى, ءوزىمىز كۇندە كورىپ, كۇندە ارالاسىپ, تىرشىلىك اۋانىندا كۇندە كەزدەسىپ جۇرگەن قاراپايىم ادامداردىڭ جان-دۇنيەلەرىنە تەرەڭىرەك ۇڭىلە بىلەدى, ولاردىڭ ارمان-ماقساتتارى, الدان كۇتكەن ۇمىتتەرى شىنايى سۋرەتتەلەدى. وسى جيناققا ەنگەن «توسقاۋىل» جانە «قيالي» اڭگىمەلەرىنىڭ جازىلۋ ءستيلى ماعان قاتتى ۇنادى. ونىڭ الداعى ۋاقىتتا دا وسى شابىسىنان تانبايتىندىعىنا سەنىمدىمىن...
ال زاريا ناعىز بالا جانىن تۇسىنەتىن, نازىك يىرىمدەرىن تاپ باسۋعا شەبەرلەنگەن قالامگەر ەكەن. بالالار ادەبيەتىنە جاناشىر ءارى جاڭاشىل جازۋشى كەلگەنىنە قۋانىشتىمىن. زاريانىڭ كەيىپكەرلەرى ءوزىنىڭ نەمەرەلەرى, سولاردىڭ ءتىلى, سولاردىڭ تالعام-تۇسىنىگى سول كۇيى قاعاز بەتىنە ءتۇسىپ وتىراتىن ءتارىزدى. «جالماۋىز كەمپىر» اڭگىمەسىنىڭ قۇرىلىمى قانداي تارتىمدى. ءبىزدىڭ اڭىز-ەرتەگىلەرىمىز, سونداعى عاجايىپ كەيىپكەرلەر ءالى بالا ساناسىنا سىڭىرىلگەن جوق. ءسىرا, سول ولقىلىقتىڭ ورنىن زاريا تولتىراتىن بولار... بۇگىنگى العاش ۇيىمداستىرىلعان پىكىرتالاستىڭ فورماسى ماعان ۇنادى. جاندى, ءتىرى اڭگىمە بولدى. بۇل باستاما الداعى ۋاقىتتا دا جالعاسىن تاپسا يگى...».
قازاقستان جازۋشىلار وداعى باسقارما توراعاسىنىڭ ورىنباسارى, اقىن باۋىرجان جاقىپ قۋانىش جيەنبايدى بۇرىننان وقىپ جۇرەتىندىگىن تىلگە تيەك ەتتى: «وسى جيناققا اتى بەرىلگەن «كۇزدىڭ جىلى جاڭبىرى» اتتى اڭگىمەسىن ءبىر دەممەن وقىپ شىقتىم. جاستار اراسىنداعى ماحاببات تاقىرىبى. جازۋشى «كۇيدىم, سۇيدىمنەن» مۇلدە اۋلاق, ەكى جاستىڭ ماحاببات سەزىمدەرىن قاراپايىم تىلمەن ادەمى جەتكىزە بىلگەن... زاريانىڭ مىنا جيناعىمەن ءالى تانىس ەمەس ەكەم. ەندى وقىپ شىعامىن. ءتىل ساياساتى كوميتەتى بۇل پىكىرتالاستى جالعاستىرا بەرگەنى ابزال».
كىتاپتارى تالقىلانعان جازۋشىلار وقىرمان سۇراقتارىنا جاۋاپ بەردى. سىنشى ءا.بوپەجانوۆا قازاق ادەبيەتىنىڭ تەگەۋرىندى, ءتىپتى جازۋ مانەرلەرى مۇلدەم بولەك جاس قالامگەرلەر مەن جاس سىنشىلاردىڭ قاۋلاپ ءوسىپ كەلە جاتقاندىعىن ءسوز ەتتى. تەك سولارعا مەملەكەت تاراپىنان ءماندى قولداۋ بولسا كانەكەي دەدى. جەرگىلىكتى جەردەگى قالامگەرلەر ءسوز الىپ, ولارعا قامقورلىقتىڭ جەتىسپەيتىندىگىن, كىتاپتارىن ءوز قاراجاتتارىنا شىعاراتىندىعىن, ناسيحات جاعىنان دا اقساپ جاتاتىندىعىنا ەل نازارىن اۋداردى.
ەكى-ءۇش ساعاتقا سوزىلعان پىكىرتالاستى ادىلبەك قابا قورىتىندىلاپ, جينالعان جۇرتشىلىققا العىس سەزىمىن ءبىلدىردى.
گۇلزيا الشىن
