ءبىلىم • 04 قازان، 2020

اسحات ايماعامبەتوۆ: ۇستاز بولۋ – جۇرەكتىڭ تاڭداۋى، جاننىڭ قالاۋى

925 رەت كورسەتىلدى

ەلىمىزدىڭ ءبىلىم جانە عىلىم ءمينيسترى اسحات ايماعامبەتوۆ ءوزىنىڭ Facebook پاراقشاسىندا ۇستازدار قاۋىمىن كاسىبي مەرەكەلەرىمەن قۇتتىقتاپ، جىلى لەبىزىن جەتكىزدى، دەپ حابارلايدى Egemen.kz

"قىمباتتى ارىپتەستەر! سىزدەردى مۇعالىمدەر كۇنىمەن قۇتتىقتايمىن! بىلىكتىلىگى جوعارى، بەدەلى مىقتى، قوعامدا قۇرمەتكە بولەنگەن مۇعالىمدەرسىز مەملەكەتتىڭ جارقىن بولاشاعىن ەلەستەتۋ قيىن. سەبەبى ەكونوميكانىڭ، مادەنيەت پەن تۇتاستاي قوعامنىڭ دامۋى سىزدەردىڭ ەڭبەكتەرىڭىزدىڭ ناتيجەسىنە تىكەلەي بايلانىستى.

ۇستاز بولۋ – جۇرەكتىڭ تاڭداۋى، جاننىڭ قالاۋى. بۇل جۇمىس اسقان جانكەشتىلىك، زور شىدامدىلىق پەن بالالارعا دەگەن ماحابباتتى تالاپ ەتەدى. ەلىمىزدىڭ بەتكە ۇستار ازاماتتارىن تاربيەلەپ، جاۋاپكەرشىلىگى مول جانە ابىرويلى مىندەتتى اتقارىپ جۇرسىزدەر. وقۋشىلارىڭىزدىڭ جەڭىستەرىنە قۋانىپ، ساتسىزدىكتەرىنە بىرگە قىنجىلاسىزدار، قينالعان شاقتارىندا قولداۋ كورسەتەسىزدەر.

مەملەكەتىمىز ءاربىر ۇستازدىڭ ەلىمىزدىڭ دامۋىنا قوسىپ وتىرعان ۇلەسىن اسا جوعارى باعالايدى. ونىڭ بىردەن ءبىر دالەلى – "پەداگوگ مارتەبەسى تۋرالى" زاڭنىڭ قابىلدانۋى. وسى زاڭنىڭ قابىلدانۋى، شىن مانىندە، ەلىمىز ءۇشىن اسا ماڭىزدى بولدى، سوندىقتان مەملەكەت باسشىسىنىڭ ۇستازدار قاۋىمىنا كورسەتكەن قولداۋى ءۇشىن العىسىمىز شەكسىز.

زاڭدا مۇعالىمدەردىڭ تەك الەۋمەتتىك كەپىلدىكتەرى عانا ەمەس، سونىمەن قاتار قۇقىقتارى مەن مىندەتتەرى دە رەسمي تۇردە بەكىتىلگەن. بۇگىنگى تاڭدا ۇستازدار قاۋىمى ارتىق ەسەپتىلىك پەن قىزمەتىنە جاتپايتىن فۋنكتسيالاردان زاڭ جۇزىندە بوساتىلدى. زاڭداعى نورمالاردىڭ مۇلتىكسىز ىسكە اسىرىلۋى قامتاماسىز ەتىلۋى ءتيىس.

سونداي-اق مۇعالىمدەردىڭ جالاقىسى دا ايتارلىقتاي ارتتى. سىنىپ جەتەكشىلىگى مەن داپتەر تەكسەرگەنى ءۇشىن تولەنەتىن قوسىمشا اقىنىڭ مولشەرى دە ەكى ەسە ءوستى. پەداگوگيكالىق شەبەرلىك بىلىكتىلىگى ءۇشىن تولەنەتىن قوسىمشا اقى دا لاۋازىمدىق جالاقىسىنىڭ 30-50%-ى مولشەرىندە بەلگىلەنىپ وتىر. ماگيستر دارەجەسى بار مۇعالىمدەرگە اي سايىن 27 مىڭ كولەمىندە قوسىمشا اقى قاراستىرىلعان. العاش رەت ءبىلىم بەرۋ ۇيىمدارىنىڭ ديرەكتورلارى مەن ورىنباسارلارىنا دا باسقارۋشىلىق شەبەرلىگى ءۇشىن لاۋازىمدىق جالاقىسىنىڭ 30%-دان 100 %-عا دەيىن قوسىمشا اقى بەكىتىلدى.

بۇدان بولەك، زاڭدا مۇعالىمدەردىڭ جۇمىس ۋاقىتى مەن دەمالىس ۋاقىتى، جۇكتەمەلەرىنىڭ ازايۋى جانە باسقا دا الەۋمەتتىك قولداۋ شارالارى ناقتى كورسەتىلگەن.

بالا زور ىقىلاسپەن ءبىلىم الىپ، جان-جاقتى دامۋى كەرەك. ءبىز بالالارىمىزدىڭ مەكتەپ پارتالارىنا قايتا ورالۋىن قالايمىز. مۇعالىم ماماندىعىندا ۋاقىت تالابىنان قورىقپايتىن، ءوز شاكىرتتەرىنە ۇلگى بولا بىلەتىن ادامدار عانا جۇمىس ىستەيدى.

كوروناۆيرۋس پاندەمياسى ۋاقىتتىڭ سىن-قاتەرىنە ىلەسىپ قانا قويماي، وسىنداي كەزەڭدە كوشباسشىلىق قاسيەتكە يە بولۋدىڭ قانشالىقتى ماڭىزدى ەكەنىن كورسەتتى. وسىناۋ كۇردەلى كەزەڭ مۇعالىمدەردىڭ قوعامداعى ءرولى مەن ماڭىزىن تاعى ءبىر ايقىنداپ بەردى. بارشاڭىزعا وسى قيىن مىندەتتى ابىرويمەن اتقارىپ جاتقاندارىڭىز ءۇشىن جانە قولداۋ ءبىلدىرىپ وتىرعاندارىڭىز ءۇشىن العىس ايتامىن.

ءبىز مۇعالىمدەردىڭ قۇقىقتارى مەن مۇددەلەرىن قورعاۋعا، الەۋمەتتىك كەپىلدىكتەردى ارتتىرۋعا، وسى ماماندىققا ەڭ لايىقتى تۇلەكتەردى تارتۋعا باعىتتالعان جۇمىسىمىزدى ودان ءارى جالعاستىراتىن بولامىز.

مەرەكە كۇنى بارشاڭىزعا زور دەنساۋلىق، وتباسىلارىڭىزعا بەرەكە، شىعارماشىلىق تابىستار تىلەيمىن! جاقىندارىڭىزدىڭ ىقىلاسى مەن قۇرمەتىنە بولەنە بەرىڭىزدەر!"، دەيدى ءبىلىم جانە عىلىم ءمينيسترى اسحات ايماعامبەتوۆ.

سوڭعى جاڭالىقتار

ۇكىمەت شيكى مۇناي باعاسىن بەكىتتى

ەكونوميكا • 24 قىركۇيەك، 2021

قىتاي مەن قازاقستان جۇك تاسىمالى ارتقان

ەكونوميكا • 24 قىركۇيەك، 2021

ۇقساس جاڭالىقتار