قوعام • 01 قازان، 2020

سەناتورلار جەر قويناۋىن پايدالانۋدىڭ جاڭا ەرەجەلەرىنىڭ اشىقتىعىنا كۇمان كەلتىردى

16 رەت كورسەتىلدى

پرەمەر-مينيسترگە جولدانعان دەپۋتاتتىق ساۋالدا سەنات دەپۋتاتتارى ەلدە شەتەلدىك ينۆەستورلارعا جەر قويناۋىن پايدالانۋ قۇقىعىن قايتا ساتاتىن دەلدالداردىڭ كوپ ەكەندىگىن مالىمدەدى. سەناتورلار جەر قويناۋىن پايدالانۋعا، ونىڭ ىشىندە شەتەلدىك كومپانيالارعا بەرۋدىڭ ترانسپارەنتتىك ەمەس مەحانيزمىن قۇرۋ ارەكەتى قوعامداعى الەۋمەتتىك شيەلەنىستەرگە اكەلۋى مۇمكىن ەكەنىن ايتىپ وتىر، دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.

سەنات دەپۋتاتتارى تارتىلعان تىكەلەي ينۆەستيتسيالاردىڭ جالپى كولەمىنىڭ جارتىسىنان كوبى مۇناي-گاز سەكتورىنا تيەسىلى ەكەنىن ايتتى. ءبىزدىڭ ەلدىڭ بىرقاتار ايماعىندا مۇناي-گاز سالاسىنىڭ ۇيىمدارى الەۋمەتتىك-ەكونوميكالىق تۇراقتىلىققا، جۇمىسپەن قامتۋعا جانە حالىقتىڭ كىرىستەرىن قالىپتاستىرۋعا ايتارلىقتاي ەلەۋلى قولداۋ كورسەتەتىنى ايقىن. سونىمەن قاتار مۇناي سەكتورى ۇيىمدارىنان الىناتىن تىكەلەي سالىقتار – قازاقستان رەسپۋبليكاسىنىڭ ۇلتتىق قورىن قالىپتاستىرۋ كوزدەرىنىڭ ءبىرى. وسىلايشا، مۇناي-گاز سەكتورىنىڭ بارلىق اسپەكتىلەرىن رەتتەۋدىڭ اشىقتىعى، اتاپ ايتقاندا، جەر قويناۋىن پايدالانۋ قۇقىعىن بەرۋ ماسەلەلەرىنىڭ وزەكتىلىگى جوعارى بولىپ وتىر.

دەپۋتات ن.بەكنازاروۆتىڭ ايتۋىنشا ەنەرگەتيكا ءمينيسترىنىڭ م.ا. بۇيرىعى بويىنشا جەر قويناۋىن پايدالانۋ قۇقىعىن بەرۋگە ارنالعان ەلەكتروندىق اۋكتسيوندار وتكىزۋ قاعيدالارى بەكىتىلگەن.

«كودەكس قابىلداعاننان بەرگى 2،5 جىلدان استام ۋاقىت ىشىندە ەنەرگەتيكا مينيسترلىگى ونى ىسكە اسىرۋ ءۇشىن قاجەتتى نورماتيۆتىك قۇقىقتىق اكتىلەردى دايىندادى جانە وسى كەزەڭدە كومىرسۋتەكتەر سالاسىندا بىردە ءبىر كونكۋرس وتكەن جوق. وسىلايشا، كونكۋرس ءۇشىن جەر ۋچاسكەلەرىنىڭ جاساندى جەتىسپەۋشىلىگى قالىپتاسىپ، ناتيجەسىندە ەل ايماقتارىنا تارتىلاتىن ينۆەستيتسيا كولەمى ايتارلىقتاي تومەندەدى»، - دەدى ن.بەكنازاروۆ.

سەنات دەپۋتاتتارى ساراپشىلاردىڭ پىكىرىنشە، مينيسترلىك قابىلداعان ەرەجەلەردە ءىس جۇزىندە قاتىسۋشىلارعا اشىق ەمەس جانە تەڭ ەمەس جاعدايلار جاساي وتىرىپ، كاسىپكەرلەر ءۇشىن زاڭنامادا كوزدەلمەگەن شەكتەۋلەر ورناتۋعا تىرىسۋدا. قابىلدانعان ەرەجەلەر پرەزيدەنتتىڭ اشىق ۇكىمەت تۋرالى، حالىقتىڭ اقپاراتقا قول جەتىمدىلىگى، سىبايلاس جەمقورلىقتى جويۋ ماقساتىندا مەملەكەتتىك رەسۋرستاردى قوعامدىق باقىلاۋ تۋرالى تاپسىرمالارىنا قايشى كەلەدى. سونىمەن بىرگە، ەرەجەدە كەلەسى ماسەلەلەر اشىلماعان نەمەسە ولار وتە قىسقا جانە تۇسىنىكسىز، اسىرەسە رەيدەرلىك پروبلەمالارىن بولدىرماۋعا نەمەسە ازايتۋعا باعىتتالعان ەرەجەلەردىڭ جوقتىعى بايقالادى. تەحنيكالىق اقاۋلار ماسەلەلەرى جەتكىلىكتى تۇردە رەتتەلمەگەن، ىشكى قايشىلىقتارى دە جەتكىلىكتى.

«ەلەكتروندىق اۋكتسيونداردىڭ وپەراتورى رەتىندە جارعىلىق كاپيتالىندا مەملەكەتتىڭ قاتىسۋى بار كوممەرتسيالىق ۇيىم تاڭدالدى جانە وعان مەملەكەتتىك فۋنكتسيالاردىڭ ءبىر بولىگى سەنىپ تاپسىرىلدى، ونى بەرۋ زاڭمەن قاراستىرىلماعان. سونىمەن بىرگە، وپەراتور الدىن-الا ساتىلاردا (وتىنىمدەردى قاراۋ جانە تىركەۋ جانە ت.ب.)، سونداي-اق اۋكتسيون كەزىندە بولۋى مۇمكىن تەرىس ءىس-ارەكەتتەرى ءۇشىن جاۋاپكەرشىلىك تارتپايدى. وپەراتوردى سىبايلاس جەمقورلىق قۇقىق بۇزۋشىلىق قۇرامى ءۇشىن جاۋاپكەرشىلىككە تارتۋ دا كۇمان تۋدىرادى»، - دەدى سەنات دەپۋتاتى.

سەناتورلار مەملەكەتتىك ورگانداردىڭ باسقارۋ شەشىمدەرىندەگى جانە كومىرسۋتەكتەر بويىنشا ەلەكتروندى اۋكتسيوندار وتكىزۋ تۋرالى شەشىم قابىلداۋداعى كەمشىلىكتەر پوتەنتسيالدى جانە شىناي ينۆەستورلارمەن سپەكۋلياتيۆتى كەلىسىمشارتتار ۇيىمداستىراتىن ءتۇرلى دەلدالدىق جانە رەيدەرلىك كومپانيالاردىڭ جاندانۋىنا سەبەپشى بولعانىن ايتىپ وتىر.

دەپۋتاتتار قاعيدالاردى قابىلدانعان نۇسقادا قالدىرۋ مەملەكەت ءۇشىن ميلليونداعان دوللار كىرىس الماۋ، اشىق بلوكتاردى دەلدالداردىڭ قولىنا بەرۋ جانە سونىڭ سالدارىنان شەتەلدىك كومپانيالاردىڭ ءبىزدىڭ ەلدىڭ ەكونوميكاسىنا ينۆەستيتسيا سالۋعا دەگەن قىزىعۋشىلىقتارىن جوعالتۋ مۇمكىندىگىن تۋدىرادى دەپ ەسەپتەيدى.

وسىعان وراي سەناتورلار نۇرلان بەكنازاروۆ، قاناتبەك سافينوۆ جانە ءلاززات سۇلەيمەن ۇكىمەت باسشىسىنا جولداعان ساۋالىندا ەڭ ماڭىزدى تابيعي رەسۋرستاردى بەرۋ بويىنشا ەلەكتروندىق اۋكتسيوندار كەزىندە قوعامدىق باقىلاۋدى ۇيىمداستىرۋ ماقساتىندا ساراپشىلار مەن قوعامدى تارتۋ قاجەت ەكەنىن ايتتى.

سوڭعى جاڭالىقتار

اتىراۋدا 9 بالانى يت تالادى

ايماقتار • 24 قازان، 2020

ۇقساس جاڭالىقتار