ەندى قاريالار قالاعان ۋاقىتتا وسىندا باس قوسىپ, قاۋقىلداسىپ, حال سۇراسىپ, اڭگىمە-دۇكەن قۇرىپ, شاحمات, دويبى, توعىزقۇمالاق ويىندارىن ەرمەك ەتەدى. ارداگەرلەر كەڭەسى مۇندا اۋدان جاستارىنا ونەگە-تاربيە بەرەتىن ءتۇرلى تاعىلىمدى شارالار ۇيىمداستىرىپ, وسكەلەڭ ۇرپاققا ءوڭىر تاريحىن ناسيحاتتاۋدى كوزدەپ وتىر.
– بۇل ورتالىقتى اشۋدى ءبىرازدان بەرى ويلاستىرىپ ءجۇر ەدىك. بۇرىنىراق اشقىمىز كەلگەنىمەن, لايىقتى ورىن بولمادى. كوپتەن بەرى كوڭىلدە جۇرگەن يگىلىكتىڭ ءساتى ەندى ءتۇستى. وسىلاي ءبىر جەرگە جينالىپ, باس قوسساق, بوس ۋاقىتتى ءتيىمدى ءارى قىزىقتى ەتىپ وتكىزسەك, جاراسىمدى ەمەس پە؟! بۇل ويدى اكىمدىككە جەتكىزدىك. اۋدان اكىمى تالعات تويشىبەك ۇلى بىردەن قولداپ, ازداپ قارجىلاي كومەك كورسەتىپ, وسى ورتالىقتان ورىن ءبولدى. ونىڭ ءىشىن مادەنيەت ءبولىمىنىڭ قىزمەتكەرلەرى ارلەپ, جاساقتادى. بارلىعى دا تاماشا جابدىقتالعان. اقساقالدار القاسى بولىپ جينالىپ, وڭىردەگى قانداي دا ءبىر ماسەلە بولسا شەشىپ, باسشىلىقتى شاقىرىپ, ءمان جايدى ايتۋعا مۇمكىندىك تۋىپ وتىر. اۋدانعا جاڭا كەلىپ جاتقان جاس مامانداردى دا العاش وسى جەردە قارسى الىپ, باتامىزدى بەرىپ, ەل اماناتىن تابىستاساق دەگەن ويىمىز بار. پاندەمياعا بايلانىستى شەكتەۋلەر كەدەرگى بولىپ تۇر. قازىرشە ءجيى باس قوسىپ, كۇندە كەزدەسە المايمىز. ايتپەسە, جوسپار كوپ. امان بولساق, بۇل ورتالىق ءالى تالاي تاماشا كەزدەسۋلەردىڭ ورداسىنا اينالادى, – دەدى اۋداندىق ارداگەرلەر كەڭەسىنىڭ توراعاسى باقىتجان مۇتتاقوۆ.
ورتالىققا كەلەتىن قاريالاردىڭ بارلىعى – ءوز ۋاقىتىندا ءار سالادا ەڭبەك ەتىپ, وسى ولكەنىڭ دامۋىنا ۇلەس قوسقان, ەڭبەگى سىڭگەن ازاماتتار. ناۋىرزىم اۋدانىندا قازىر 1060 ارداگەر بار. اقساقالدار جاڭادان اشىلعان ورتالىقتا ءبىراز ءىس-شارا ۇيىمداستىرۋدى جوسپارلاپ وتىر ەكەن. وسى اپتادا شاحماتتان جارىس وتپەك. سونداي-اق ارداگەرلەرگە ارنالعان ەسكە الۋ تاقتاسىن ورناتۋ جوسپاردا بار. كورشى كابينەتتە ەتنواۋىل بار.
اۋدان باسشىلىعى ەندى اتالعان ورتالىققا كومپيۋتەر قۇرىلعىلارىن ورناتىپ, ومىردەن كورگەن-تۇيگەنى مول, كوكىرەگى كومبە قاريالار مەن مەكتەپ شاكىرتتەرىنىڭ ونلاين كەزدەسۋلەرىن ۇيىمداستىرۋدى كوزدەپ وتىر.
قوستاناي وبلىسى,
ناۋىرزىم اۋدانى,
قارامەڭدى اۋىلى
