قازاقستان پرەزيدەنتى جانىنداعى مەملەكەتتىك باسقارۋ اكادەمياسىندا سىرتقى ىستەر ءمينيسترى ەرلان ىدىرىسوۆ اكادەميا ماگيسترانتتارى مەن دوكتورانتتارى جانە پروفەسسورلىق وقىتۋشىلار قۇرامى الدىندا «قازاقستان رەسپۋبليكاسى سىرتقى ساياساتىنىڭ باسىمدىقتارى» تاقىرىبىندا ءدارىس وقىدى.
قازاقستان پرەزيدەنتى جانىنداعى مەملەكەتتىك باسقارۋ اكادەمياسىندا سىرتقى ىستەر ءمينيسترى ەرلان ىدىرىسوۆ اكادەميا ماگيسترانتتارى مەن دوكتورانتتارى جانە پروفەسسورلىق وقىتۋشىلار قۇرامى الدىندا «قازاقستان رەسپۋبليكاسى سىرتقى ساياساتىنىڭ باسىمدىقتارى» تاقىرىبىندا ءدارىس وقىدى.
كەزدەسۋدى اشقان اكادەميا رەكتورى بولاتبەك ءابدىراسىلوۆ سىرتقى ىستەر مينيسترلىگىمەن ديپلوماتيالىق كادرلاردى دايارلاۋ, تاجىريبە الماسۋ, ارنايى باعدارلامالار نەگىزىندە بىلىكتىلىكتى ارتتىرۋ ىنتىماقتاستىقتىڭ باسىم باعىتتارىنىڭ ءبىرى ەكەنىن اتاپ وتە كەلە, قوس تاراپ اراسىنداعى بايلانىسقا توقتالدى. بۇل كۇنى ارىپتەستىك تەتىگىن ودان ءارى نىعايتۋ ماقساتىندا قول قويىلعان مەموراندۋم دا وسىنى ايعاقتاي ءتۇستى.
سىرتقى ساياسات ۆەدومستۆوسىنىڭ باسشىسى ءوز سوزىندە قازاقستاننىڭ سىرتقى ساياساتتاعى مىندەتتەرى, مينيسترلىك جۇرگىزىپ وتىرعان نەگىزگى ءىس-شارالار جايىن تىزبەلەپ بەردى. «بىزگە, باسقا دا مەملەكەتتەر سەكىلدى كورشى ەلدەرمەن قارىم-قاتىناسىمىزدى جانداندىرۋ ماڭىزدى ۇستانىم بولىپ قالا بەرمەك. قازاقستان شەكارالاس مەملەكەتتەرمەن ءوز قارىم-قاتىناسىن ءاردايىم بەكىتە تۇسكەندى قالايدى. بۇل رەتتە رەسەي فەدەراتسياسىمەن ارىپتەستىكتى نەگىزگى ورىنعا قويۋعا بولادى. ءبىزدىڭ ورتالىق ازيا ەلدەرىمەن ەكونوميكالىق ىنتىماقتاستىقتى دامىتۋىمىز وزەكتى باتىس, ەۋروپا, ازيا ەلدەرىمەن سىرتقى ساياسي بايلانىسقا دا ەلىمىز ايرىقشا ءمان بەرىپ كەلەدى», دەدى ە.ىدىرىسوۆ. ونىڭ ايتۋىنشا, قازاقستان سىرتقى ساياساتتىڭ باسقا باعىتتارىن دا نازاردا ۇستاپ وتىر. «افريكا جانە لاتىن امەريكاسى ەلدەرىمەن جۇرگىزىلىپ كەلە جاتقان ىنتىماقتاستىق قارقىنى دا وسىنى اڭعارتا الادى», دەدى مينيستر بۇل ورايدا.
ءدارىس اياسىندا ەرلان ىدىرىسوۆ اكادەميا ماگيسترانتتارى مەن دوكتورانتتارىنىڭ يراننىڭ يادرولىق باعدارلاماسىنا قاتىستى قازاقستاننىڭ ۇستانىمى, ترانسشەكارالىق وزەندەر جايى, ەلىمىزدىڭ ەۋروپالىق وداقپەن ىنتىماقتاستىعى سەكىلدى سان سالالى ماسەلەلەر توڭىرەگىندە قويعان ساۋالدارىنا جاۋاپ بەردى.
كەزدەسۋ سوڭىندا بولاتبەك ءابدىراسىلوۆ سىرتقى ىستەر مينيسترىنە ديپلوماتيا ينستيتۋتىنىڭ دامۋىنا جانە كاسىبي كادرلاردى دايارلاۋعا قوسقان ۇلەسى ءۇشىن مەملەكەتتىك باسقارۋ اكادەمياسىنىڭ قۇرمەتتى پروفەسسورى اتاعىن بەرۋ تۋرالى ديپلومدى تابىس ەتتى.
ءلايلا ەدىلقىزى,
«ەگەمەن قازاقستان».
