قاراشا ايىنىڭ 29-ىندا سانكت-پەتەربۋرگتە (رەسەي) «قازىرگى الەمدەگى يادرولىق قاۋىپسىزدىك. يادرولىق قارۋسىزدانۋ جانە تاراتپاۋ ۇدەرىستەرىندە پارلامەنتاريلەردىڭ ءرولى» تاقىرىبىندا حالىقارالىق كونفەرەنتسيا وتەدى.
قاراشا ايىنىڭ 29-ىندا سانكت-پەتەربۋرگتە (رەسەي) «قازىرگى الەمدەگى يادرولىق قاۋىپسىزدىك. يادرولىق قارۋسىزدانۋ جانە تاراتپاۋ ۇدەرىستەرىندە پارلامەنتاريلەردىڭ ءرولى» تاقىرىبىندا حالىقارالىق كونفەرەنتسيا وتەدى.
وعان ۇيىتقى بولعان قازاقستان پارلامەنتى ءماجىلىسى مەن تمد-عا قاتىسۋشى مەملەكەتتەر پارلامەنتارالىق اسسامبلەياسى. كەشە ماجىلىستە پالاتا سپيكەرى نۇرلان نىعماتۋليننىڭ توراعالىعىمەن ۇيىمداستىرۋ كوميتەتىنىڭ جيىنى ءوتىپ, قاتىسۋشىلار فورۋمنىڭ كۇن تارتىبىنە قاتىستى ۇسىنىستاردى قاراپ, ولاردىڭ وتكىزىلۋ جاعدايلارىن ساراپتادى.
كونفەرەنتسيا باعدارلاماسىندا جاھاندىق قاۋىپسىزدىك, يادرولىق قارۋدىڭ زاڭسىز اينالىمىنا جانە وندىرىسىنە جول بەرمەۋ, يادرولىق ماتەريالدارعا سەنىمدى باقىلاۋدى قامتاماسىز ەتۋ, تاراتپاۋ, باسقا دا ءىس-ارەكەتتەردە پارلامەنتاريلەردىڭ ۇلەسى سىندى جانە باسقا دا تاقىرىپتاردى قامتۋ كوزدەلىپ وتىر.
ۇيىمداستىرۋ كوميتەتى مۇشەلەرىنە ءسوزىن ارناعان نۇرلان نىعماتۋلين: «بۇل كونفەرەنتسيانىڭ ءبىز ءۇشىن ماڭىزى وتە زور. سەبەبى, حالىقارالىق پارلامەنتشىلەردىڭ ەرەكشە نازارىندا تاعى دا ەلباسىمىز نۇرسۇلتان ءابىش ۇلى نازارباەۆتىڭ يادرولىق قاۋىپسىزدىك جولىنداعى الەمدىك باستامالارى بولادى», دەدى.
جينالعاندار بۇل شارانىڭ يادرولىق قاۋىپتى جويۋ جانە يادروسىز الەم قۇرۋ جولىندا كۇش بىرىكتىرۋدە جاڭا قادامدار جاساۋعا زور ۇلەس قوساتىنىنا سەنىمدى, دەپ حابارلادى پارلامەنت ءماجىلىسىنىڭ ءباسپاسوز قىزمەتى.
