اۋىل شارۋاشىلىعى مينيسترلىگىنىڭ حابارلاۋىنشا, كوپ جاعدايدا وسىمدىك ونىمدەرىن يمپورتتاۋشىلار تاۋاردى مىندەتتى فيتوسانيتارلىق سەرتيفيكاتسىز الىپ كەلۋگە تىرىسادى. سونداي-اق جالعان نەمەسە سايكەس كەلمەيتىن سەرتيفيكاتپەن, تىيىم سالىنعان جانە زيانكەستەرى بار ونىمدەردى ەلگە كىرگىزبەك بولعان ارەكەتتەردىڭ جولى كەسىلدى.
– وسى فاكتىلەر بويىنشا 8 ايدىڭ قورىتىندىسىنا سايكەس 2 مىڭ 225 جەكە جانە زاڭدى تۇلعاعا 110 ملن 879 مىڭ تەڭگە ايىپپۇل سالىندى. 720 جاعدايدا جۇك جونەلتۋشى ەلگە كەرى قايتارىلدى, – دەپ حابارلادى مينيسترلىكتىڭ ءباسپاسوز قىزمەتى. ەكسپورتتاۋشى ەلگە كەرى جىبەرىلگەن جۇك كولەمى
1 مىڭ تونناعا, ياعني 1259 تەكشە مەترگە جۋىقتايدى. سەگىز جاعدايدا ءونىم جويىلىپ, ءۇش جاعدايدا قايتا وڭدەلدى.
انىقتالعان زاڭبۇزۋشىلىقتارعا بايلانىستى ەكسپورتتاۋشى ەلدەرگە 477 نوتيفيكاتسيا جىبەرىلدى. نوتيفيكاتسيانىڭ 252-ءسى – وزبەكستان رەسپۋبليكاسىنا, 127 – رەسەي فەدەراتسياسىنا, 38 – يران يسلام رەسپۋبليكاسىنا جىبەرىلدى.
قازىرگى تاڭدا ەلىمىزدە 77 سىرتقى جانە ىشكى فيتوسانيتاريالىق باقىلاۋ بەكەتى جۇمىس ىستەيدى. ونىڭ 32-ءسى رەسپۋبليكانىڭ شەكارا ماڭىنداعى وڭىرلەرىندە كارانتيندىك فيتوسانيتارلىق باقىلاۋدى كۇشەيتۋ ءۇشىن بيىل اشىلعانىن ايتا كەتۋ كەرەك.
مەملەكەتتىك كارانتيندىك فيتوسانيتارلىق باقىلاۋ ەلگە قاۋىپتى كارانتيندىك وبەكتىلەردىڭ – وسىمدىكتەردى زاقىمدايتىن وسىمدىك اۋرۋلارىنىڭ قوزدىرعىشتارىن, كەنە, نەماتود سىندى جاندىكتەردىڭ, سونداي-اق ءارامشوپ تۇقىمدارىنىڭ قازاقستان شەكاراسىنان ىشكە ءوتىپ كەتپەۋىن قاداعالايدى.
اۋىل شارۋاشىلىعى مينيسترلىگى اگروونەركاسىپ كەشەنىندەگى مەملەكەتتىك ينسپەكتسيا كوميتەتى بيىلعى 6 تامىزدان باستاپ شىعىس كوبەلەگى مەن كومستوك قۇرتىنىڭ تابىلۋىنا بايلانىستى وزبەكستان اۋماعىنان جەمىس-جيدەك الىپ كەلۋگە ۋاقىتشا تىيىم سالعان بولاتىن. سونداي-اق حالىقارالىق ساۋدا نورمالارىن, ونىڭ ىشىندە وسىمدىكتەردى قورعاۋ جانە كارانتين جونىندەگى حالىقارالىق كونۆەنتسيا مەن ەۋرازيالىق ەكونوميكالىق وداق تالاپتارىن بۇزعانى ءۇشىن مينيسترلىك قازاقستانعا وسىمدىك ونىمدەرىن فيتوسانيتارلىق سەرتيفيكاتسىز كىرگىزۋگە تىرىسقان بىرقاتار يمپورتتاۋشىلاردى «قارا تىزىمگە» ەنگىزدى.
