اليانس توراعاسى ءىلياس تۇستىكباەۆ اتالعان شارا بيىل ءبىرىنشى رەت وتكىزىلىپ جاتقانىن العا تارتادى. «جىل سوڭىندا قازاقستان ستۋدەنتتەر اليانسىنىڭ شاقىرىلىمىندا ۇزدىك ستۋدەنتتەردى ماراپاتتاۋدى جوسپارلاپ وتىرمىز. بۇل جىل سايىن وتكىزىلەتىن داستۇرگە اينالسا دەگەن دە ويىمىز جوق ەمەس», دەيدى ۇيىم باسشىسى.
ۇيىمداستىرۋشىلار «جاستاردىڭ ءوزىن-ءوزى باسقارۋ جۇيەسىن دامىتۋ» جوباسى اياسىندا وتكىزىلەتىن سىيلىق كەلەشەكتە ەلىمىزدەگى جاستاردى جانە جاستاردىڭ ءوزىن-ءوزى باسقارۋ ۇيىمدارىن قولداۋ جانە دامىتۋعا ۇلەس قوسادى دەگەن ۇمىتتە. جىل سوڭىنا قاراي ءتامامدالاتىن جارىستا ۇزدىك ستۋدەنت, كوللەدجدىڭ ۇزدىك ستۋدەنتى, ۇزدىك ۆولونتەر, جوو-نىڭ ەڭ ۇزدىك ءوزىن-ءوزى باسقارۋ ۇيىمى, كوللەدجدىڭ ەڭ ۇزدىك ءوزىن-ءوزى باسقارۋ ۇيىمى, ءوزىن-ءوزى باسقارۋ ۇيىمىنىڭ ەڭ ۇزدىك كوشباسشىسى, قازاقستان ستۋدەنتتەرى اليانسىنىڭ ۇزدىك شتابى مەن قازاقستان ستۋدەنتتەرى اليانسىنىڭ ۇزدىك بەلسەندىسى انىقتالماق.
جوعارىدا اتالعان اتالىمدار بويىنشا ۇزدىكتەر قاتارىنان تابىلعىسى كەلەتىن ستۋدەنتتەر وتىنىمدەرىن ask_ksa@list.ru ەلەكتروندى مەكەنجايىنا 20 قازانعا دەيىن جىبەرۋى كەرەك.
سونىمەن قاتار ستۋدەنتتەر اليانسى بيىلدىڭ ۇزدىك ءوزىن-ءوزى باسقارۋ ۇيىمىنا دا كونكۋرس جاريالاپ وتىر. اقپارات جانە قوعامدىق دامۋ مينيسترلىگى, «ازاماتتىق باستامالاردى قولداۋ ورتالىعى» كەاق قولداۋىمەن ءوتىپ جاتقان بايقاۋعا ەلىمىزدەگى جوعارى وقۋ ورىندارىنداعى جاستار ۇيىمدارى قاتىسا الادى. ۇزدىك دەپ تانىلعان ۇيىمدارعا 200 مىڭ تەڭگە كولەمىندە گرانت بار. 1 جانە 2-ورىنعا لايىق كورىنگەن جاستار قاۋىمداستىعى 100 000, 150 000 تەڭگەلىك سەرتيفيكاتقا يە بولماق.
«بۇل كونكۋرستى ۇيىمداستىرۋداعى نەگىزگى ماقساتىمىز – ءار وبلىستاعى جاستار ماسەلەسىن كوتەرىپ, جاستاردىڭ الەۋمەتتەنۋىنە جاعداي جاساپ جۇرگەن ۇيىمداردى رەسپۋبليكاعا تانىتىپ, ولاردىڭ ەڭبەكتەرىن دارىپتەۋ. قارجىلاي سىيلىق تاعايىنداۋ ارقىلى دا ولارعا قولداۋ كورسەتىپ, ودان ءارى جۇمىس ىستەۋىن جىگەرلەندىرمەك ويىمىز بار. جاستار مەملەكەت تاراپىنان قولداۋ كورسە, ەڭبەكتەرىنىڭ باعالانعانىن تۇسىنسە بۇدان دا ۇلكەن قادامدار جاساپ, الىپ اسۋلاردى ەڭسەرەدى دەگەن وي بار. البەتتە, جاستاردىڭ ماسەلەسىن جاستاردىڭ شەشۋى ورىندى ءارى قالىپتى. الايدا مەملەكەتتىڭ قولداۋىنسىز ءبىز كۇتكەن ناتيجەگە قول جەتكىزۋ كەي كەزدە مۇمكىن بولمايدى. ەل جاستارىن اتالعان كونكۋرستارعا بەلسەنە قاتىسۋعا شاقىرامىز. باسقا وڭىرلەردەگى ارىپتەستەرىمەن تانىسىپ, وي ءبولىسىپ, سەرىكتەستىك تۇزەۋگە دە جاقسى وراي تۋىپ تۇر. سوندىقتان بۇل كونكۋرستار كەلەشەكتە ءوز جەمىسىن بەرەدى دەگەن سەنىمدەمىز», دەيدى ءىلياس تۇستىكباەۆ.
كونكۋرس تالاپتارىنا سايكەس, ءار ۋنيۆەرسيتەتتەن 1 جاستار ۇيىمى قاتىسا الادى ەكەن. سونىمەن بىرگە جەڭىمپازدار سانى دا شەكتەۋلى ەكەنى ءمالىم بولدى. ءىلياس تۇستىكباەۆتىڭ ايتۋىنشا, رەسپۋبليكالىق كەزەڭگە ءار وبلىستان 1 ۇيىمنان, ال ەل استاناسى مەن شىمكەنتتەن 2, الماتى قالاسىنان 3 ۇيىمنان جىبەرىلەدى. ياعني سايىستىڭ رەسپۋبليكالىق كەزەڭىندە 21 جاستار قاۋىمداستىعى باق سىناسادى.
